¹ Sak lakoh, ite' arus taliti memperhati jai da ngalaka ite' dangah biar ite' kati' taseret arus. ² Sabab, langkina ajaran da ayo malaikat nyampe gatn nyata kati' kaatn gatn ngubah, ge' satiap palanggaran ato kati' taatan ao' narima hukuman da adil, ³ langkina mungkin ite' aba' boho sak ite' mansawat kasalamatan da ahyo dakoh? Dakohlah, kasalamatan da pamule-mule da Tuhan ngabar, ge' da gatn bukti katamanan'a' ka ite' ayo sok da dangah'a'. ⁴ Salait dakoh, Jabata uga mangkat kasaksian nabo tande-tande ge' hal-hal da ajaib, ba macam mujizat ge' karunia-karunia Roh Kudus da gatn mangkatn nurut kamauan-A. Yesus Ngajadi Samu ge Talino ya' Nyalamat Manusia ⁵ Jabata kati' nganunduk dunia da ao' utuk'ng, dakoh ta dunia da sadak'ng te' nyarita, ka ayo malaikat. ⁶ Namun, ani nyungan da laka mangkatn kasaksian sadat'n nyabuah nats: "Asilah talino singga Akupm marmikir'a'? Asilah anak Talino singga Akupm marmeduli'a'? ⁷ Ya' samantara, Akupm umas'a' rabeh nyaroh umpatn ayo malaikat; Akupm ngamahkotai'a' nige' kamuliaan ge' hormat. ⁸ Akupm nganunduk samaan dakoh ka saroh kaja'a'. ⁹ Namun, sak ite' laka mile' Yesus da ya' samatara gatn umas rabeh nyaroh umpat'n ayo malaikat, dakohlah Yesus da gatn mahkotai nige' kamuliaan ge' hormat karna laka manderita pangkabis supaya kat anugerah Jabata, Ini' kaatn ngarasa pangkabis bagi samaan sok. ¹⁰ Nga sapantas'a' Ini' da bagi ini' ge' nabo' Ini' sagala jaipun ani da nyampurna Perintis Kasalamatan anak-anak-A nabo panderitaan, ya' minsak ayo'a' ka kamuliaan. ¹¹ Sabab, bait Ini' da gatn nyuci atopun ayo'a' da gatn nyuci, samaan'a' ba asal umpat'n nyungan Sama'; dakotalah sabab'a' Yesus kati' mangun ngako ayo'a' sebage age-age-A ¹² nige' muji': " Iko ao' ngayata gaatn Kupm ka age-age-Ko. Ka tuda' samaan umatMu', Iko ao' ngado pujian bagi-Mu'." ¹³ Ge' agi': "Iko' ao' napo' kayakinanko' ka Jabata," " Dialah Iko, sarta ayo kangot da laka Jabata mangkat'n ka-Iko'." ¹⁴ Karna ayo kangot dakoh anilah talino da umpu daya' ge' dagin, maka Yesus uga na'ap bagian sadat'n kaadaan ayo'a' supaya nabo pangkabis-A , Ini' kaat'n mambinasa ini' da umpu kuasa samo pangkabis dakohlah Iblis. ¹⁵ Ge', ngabebas ayo'a' da saumur idup'a' gatn ngabudak kat kapabuutan ka pangkabis. ¹⁶ Jadi, ngajelas bahwa Ini' kati' mangkatn partulongan ka ayo malaikat, tatapi ka katurunan Abraham. ¹⁷ Karna dakoh, sadat'n sagala hal Yesus arus jadi samu nige' ayo age-A, sak ladakoh Ini' kaat'n jadi Imam Da Ayho da panhu pamase' ge' setia sadat'n palayanan ka Jabata. Nige' ladakoh, Ini' kaat'n minsak panabosan samo duse-duse umat. ¹⁸ Sabab, Yesus sadi' menderita waktu gatn nyoba, maka Ini' kaat'n nulong ayo'a' da gatn nyoba.