¹ Asinnaka ni arokoraka, kinnapaalla wi muupuwelle ddaweereyelle makhollwaahu. Attheene yaari m'muuthuuchini wa murapo nave attheene yaallapuwa Enyanja Yoofiila. ² Nku waari wonanko obatiziwa m'muraponummo ni mu enyanjammo wi ekhalle oomuthwara Mose*. ³ Attheene yaacha yoocha emoddamoddave yeeyo ya Munepa. ⁴ Nave attheene yaawirya yoowirya emoddamoddave yeeyo ya Munepa. Yaawirya mu nlluku na Munepa no naathwara; nave nlluku nenno naari Khrisitu*. ⁵ Nave naari enthawi yeeyo Mulluku khaahakallanllena ni anchichi a yaayo, sika yaakhwa nave mitembo ddiwa ddaamwaramwareya muchipululuni. ⁶ Vano ddittheddenenndda tti echisanzo wa hiyaano, wi nihikhallelle minkhella ddeko ddoonanara wonanko alliwaayo. ⁷ Nihillapelleke mafano wonanko amoddaayo a yaayo. Vawi mawu a Mulluku* enallota wi, " Athu yaayo yaakeraatthi wi eche ni owirya nave yaavenya yiina." ⁸ Nihiraruyeke wonanko yakhalliiwa amoddaayo vawi va nllapo nimodda athu 23,000 yaakhwa. ⁹ Nihimweese Apwiya wonanko amodda a alliwaayo vawi yahiiphiwa ni enowa*. ¹⁰ Nihiwinyeke wonanko amodda a alliwaayo vawi yahiiphiwa ni Mungelo* a Wiipha. ¹¹ Ddeko ddittheddenenndda ddaaweereyella wi ekhalle echisanzo wa alliwaayo nave ddaalembiwa wi ddikhalle ddoonichenjeza hiyaano. Vawi ninnakhalla va enthawi yahaatamella emallihello. ¹² Ayo eneesa ahiimella moollipiha, enaphwanella echenjere wi ehiikuhe. ¹³ Weesiwa Orive ottheene nko onuuphiyereni tti wenko onamuphiyera arive muthu. Nave Mulluku tti oororomelleya nave khaakhullella wi nyuwaano mweesiwe ohiyana ni jasivaanyu awiimella moollipa. Koma enthawi eyocmuneesiweenyu awiinnyani ettilla yawi muvulluwellemo sika muneerowora oovillella. ¹⁴ Sika vano, akhwaaka ookondiwa, murapelleke mafano. ¹⁵ Kinallota wa nyuwaano, athu a ezeru, sika ganizerani weekhiinyu ella kinalloteemi. ¹⁶ Kaapu oyo ninaamuphariheehu mutteko va mugonelo wa Apwiya navettho oyo nnamuthokozereehuna Mulluku, naawiryellaka yeeyo ninnaattana mu nikhame na Khrisitu. Nave buledi ninamumeyameyeehu, namucha yooyo, ninnaattana mu mwiilli wa Khrisitu. ¹⁷ Kaambiiwa buledi tti mmodda, hiyaano attheene, naari naatille niri mwiilli mmodda, vawi ninnaattana mu buledi mmoddave yooyo. ¹⁸ Ngoonani athu o Israele. Athu Ayo enacha ddoheraatthiwa mukutho khenna eyaattano ni mukutho? ¹⁹ Vano kinaaka tini? Wi ddoocha ddoheraatthiwa wa mafano tti ello, apaalle nifano tti ello? ²⁰ Khe yeeyo! Eyo kinaakeemi tti yawi yooheraatthiwa va makuwa a athu oohimullapella Mulluku anavelleelliwa wa minepa ddoonanara*, ohiri wa Mulluku. Nave nginapaalla wi nyuwaano mwaattane ni minepa ddoonanara. ²¹ Khamuwora omuwiryella kapu a Apwiya navettho kapu a minepa ddoonanara. Khamuwora ochella vatebuloni a Apwiya navettho vatebuloni a minepa ddoonanara. ²² Apaalle ninapaalla wi niweerihe Apwiya ehache? Nnaganiza wi masivaahu tti ookhwaranya ayiwa? ²³ Athu amodda ennallota wi, " Ninnaakhullelliwa weera erive ello." Ddawoona, koma khe ddeko ddittheddene ddiri ddaphaama. Ninnaakhullelliwa weera erive ello koma khe ddittheddene ddinanillipiha. ²⁴ Ahikhallevo mmodda a nyuwaano aneereke ddoomuddivella yeekhaaye koma ddoowaaddivella amodda. ²⁵ Munnaakhullelliwa ocha erive ello yookullihiwa va musika wa enama, moohikoha makoho ekaamba ya yawuupusera murimaanyu. ²⁶ Vawi mawu a Mulluku enallota wi, "Ellapo yavatthi ni erive ello ya mommo tti ya Apwiya". ²⁷ Muthu ookhulupilila awiithanellani yoocha nave mwaakhullella oyaawo, muche eyo muvahiweenyu, muhikohe erive makoho ekaamba ya yawuupusera murimaanyu. ²⁸ Koma muthu mmodda allota wa nyuwaano wi, " Ddoocha ddenndda ddaaheraatthiwa mukutho wa mafano," vano muhiche ddoocha ddennddo, ekaamba ya oyo uulleelleni navettho ekaamba ya yawuupusera murima, ²⁹ ohiri yawuupusera murimaanyu koma yawuupusera murima ya muthu mmoddooyo. Vano muthu mmodda akoha wi, " Kaambiiwa tini oophwanella waka wa weera ello onahiihiwa ni yawuupusera murima ya muthu mmodda? ³⁰ Kaamuthokozaka Mulluku ekaamba ya ddoocha ddaka, muthu mmodda anaakivaanyihe mwawiidde ekaamba ya ddoochannddo?" ³¹ Sika erive ello muneereenyu, munacheenyu apaalle munawiryeenyu, mweereke wi m'mutitimihe Mulluku. ³² Muhaakwakwatuwihe Ayuda apaalle athu oohimullapella Mulluku apaalle o mpingo* wa Mulluku. ³³ Erani wonanko mmo kineerelleemi. Kinneesa omuhakallalliha arive muthu mu ddittheddene kineereemi, ohiri ddookiddivella meekhaaka koma ddoowaaddivella attheene, wi yavullusiwe.