¹ Ulun baharap, ikam sabar tahadap ulun dalam sadikit kabodohan ulun, wan ikam memang sabar tahadap ulun. ² Sabab, ulun marasa cemburu lawan ikam lawan kecemburuan ilahi karana ulun sudah mempertunangkan ikam lawan saiukung laki, yaitu mamparsambahakan ikam sabagai parawan nang suci gasan Kristus. ³ Namun, ulun takut, jangan-jangan, sama kaya ular nang lawan kelicikannya manipu Hawa, kaya itu pula pikiran ikam pacang disasatakan matan katulusan wan kamurnian pangabdiam dalam Kristus. ⁴ Sabab, ikam sabar haja katika saikung urang datang wan mahabarakan manganai Yesus nang lain, nang beda lawan nang kami habarakan, atawa katika ikam manarima roh nang beda, nang balum suah ikam tarima, atawa injil lain nangbalum suah ikam tarima. ⁵ Manurut ulun, ulun kada kurang mata para rasul luar biasa nitu. ⁶ Walaupun ulun kada pandai dalam hal bapandir, tatapi kada kaya itu dalam hal pengetahuan, karana lawan barbagai cara, kami sudah manunjukkakannya lawan ikam dalam sagala hal. ⁷ Atawa, apakah ulun malakukan dosa katika marendahakan diri ulun saurang supaya ikam kawa ditinggiakan karana ulun mahabarakan Injil Allah ka ikam lawan cuma-cuma? ⁸ Ulun marampok jemaat-jemaat lain lawan manarima upah matan buhannya gasan malayani ikam. ⁹ Wan, katika ulun basama ikam wan malarat, ulun kada mambabani saurang pun karana dingsanak-dingsanak nang datang matan Makedonia mancukupakan kabutuhan ulun. Wan, dalam sagala hal, ulun manjaga diri ulun supaya kada jadi beban gasan ikam wan ulun pacang tarus manggawinya. ¹⁰ Sabagaimana kabanaran Kristus di dalam ulun, kabanggaan ulun ini kada pacang dihalangi di wilayah-wilayah Akhaya. ¹¹ Mangapa? Apakah karana ulun kada mangasihi ikam? Allah nang mangatahuinya! ¹² Akan tatapi, ulun pacang tarus manggawi apa nang ulun gawi sahingga ulun kawa manatak kasampatan matan buhannya nang mahandaki kasampatan gasan didapati sama kaya kami dalam hal-hal nang buhannya banggakan. ¹³ Sabab, urang-urang kaya itu adalah rasul-rasul palsu, pekerja-pekerja nang curang, nang manyamar sabagai rasul-rasul Kristus. ¹⁴ Hal nitu kada mangajutakan karana Iblis pun manyamar kaya malaikat terang. ¹⁵ Karana nitu, kadalah mangajutakan bila buhan palayannya jua manyamar kaya para palayan kabanaran, nang kasudahan buhannya nitu pacang satimpal lawan parbuatannya saurang. Pandaritaan Paulus gasan Kristus ¹⁶ Sakali lagi, ulun mamadahakan jangan ada saikung pun nang manganggap ulun ini bungul. Kalaupun kaya itu, tarimalah ulun sabagai urang nang bungul supaya ulu jua kawa sadikit babangga. ¹⁷ Apa nang ulun pandirakan dalam hal kayakinan akan kabanggaan ini, ulun kada mamandirakannya kaya kahandak Tuhan, malainkan kaya dalam kabodohan. ¹⁸ Banyak urang nang babangga secara daging. Jadi, ulun jua pacang babangga. ¹⁹ Sabab, ikam bagitu bijaksana sahingga awan sanang hati ikam basabar tahadap urang bungul! ²⁰ Ikam basabar, jika ada urang nang mamparhamba ikam, managuk ikam, mangambil kauntungan atas ikam, maninggiakan dirinya, atawa manampar muha ikam. ²¹ Supan banar ulun harus baucap bahwa kami talalu lemah gasan hal nitu! ²² Apakah buhannya urang Ibrani? Ulun jua. Apakah buhannya urang Israel? Ulun jua. Apakah buhannya katurunan Abraham? Ulun jua. ²³ Apakah buhannya malayani Kristus? Ulun labih-labih jua -- ulun baucap-ucap kaya urang gila. Jerih payah ulun labih banyak, labih rancak dalam panjara, pukulan-pukulan nang kada kawa dihitung, wan labih rancak barada dalam bahaya maut. ²⁴ Matan urang-urang Yahudi, sabanyak lima kali ulun sudah manarima ampat puluh kurang sati cambukan. ²⁵ Tiga kali ulun dipukuli lawan rotan, satu kali dilempari batu, tiga kali ulun barada di kapal karam, satu malam wan satu hari ulun diseret ombak di laut. ²⁶ Banyak kali dalam parjalanan ulun, ulun tarancam bahaya matan sungai, matan para parampok, pihak urang-urang Yahudi, wan urang-urang lain Yahudi. Ulun diancam bahaya di kota di padang balantara, di laut, wan jua bahaya matan dingsanak-dingsanak palsu. ²⁷ Ulun sudah bajerih payah wan bagawi barat, tatap tajaga, kalaparan wan kahausan, rancak kada baisi makanan, kadinginan, wan kada babaju. ²⁸ Wan, salain hal-hal ini, ada jua masalah sahari-hari nang jadi tanggung jawab ulun gasan mamalihara sabarataan jamaat. ²⁹ Siapa nang lamah, wan ulun kada lamah? Siapa nang tajatuh, wan ulun kada badukacita? ³⁰ Jika ulun harus babangga, ulun pacang bangga atas hal-hal nang manunjukkakan kalamahan ulun. ³¹ Allah wan Bapa Tuhan Yesus, nang harus dipuji salama-lamanya, mangatahui bahwa ulun kada badusta. ³² Di Damaskus, gubernur di bawah Raja Aretas mangawasi kota Damaskus gasan manangkap ulun. ³³ Namun, ulun diturunakan dalam sabuah karanjang dari sabuah jandela di tembok, sahingga ulun talapas dari tangannya.