¹ Karna dakoh, katika kai nga tigi tahan agi, kai mamutuskan yak madi' adup sadi ka Athena, ² ge' ngirim Timotius, age kai ge' pelayanan Jabata, ge' kawan nyatampat kai karaje sadat'n Injil Kristus, kaimu' yak manguatkan ge' manasehatimu' berkaitan nige' imanmu', ³ supaya kati ani sok pun da gat'n goyahkan kat' pandaritan-pandaritaan diah. Sabab, adupmu sadi pane bahwa memang gat'n nentukan yak dakoh. ⁴ Bahkan, waktu kai kariketmu' kai terus manarus mangkan't pane'mu kalo ite aok mangalami panderitaan, ge' dakoh laka terjadi samu da imu' pane. ⁵ Oleh karna dakoh, waktu iko' kati tahan agi, iko' ngutus ya'a pane imanmu'. Iko buut kalo sok da panggoda ngalaka manggodamu' ge' Jerih lalah kai jadi sia-sia. ⁶ Namun, mati' Timotius ngalaka malik ka kai umpan't tampatmu' ge' ngalaka insak kabar bait tentang iman ge masemu ya'a kai, kalo imu' slalu mana' kanangan da bait aok kai ge' bungu badaput kai', samu kai' uga bungu badaput nigemu'. ⁷ Karna dakoih, Ayo-age, sadan't samaan kasusahan ge' panderitaan diah, kai' tahibur gan'tmu melalui imanmu. ⁸ Mati' kai' idup kalo imu' agun't tagap sadan't Tuhan. ⁹ Sabab, ucapan syukur jailah da kaan't kai parsambah ka Jabata karna imu', sabage ganti samaan barippo da kai' misa' ka tura' Jabata karna imu'? ¹⁰ Asat ngarum kai' badoa nige batol-batol ya'a kai' kaan't badaput agi nigemu' ge kaan't ngalengkap jai da masih kurang ka imanmu'. ¹¹ Mati', katea' Jabata ge Bapa sadi, ge' Yesus, Tuhan ite, da manuntun pagala kai' kaimu'. ¹² Kira'a Tuhan umas imu' batumbuh ge balimpah sadan't mase aok sook ka da lain't, ge' aok samaan sok, samu da kai umas ka imu'. ¹³ Kira'a Ini' maneguh atemu' ti' bacacat sadan't kesucian ka tura Jabata ge Bapa ite sa' Tuhan ite utukng, Yesus samahu ayo-sok da kudus-A.