¹ Lole ulwitiko kwo kutesha ifindu fyo fita kusubiliwa, sona fyo fita kuboneka. ² Pakuti abatashi bakashimikisha. ³ Mu lwitiko tumenye ukuti ifyisu nifyakumwanya fyope fikapeliwa nu Chala po tuti fyo fikuboneka itabo mbiwe ukukufuma ukusita kuboneka. ⁴ Lyulwitiko u Abeli akabika kwa Chala ikemo ilyakulusha ukaini, yo akashimikiwa ukuti wa bwanaloli, Uchala akashimikisha pa fyabupe fyake po umwene na linga afwile akali akuyugha. ⁵ Nulwitiko u Enoki akanyakulwa ukuti atakateshe ubufwe po atakaboneka pakuti uchala akamufifa mwo akali kumwegha uchala akashimikisha ukuti wa bwanaloli. ⁶ Lole we ata nulwitiko shitanga bombwa ukumuhobosha uchala, pakuti we akwisa kwa Chala akulondiwa asubile ukuti alipo nukuti akubalipila bo bakumulonda. ⁷ Nu lwitiko unowa paku sokiwa nu Chala pa fyo fitakaoneka nubwogha, akaghomba ubwato uwa kupokiwamo abanyumba yake, po akasusha ichisu cha pase po akingilagha munyumba akaba wa bwanaloli uwa lwitiko. ⁸ Nulwitiko uAbrahamu po akitidhiwa akapulika ukutila ukuya kumalo kwo ndakapyane sona akafuma atakamanya kwo akayanga. ⁹ Nulwitiko akaba mulendo ku chisu cha pangano chochita chake, akikala mu fitembe pampene nu Isaki nuyakobo akwingila pampene mu nyumba na yuyo abapangano lila lila. ¹⁰ Pakuti akalindilila akaya lya kwikalana we amenye nuwa ku zenga wi chala. ¹¹ Nulwitiko Usala akspokela amaka ukuba nu lwanda, mweo akabalilo kenda, pakuti baka mubelengela ukusubaliwa we akalaghisha. ¹² Pa ichi baka papiwa nu mundu yumo ywene we ali ngati mufwe abandu abingi ngati ndondwa sha kumwanya ubwingi bwabo, sona ngati musesenga wo guli mulubafu mu nyanja bwo butakubelengiwa. ¹³ Boshi bo bakafwa mulwitiko batakapokela ipangano lole baka litesha nukughayugha kubutali, bakitikisha ukuti balendo benda sila pa chisu. ¹⁴ Pakuti bo bakuygha ishi bilsngisha ukuti bakulonda ichisu chibe chabo. ¹⁵ Lole ngali bakumbuka mwo aka fumila ngali akamanya isila lya kughalu kila kukwawo. ¹⁶ Lole ulu akulonda ichingi ichisa cho chakumwanya, pakuti uchala atakukoshiwa isoni pakwitishiwa ukuti chala wabo pakuti abanoshe shishe akaya. ¹⁷ Nulwitiko u Abrahamu, pakugheliwa akabika ikemo u Isaki lole weyuyo akspangana aks mufumya umwana wake. ¹⁸ We kukayughiwa ishake, ukuti mwa Isaki imbeyu yako tiyikitishiwe. ¹⁹ Pakuti akatingi uchala anga shusha nabafwe ukufuma kuko pa kujimbilila akampokukela. ²⁰ Mu lwitiko u Isaki akabasaya Uyakobo nu Esau, nalinga sha findu fyo fikwisa. ²¹ Nulwitiko uyakobo pakuti akafwa, akasaya abana boshi aba Yosefu akiputa nukwinams pa mutu uwa ngomo yake. ²² Nulwitiko Uyosefu po aksfwanga, akayugha mwo tibsfumile aba Izilayeli, akslamula isha mafupa ghake. ²³ Nulwitiko umose pakupapwa baka mufifa imyeshi mitatu bapapi pakuti bakagha umwana yula mwisa sona atakoghopa indaghilo sha mwene. ²⁴ Nulwitiko Umose mwo akulamu myaks akakana ukuti itishiwe mwana wa mwana umukolo uwa Falao. ²⁵ Akabelenga ukubombiwa ifibibi pampene na bandu ba Chala takuti ukuba nifya kuhobosha ifya kukomanika mukabalilo. ²⁶ Akabelenga ukulumbushiwa kwa kilisito chuma ichakupota ifishito ifya ijiputi pakuti akatesha ichakulipila. ²⁷ Nulwitiko aba Ejipito bakaleka ukwoghopa ubukalale wa mwene pakuti bakajimba na maka ngati ukumutesha we atakuboneka. ²⁸ Nulwitiko bakapanga undungu mwikemo nukumyasila ibanda ukuti lyaku komania abana aba katote bangamwagha yuyo. ²⁹ Nulwitiko bakaloboka inyanja ingesamu ukuya ngati pa mwanya, po aba Ejipito pakughesha bakaloba. ³⁰ Nulwitiko amalinga gha Yeliko ghakawa ghakashunguliwa amashiku seveni. ³¹ Nulwitiko ulahobu umalaya ata kakomanika nabo batakupulikila pakuti akapokela abalendo nulusekelo. ³² Po njugheki sona, pakuti ndi kakanjepele akabalilo mbabule isha Gidioni barki, Samsoni yefita isha Davidi nu Samueli nabakubwi. ³³ Bo mulwitiko bakapota amabufumu, bakabomba ubwanaloli akapokela ipangano akighalila imilomo ingala mu. ³⁴ Akashimya amaka gha mulilo akspona upanga umukali, akaba na maka po akapotwa, akaba na maka ku bwite, akakisha ifilundilo ifya balendo. ³⁵ Abakolo bakapokela abafwe babo mukushuka ku bafwe po abangi bakachapulwa batakitika ukubapoka. ³⁶ Ukuti bakapokele ukushuka ukwa kulusha lole bamo baks gheliwa ni ndamyo ni ngomo sona nukupinywa nukubighalila mu Jele. ³⁷ Bakabakoma na mabwe, bakababola pakuti, bakagheliwa bakabaghogha nu panga bakenda kenda bakafwala ikwela lya ng'oshi nilya mbushi batakaba nakamu, bakatamiwa bakabombi biwa ifibibi. ³⁸ Bo ichisu cha pase chiteka bayana abene bo bakasobela ku mbanya na mumaghambana mufipanga ifya pa chisu. ³⁹ Po boshi bakabashimikisha mulwitiko batakapokela ipangano. ⁴⁰ Pakuti uchala akatunoshesha utwe ichindu icha pamwanya ukuti manye banoshiwe kusita utwe.