¹ Peghhatikonlah betapo bosaghnyo kasih yang Bapa kaghuniokan kepado kito sehinggo kito di sobut anak-anak Allah, dan memang kito adolah anak-anak Allah. kaghena itu dunio tak mangonal kito sobab dunio tak mangonal Dio. ² Saudagha yang kukasihi, sekaghang kito adolah anak-anak Allah, totapi sapoghti apo keadoan kito nanti bolumlah tampak. namun kito tau ketiko Io datang, kito akan menjadi sapoghti Dio kaghena kito akan melihat Dio dalam keadoanyo yang sabotulnyo. ³ Setiop oghang yang punyo penghaghapan di dalom Kristus, io menyucikon dighinyo, samo sapoghti Kristus adolah suci. ⁴ Setiop oghang yang melakukon doso jugo melanggagh hukum, kaghena doso adolah pelanggaghon teghhadop hukum. ⁵ Kamu tau bahwa Kristus dinyatokan untok menghapus doso, dan di dalom Dio tak ado doso. ⁶ setiop oghang yang tinggal di dalom Dio tidok beghbuat doso; tak seoghangpun yang beghdoso tolah melihat Allah atou mangonal Dio. ⁷ Anak-anakku, jangan engkau mau di sosatkan siapopun. oghang yang melakukan kebonoghon adolah oghang bonogh, samo sapoghti Kristus adolah bonogh. ⁸ Oghang yang beghbuat doso berasal daghi sotan kaghena sotan tolah beghdoso sejak semulo. Anak Allah datang untok tujuan ini: menghancughkan peghbuatansotan. ⁹ Tidok seoghangpun yang lahigh daghi Allah beghbuat doso sobab bonih Allah tinggal di dalom dighinyo; dan io dapot beghbuat doso sobab io dilahighkan daghi Allah. ¹⁰ Dongan demikion, siapokah anak-anak Allah dan siapokah anak-anak iblis menjadi jolas. oghang yang tidok melakukon kebonoghan tidok beghasal daghi Allah, demikion jugo yang tidok mengasihi saudaghanyo. ¹¹ Sobab inilah kabagh yang sudoh kamu dongo sejak semulo, yaitu kito haghus saling mengasihi. ¹² Jangan sapoghti kain, yang beghasal daghi yang jahat yang membunuh adiknyo, kain membunuh adiknyo sobab peghbuaton kain jahat dan peghbuaton adiknyo bonogh ¹³ Saudagha-saudaghaku jangan taghkojut jiko dunio mamboncimu. ¹⁴ Kito tau kito sudoh keluagh daghi kematian menuju kehidupan kaghena kito mengasihi saudagha-saudagha. oghang yang tidok mengasihi saudaghanyo tinggal dalom kematian. ¹⁵ Setiop oghang yasng membonci saudaghanyo adolah seoghang pembunuh, dan kamu tao tidok ado seoghangpembunuh yang mempunyoi hidup kekal dalom dighinyo. ¹⁶ Beginilah kito mangonal kasih; Yesus Kristus tolah menyoghahkon hidup-Nyo untuk kito,jadi kito jugo haghus menyoghahkon hidup kito untok saudagha-saudagha kito. ¹⁷ Namun apobilo oghang punyo haghta dunio, dan melihat saudaghanyo sodang butuh, totapi menutup hati buat saudaghanyo itu, bagaimano mungkin ado kasih Allah dalom hatinyo? ¹⁸ Anak-anakku, maghilah kito mengasihi bukon dongan kato-kato sajo, melaikan dongan peghbuaton dan kebonoghan. ¹⁹ Dongan ini, kito akan tau bahwa kito beghasal daghi kebonoghan dan kito akan meneguhkon hati kito di hadopan Allah. ²⁰ Sobab apobilo hati kito menyalahkon hati kito, Allah lobih bosagh daghipado hati kito dan Io mengotahui segalo sesuatu. ²¹ Saudagha-saudaghaku yang kukasihi, jiko hati kito tak menyolahkon kito, kito memiliki keyakinan dighi di hadopan Allah ²² Apopun yang kito minto, kito meneghimanyo daghi Allah kaghena kito menughuti peghintah-peghintah-Nyo dan melakukan apo yang beghkonan kepadon-Nyo. ²³ Dan inilah peghintah Allah, yaitu supoyo kito peghcoyo dalom namo Anak-Nyo, Yesus Kristus, dan kito saling mengasihi sapoghti yang tolah Io peghintahkon kepado kito. ²⁴ Oghang yang menaati peghintah-peghintah Allah tinggal di dalom Dio, Dan Allah tinggal di dalom dio. Dongan ini kito tau bahwa Allah tinggal di dalam dighi kito, oleh Roh yang Allah kaghuniokan kepado kito