¹ Roh muji nige' jalas bahwa ka waktu-waktu tarakhir, sabagian sok ao' ngagat'n iman'a' nige' nyarah adup'a' ka ayo roh panyasat ge' ajaran sitan-sitan. ² Ayoa gatn pangaruh lewat tipu daya sok dalaceh da ate nurani'a' laka ngiak tande ayo'a'. ³ Ayo'a' mingat sok bainyha' ge' mingat sok uman pangkuman da Jabata nyipta, da seharus'a' gat'n narima nige ngucap syukur oleh ayo'a' da pacaya ge' da nganal da taman. ⁴ Sabab, sagala jaipun da gat'n Jabata nyipta dakoh bait ge' kati' ani da haram sa' gat'n narima nige' ngucap syukur, ⁵ karna samaan koh gat'n ngudus oleh firman Jabata ge' doa. Palayan Kristus Yesus da Bait. ⁶ Nige' ngajar hal-hal diah ka age-age saiman, imu' ao' jadi palayan Kristus da bait, sebagedume imu' laka gat'n ngajar sadat'n saratn-sarat'n iman ge' ajaran sehat da laka imu' nganang. ⁷ Ngajauhlah carita-carita sarangkaat'n ge' dongeng-dongeng nenek da ngama, tatapi ngatihlah adupmu' idup sadat'n kasalehan. ⁸ Latihan jasmani tarbatas gune'a', tatapi kasalehan bagune sadat'n sagala hal karna ngandong janji untuk idup da mati' ge' idup da ao' utuk'ng. ⁹ Sarat'n diah kaat'n gat'n mecaya ge' layak gat'n narima sapanhua'. ¹⁰ Untuk dakohlah, ite' bakaraje karas ge' bajuang. Sabab, ite' mana' pangharapan ite' ka Jabata da idup, da anilah Juru Salamat samaan talino, da istimewa ayo'a' da pacaya. ¹¹ Marintah ge' ngajarlah hal-hal diah. ¹² Usah ani sok da ngarandah imu' karna imu' angot, tatapi umaslah adumu' taladan bagi ayo sok pacaya sadat'n sarat'n, tingkah laku, kasih, iman ge' kasucian. ¹³ Sampe iko' utuk'ng, batakunlah maca Kitab-Kitab Suci, sadat'n mangkat'n nasihat ge' sadat'n ngajar. ¹⁴ Usah nyia-nyia karunia rohani da ani wa'imu', da gat'n mangkat'n ka imu' lewat nubuatan waktu ayo panatua numpang barek'a' ka samomu'. ¹⁵ Umaslah hal-hal diah nige' rajin, mangkatlah adupmu' dautuh untuk umas hal-hal diah supaya samaan sok mile' kamajuanmu'. ¹⁶ Mempratilah nige' taman-taman langkina imu' idup ge' jai da mu' ngajar. Batakunlah kasadatn 'a' karna nige' umas da samu dakoh imu' ao' gat'n nyalamat, bait adupmu' atopun ayo sok da dangah ajaranmu'.