¹ Iko harus barbangga walopun dakoh ti ani untong. Iko' ao' manarus'a' pamile'-pamile' ge' panyataan-panyataan umpat'n Tuhan, ² Iko pane ani sook sadat'n Kristus, da ampat balas taun idu' laka gat'n minsak ka surga tiga' taru antah ka sadat'n ungan'a' iko ti pane; ato ka sato ungan'a' , iko uga kati' pane, Jabata ta da pane. ³ Ge' iko pane langkina sok diah antahkasadat'n ato ka sato ungan'a', iko kati' pane, Tuhan ta da pane. ⁴ ini' gat'n ngangkat'n ka Firdaus ge ngadangah sarat'n-sarat'n da ti' aba' da nyarita, ge' da kati' buleh gat'n nyarita oleh talino. ⁵ Ya' sok diah iko ao' barbangga, tatapi ya' diko' sadi', iko ao' kati' barbangga kacuali samo kalamahan-kalamahanko'. ⁶ Ao'a', sak iko' ngate barbangga, iko' kati' ao' jadi baga karna iko' ao' nyarita da taman. Tapi, iko nahan'a' sapaya kati' ani sok da milekko labih umpat'n da ayo'a' mile' ato da ayo'a' dangah tantang iko'. ⁷ Ya' ngajaga sapaya iko kati' talalu barbangga samo panyataan-panyataan da luar biasa dakoh, maka nyabuah unak gat'n mangkat'n sadat'n daginko, kohtalah pangadu Balis ya' nyusah iko' sapaya iko' kati' nganinggi adup. ⁸ Manganai hal diah, iko' bamohon ka Tuhan taru kali karah'a' sapaya hal dakoh ngangat'n ko'. ⁹ Tapi, Ini' muji' ka iko', " Anugrah-Ko nga cukup ka imu' karna kuasa-Ko gat'n nyampurna sadat'n kalamahan." Sabab dakoh, iko' labih auhat'n barbangga samo kalamahanko' sapaya kuasa Kristus madi' kasadat'n ko. ¹⁰ Dakohtalah sabab'a', iko' misa auhat'n sadat'n kalamahan, sadat;n siksaan, sadat'n kasukaran, sadat'n panganayaan ge' sadat'n kasulitan nige' Kristus. Karna sak iko lamah , maka iko kuat. Kasih Paulus ya' Jamaat ka Korintus ¹¹ Iko nga jadi baga karna imu' makseko' ya' dakoh, padahal saharus'a' iko gat'n puji wa' mu'. Sabab, iko' kati' kurang jai-jai gat'n ngabanding ka ayo rasul da luar biasa dakoh, walopun iko kati' ani jai-jai'a'. ¹² Tande-tande da mambukti sook dakoh rasul laka gat'n ngabukti ka antara kupm sadat'n sagala katabahan, sadat'n tande-tande, mujizat-mujizat, ge kaajaipan-kaajaipan. ¹³ Sabab, sadat'n hal jailah akupm gat'n ngarandah umpat'n jamaat-jamaat lait'n, kacuali bahwa iko' kati' jadi baban bagimu'? mahi ampun ta ka kati adilanko' diah! ¹⁴ Mati', iko' siap nganto ka imu' yak da kataru kali'a' ge' iko' kati' ao' manjadi baban kaimu' karna iko' kati' najo jai da ani ka imu', sabalik'a' imu'. Sabab, ayo kangot kati' wajib ngubu' harta ya' pangama'a', tatapi pangama ya' ayo kangot'a'. 15 Ge', iko' ao' nige' auhat'n mangorban dadiko' ge' adupko ya' dimu'. Sak iko' labih nyayang imu, anita imu ao' kurang nyayangi iko? ¹⁶ Tapi, biar iko' inya baban kaimu', imu' muji' iko' licik ge' manjerat imu' nige' tipu muslihat. ¹⁷ Anita iko' nangkap untong umpat'n mu' malalui ayo sok da ko' ngutus kaimu'? ¹⁸ Iko' ngalabak Titus ya' anu ge' ngutus age kai ya' anu samahu'a'. Anita Titus nangkap untong umpat'n imu'? Anita kai kati' bajalat'n sadat'n roh da samu ge' da bajalat'n sadat'n tapak-tapak da samu? ¹⁹ Lalu, jailah imu' ngatuhi mikir'a' bahwa kai mambela adup kai taradap imu'? Kai nyansana ka hadapan Jabata sadat'n Kristus, tatapi hal-hal diah, he da terkasih, anita ya' mambangun imu'. ²⁰ Sabab, iko' buut, sak katika iko' utuk'ng, iko' ao' amputmu' kati' samu da iko harapkan, ge' imu' kati' ao' amputko' samu da gat'n mu' harap. Si pane ani parsalisihan, ate da supa, pabaji', kapentingan adup sadi' , fitnah, carita da inya-inya, kasumbongan, ge' kakacoan. ²¹ Iko kuater sa' iko' utuk'ng agi, Jabata ao' ngarandah iko' ka depanmu ge' iko' ao' baduka samo karah sok da ngauru ngabaduse sabalum'a' ge' tatap kati' bartobat umpat'n kanajisan, parcabulan, ge hawa nafsu da nga ayo'a' umas.