¹ Vano kinaaka killote dda ddoocha ddoheraatthiwa mukutho wa mafano nnddo mwaalembilleenyu. Tti ddawoona wi attheene nookhalla ni ezeru. Vano ezeru ddinnaweeriha athu okota; koma echikondi sika enallipiha. ² Ayo eneesa wi unnadduwella ddeko, khenadduwelle nnddo yaphwanelliiwa odduwella. ³ Koma muthu aamukondaka Mulluku, Mulluku annamudduwella olliyooyo. ⁴ Sika vano kinuulleelleemini dda ocha ddoocha ddoheraatthiwa mukutho wa mafano. Ninnadduwella wi nifano khe ello eyo eri ni okumi; ninnadduwella wi Mulluku tti mmoddave. ⁵ Naarittho ddookhallavo ddeko nnddo ddineeriwa "milluku" oddullu apaalle vatthi mva nave naari ddookhallavo ddinchichi dda milluku ddenndda ni Apwiya anchichi. ⁶ Wa hiyaano arivo tti Mulluku mmodda. Olliyooyo tti attiitthiihu, Oophatusa ddeko ddittheddene nave ninnakhalla ni okumi wi nimurumeyelleke. Nave erivo Apwiya* amoddave, Yesu* Khrisitu*. Ddeko ddittheddene ddaaphatusiwa mwa olliye navettho mwa olliye ninnakhalla ni okumi. ⁷ Koma khe arive muthu anaadduwella yeella. Athu amodda aaddollweella mafano sika naari vano yaachaka yoocha yeella eneesave tti yooheraatthiwa mukutho wa mafano. Yawuupusera murimiiwa tti yoofooka nave enaganiza wi aananarihiwa ni yoocheeyo. ⁸ Koma yoocha kheneeriha wi naattane ni Mulluku; kheyaavo eyo ninarameehu naahicha yoocheeyo navettho nacha khaninaphwanyavo ello. ⁹ Vano chenjerani, wi ottaphuwa wanyu vaweerani ddeko muhaakwakwatuwihe athu oofooka mu echikhulupililo. ¹⁰ Erimakhalla wi muthu ookhalla ni yawuupusera murima yoofooka, oowoona weyaano, muthu oodduwella, ochaka mu enyumba ya nifano, yeella khemullipiha mwiilli ocha yoocha yooheraatthiwa wa mafano? ¹¹ Sika vano ekaamba ya ezeru ddawo Muthu oofooka yoolla, mwanamunno apaalle murokoriyo oyo Khrisitu amukhwenlleeye aneerowoonongiwa. ¹² Nave mwawi ddiidda vowaalakwellani asinninyu ni arokorinyu ni ophoreyiha yawuupusera murimiiwa yoofooka munamuchimwella Khrisitu. ¹³ Sika vano yoocha yamukwakwatulliha mwanamunnaka apaalle murokoraka, ngiwa kichattho enama yeella, wi kihaakwakwatullihe.