¹ Ayo-age, ate ko' ngate ge' doako' ka Jabata ya' ayo'a diu'ta supaya ayo'a gat'n nyalamat. ² Sa', iko' kaat'n basaksi tentang ayo'a kalo ayo'a umpu samangat ya' Jabata, tapi kati badasarkan pangetahuan da aihyo. ³ Sa', ayo'a kati pane kabanaran Jabata ge' barusaha managakkan kabanaran ayo'a sadi, ayo'a kati tunduk ka kabanaran Jabata. ⁴ Sa', Kristus diu'ta kaganapan Hukum Taurat da jadi kabanaran bagi satiap sok da pacaya. ⁵ Musa nulis tentang kabnaran da brasal umpat'n Hukum Taurat, kalo sook da bulah kabanaran badasarkan hukum aok idup uleh'a. ⁶ Tapi aok'a kabanaran da brasal umpat'n iman muji' ka sadat'n atemu', 'Asi ta da aok maka' ka saruga?' Arti'a, ya' minsakng Kristus disah. ⁷ Ato 'Asi da aok disah ka jurang maut?' Arti'a, ya' minsakng Kristus maka' umpat'n antara sok kabis. ⁸ Tapi aok'a jai da gat'n nyansana? "Firman madi ka riket imu', diu'ta ka sadat'n babamu' ge' ka sadat'n atemu'." Dakolah parkataan iman da kai nyarita. ⁹ Sa' nige babamu' imu' ngako kalo Yesus diu'ta Tuhan, ge' pacaya wak sadat'n atemu' kalo Jabata ngabangkit Ini' umpat'n antara sok kabis, imu' aok gat'n nyalamat. ¹⁰ Barang nige ate, sok jadi pacaya sahingga bauleh kabanaran; ge' nige baba, sok ngako sahingga bauleh kaslamatan. ¹¹ Barang Kitab Suci muji', "Asi pun da pacaya ka Ini' kati aok parnah gat'n manyangun." ¹² Barang, kati ani babeda antara ayo-sok Yahudi ge' ayo-sok Yunani; Tuhan da nyungan diu'ta ka samo samaan, da balimpah kakayaan bagi samaan sok da ngampak ka Ini'. ¹³ Barang, "Samaan sok da ngampak ka sadat'n gaat'n Tuhan aok gat'n nyalamat." ¹⁴ Tapi aok'a, langkina ayo'a aok ngampak ka Ini' da ti'nga ayo'a macaya? Ge', langkina ayo'a kaat'n pacaya ka Ini' da ti'nga parnah ayo'a dangah? Ge', langkina ayo'a kaat'n dangah, sa' kati ani da nyarita-A? ¹⁵ Ge', langkina ayo'a kaat'n nyarita-A, sa' ayo'a kati gat'n ngutus? Ulah ani gat'n nulis: "Batapa indah'a kaja-kaja ayo'a da utukng minsakng kabar bait!" ¹⁶ Sa', kati samaan sok taat ka kabar bait dakoh barang Nabi Yesaya muji', "Tuhan, asilah da laka pacaya tradap barita da laka gat'n dangah umpat'n kai'?" ¹⁷ Jadi, iman timbul umpat'n pandengaran uleh Firman Kristus. ¹⁸ Tapi iko' mansikat'n, "Jai ta ayo-sok dakoh kati dangah barang, "Sarat'n ayo'a sampe ka saluruh dunia, ge' sarat'n ayo'a sampe kja ujukng-ujukng bumi." ¹⁹ Sa', iko' muji', "Jai'ta bangsa Israel kati paham?" pertama, Musa muji', Iko' aok ngabangkit camburumu' tradap ayo'a da inya suatu bangsa, ge' ngabangkit amarahmu' tradap bangsa da baga." ²⁰ Ge' nige barani, Yesaya muji': "Iko' gat'n amput uleh ayo'a da kati najo Iko'; Iko' nyua adup ka ayo'a da kati mansikat'n tentang Iko', ²¹ Tapi aok'a, tentang bangsa Israel Ini' muji', "nyaano-ano Iko' laka ngangkahngo barekng-Ko' ka bangsa da kati taat ge' mambantah."