¹ Ini adalah katiga kalinya ulun maelangi ikam. Harus ada keterangan matan dua atawa tiga saksi, maka suatu parkara dinyatakan sah. ² Sabalumnya, ulun sudah mamparingatakan buhannya nang badosa wan sabarataan nang lainnya. Wayahini, walaupun ulun mamparingatakan buhannya kaya nang ulun gawi dalam kunjungan ulun nang kadua, yaitu jika ulun datang pulang, ulun kada pacang manyayangakan buhannya, ³ karana ikam manuntut bukti manganai Kristus, nang bapandir di dalam ulun wan nang kada lamah tahadap ikam, malainkan bakuasa di dalam ikam. ⁴ Sabujurnya, Kristus disalib dalam kalamahan, tatapi Sidin hidup oleh kuasa Allah. Sabab, kami jua lamah di dalam Sidinm tatapi kami pacang hidup baimbai lawan Sidin karana kuasa Allah tahadap ikam. ⁵ Ujilah diri ikam saurang gasan malihat, apakah ikam tatap di dalam iman ikam. Pariksalah diri ikam saurang! Atawa, apakah ikam kada pinandu diri ikam saurang bahwa Kristus Yesus ada di dalam ikam, kacuali bila ikam gagal di dalam ujian. ⁶ Ulun baharap ikam pacang tahu bahwa ikam bukanlah urang nang kada tahan uji. ⁷ Namun, kami badoa lawan Allah supaya ikam kada maolah kasalahan, bukan supaya kami talihat tahan uji, tatapi supaya ikam manggawi apa nang bujur, walaupun kalihatannya kami sudah gagal ujian. ⁸ Kami kada kawa manggawi hal-hal nang balawanan lawan kabanaran, malainkan hanya gasan kabanaran. ⁹ Kami himung katika kami lamah wan ikam kuat. Doa kami adalah supaya ikam jadi sampurna. ¹⁰ Itulah sababnya, ulun manulis hal-hal ini katika ulun jauh dari ikam supaya katika ulun datang, ulun kada parlu manggunakan dengan karas, kuasa nang Tuhan julung ka ulun gasan mambangun ikam wan bukan gasan maruntuhakan ikam. ¹¹ Akhirnya, dingsanak-dingsanak, basukacitalah. Bausahalah manjadi sampurna, hiburlah satu lawan nang lain,sahati sapikir, wan hidup dalam damai. Wan, Allah sumber kasih wan damai sejahtera pacang manyartai ikam. ¹² Bariakan salam satu lawan nang lain lawan ciuman kudus. ¹³ Sabarataan urang-urang kudus mangirimakan salam gasan ikam. (13-14) Anugerah Tuhan Yesus Kristus, wan kasih Allah wan parsakutuan matan Roh Kudus manyartai ikam sabarataan.