¹ Mati', Ayo-age, mengenai waktu ge' Zaman'a, kati perlu gan't nulis kaimu'. ² Sabab, imu' sadi taman-taman pane kalo ano Tuhan aok utukng samu parangko utukng ngarum ano. ³ Sa' ayo-sok muji', Dame ge Aman," Kabinasaan aok utukng ka samo ayo'a sacara tiba-tiba, samu mahu misa anap da aok malahir, ge' ayo'a kati aok kaan't ngalulos adup'a. ⁴ Namun, Ayo-age, imu' kati idup sadan't da patangk sahingga ano dakoh aok utukng imu' samu ayo-sok da parangko. ⁵ Imu' samaan anilah kangot-kangot tano. Ite kati brasal umpan't ngarum ato patangk. ⁶ Sabab dakoh, iya'lah ite'e buus samu ayo-sok lain't, tapi kaehlah ite tatap bajaga-jaga ge waspada. ⁷ Sok da buus, buus pas ngarum ano ge' sok da mabuk, uga mabuk pas ngarum ano. ⁸ Sa, Karna ite diu'ta kangot-kangot tano, kaehlah ite sadar, ngiak baju zirah iman ge mase, ge' ngiak katopong pengharapan aok kasalamatan. ⁹ Jabata kati netap ite ya' mangalami murka, tapi ya' kaan't kasalamatan malalui Tuhan ite, Yesus Kristus, ¹⁰ Da ngalaka kabis angkan't ite supaya ite, ntah tajaga atopun buus, kaan't madi kariket-A. ¹¹ Karna dakoh, kuatkanlah asa' nige da lait'a ge' saling mambangunlah, samu da sadangk imu' bulah mati'. Nasehat Pangkabas ge' Salam ¹² Ayo-age, kai mahi kaimu' ya' manghormat ayo'a da bakaraje karas ka antaramu' ge' da mamimpinmu' sadan't Tuhan, ge da nagormu. ¹³ Hargailah ayo'a batol-batol sadan't mase karna karaje ayo'a. Iduplah sadan't dame sook nige da lain't. ¹⁴ Kai ngadurongmu', nagorlah ayo'a da idup bamalas-malasan, kuatkanlah ayo'a da bainek ate, nulongklah ayo'a da lamah, ge' basabarlah nige samaan sok. ¹⁵ Milelah supaya iya' ani sok da mambalas dajahe nige dajahe, malainkan slalu barusaha umas da bait ka antaramu' ge ya' samaan sok. ¹⁶ Barippolah slalu! ¹⁷ Malarlah badoa! ¹⁸ Mangucap syukurlah sadan't sagala hal. Sabab, dakohlah kahendak Jabata mangkan'tmu ka sadan't Kristus Yesus. ¹⁹ Iya' ngamis Roh!* ²⁰ Iya' mandang rendah nubuat-nubuat!* ²¹ Sa' ujilah sagale sasuatu! Nyintelah jai da bait! ²² Ngajauhlah umpan't samaan bentuk dajahe! ²³ Samoga, Jabata dame sejahtera sadi mangudus imu' saluruh'a. Kira'a roh, jiwa, ge unganmu' gan'tnyamun saluruh'a tanpa cacat sa' Tuhan ite, Yesus Kristus utungk ka ite. ²⁴ Ini' da maba' imu' diu'ta setia, Ini' pasti aok ngabulah'a. ²⁵ Ayo-age, badoalah uga ya' kai'! ²⁶ Angkan'tlah salam ka samaan age nige nyium kudus. ²⁷ Iko' mahikaimu' nige sangat demi gaan't Tuhan, ya' maca surat diah ka samaan age da ka te'et. ²⁸ Anugerah Tuhan ite, Kristus Yesus, menyertaimu'.