¹ Dari panatua buek Gayus nang kusayang, nang kucinto di dalam kabonaran. ² Sudaroku nang ku sayang, aku badoa ondaknyo ko baek-baek sajo dalam sagalo hal, samoga badanmu sehat, samo jugo jiwa ko sehat. ³ Karono, aku sangat basukocito katiko sudaro-sudaro tibo dan basaksi tontang kabonaranmu, dimano pas sat tu kamu hidup dalam kabonaran. ⁴ Aku tak punyo sukocito nang lobih bosar daripado mandongar dimano anak-anakku bajalan dongan kabonaran, ⁵ Sodaroku nang kusayangi, kau batindak dongan satio dalam sagalo usahomu bagi sodaro-sodaro, walopun mreko tu orang laen. ⁶ Orang tu udah basaksitontang kasihmu dimuko jamaat. Ko salalu mambuek nang baek apobilo manolong orang tu malanjutkan parjalanannyo dongan caro nang bakonan kapado Allah. ⁷ Sobab, orang tu pun pogi untuk Namo tu, tanpo manarimo apopun dari orang nang tak porcayo. ⁸ Kerono tu, aku kito harus manolong orang-orang nang kek mareko sahinggo kito manjadi kawan sapalayanan buek kabonaran. ⁹ Aku udah manulis surat ka jamaat, tapi Diotrefes, nang suko manunjukkan diri di sola-sola orang tu, tak ondak manarimo kami. ¹⁰ Karono tu, aku tibo, ku ingatkan dio atas apo nang dibueknyo, nang manuduh kami samo kato-kato nang jahat! Tak itu sajo, dio jugo tak ondak manarimo sodaro-sodaro nang tibo jugo malarang orang tu nang ondak manarimo sodaro-sodaro tu malahan mangucilkan orang tu dari jamaat. ¹¹ Sodaroku nang kusayangi, ondaknyo babueklah nang baek, jangan maniru nang dogil. Orang nang babuek nang baek barasal dari Allah, tapi orang nang babuek nang jahat,bolum manengok Allah. ¹² Samuo orang nang baek udah basaksi mangonai Demetrius, malahan kabonaran basaksi bagitu. kami jugo basaksi, dan ko tau kasaksian kami tu bonar. ¹³ Ado banyak tontang nang ondak kucatat samo kau, tapi tak ondak aku mancatatnyo pake pena. ¹⁴ Ku harap kito dapat bajumpo sacopatnyo dan batatap muko. ¹⁵ Dame sojahtero bagimu. Kawan-kawan sampekan salam untuk kau. Sampekan jugo posan kami kepado satiap sodaro-sodaro di sanan.