¹ Nivola tamin'i Mosesy voho Arona ndraiky Yaveh.Hoy Ie hoe:" ² "Reo Israelita kiraikiraiky aby la tsy maintsy mivory magnodidy gny vondrony iaby,misondry amy reo fanevan'ny havorohotan'ny baba-drozy.Hivory magnodidy gny ilan'ny tragno-lay fihaogna rozy iaby. ³ Reo hivory antignanan'ny tragno-lay fihaogna,ze iboahan'ny gny masoandro,la rozy ro tobin'i Joda ka mivory magnaraky gny vondrony rozy.Nasona anakilahin'i Aminadaba ro mpitariky gny vahoakin'i Joda. ⁴ Gny isan'ny vahoakin'i Joda la 74600. ⁵ Gny fokon'Isakara la tsy maintsy mivory agnilan'i Joda.Natanela anakilahin'i Zoara la tsy maintsy mitariky gny tafik'Isakara. ⁶ Johary 54400 ro tao ami-gny fizarany. ⁷ Gny fokon'i Zebolona la tsy maintsy mivory agnilan'Isakara.Eliaba anakilahin'i Helona ro tsy maintsy mitariky gny tafik'i Zebolona. ⁸ Miisaky 57400 gny tao ami-gny fizarany. ⁹ Miisaky 186400 gny isakin'ny tobin'i Joda iaby.Rozy ro hiala volohany. ¹⁰ Agny ami-gny sisiny antimo ro hisy gny tombin'i Robena magnaraky gny vondrony.Gny mpitariky gny tobin'i Robena la Elizora anakilahin'i Sedera. ¹¹ 46500 gny ao ami-gny fizarany. ¹² Mivory eo agnilan'i Robena i Simeona.Gny mpitariky gny vahoakin'i Simeona la i Selomiela anakilahin'i Zorisiday. ¹³ Niisaky 59300 gny tao ami-gny fizaran-drozy. ¹⁴ Gny fokon'i Gada la tagnilany teo.Gny mpitariky gny vahoakin'Andrianagnahary la i Eliasafa anakilahin'i Roela. ¹⁵ Miisaky 45650 gny tao ami-gny fizarany. ¹⁶ Miisaky 151450 ze nivory iaby tao amin'i Robena magnaraky gny firazany iaby.Rozy la hiala faharoe. ¹⁷ Magnarak'izay,gny tragno-lay fihaogna la tsy maintsy miboaky gny toby misondry amy reo Levita eo agnivon'ny toby iaby.Tokony hiboaky gny toby magnaraky gny filahara niliran-drozy tao ami-gny toby rozy.Gny johary iaby la tokony eo ami-gny toerany iaby,magnaraky gny fanevany. ¹⁸ Reo fizaran'ny tobin'i Efraima la eo ambanin'ny vondron-drozy.Gny mpitariky gny vahoakin'i Efraima la i Elisama anakilahin'i Ahihoda. ¹⁹ Miisaky 40500 gny tao ami-gny fizarany. ²⁰ Eo agnilan-drozy ro hisy gny fokon'i Manase.Gny mpitariky gnan'i Manase la i Gamaliela anakilahin'i Pedazora. ²¹ Miisaky 32 200 gny ao ami-gny fizarany. ²² Agnilany eo ro misy gny fokon'i Benjamina.Gny mpitarik'i Benjamina la Abidana anakilahin'i Gideony. ²³ Miisaky 35400 gny ao ami-gny fizarany. ²⁴ Miisaky 10811 reo iaby mivory ao Efraima.Rozy ro hiala fahatelo. ²⁵ Avaratsy agny ro hisy gny fizaran'ny tobin'i Dana.Gny mpitariky gny vahoakin'i Dana la i Ahiezera anakilahin'i Amisaday. ²⁶ Miisaky 62 700 gny ao ami-gny fizarany. ²⁷ Gny vahoakin'ny fokon'i Asera la nivory teo agnilan'i Dana.gny mpitariky gny vahoakin'i Asera la i Pagiela anakilahin'i Okrana. ²⁸ Miisa 41500 gny ao ami-gny fizarany. ²⁹ Tagnilany teo gny fokon'i Naftaly.Gny mpitariky gnan'i Naftaly la i Asira anakilahin'i Enana. ³⁰ Miisaky 53400 gny ao ami-gny fizarany. ³¹ Miisaky 157600 reo iaby nivory misondry tamin'i Dana.Rozy ro hiala ao amin-gny toby farany,ambanin'ny fanevan-drozy eo." ³² Reo ro isakin'ireo Israely magnaraky gny havorohotan-drozy.Reo voaisaky iaby tao ami-gny tobin-drozy, magnaraky gny fizaran-drozy la 603550. ³³ Fa Mosesy voho Arona la tsy nagnisa gny Levita tao ami-gny vahoakin'Israely.Zay la magnaraky gny fa nandraran'i Yaveh gnan'i Mosesy. ³⁴ Gny vahoakin'Israely la nanao ze raha iaby nandidian'i Yaveh gnan'i Mosesy.Nivory magnaraky reo fanevany rozy.Niboaky gny toby magnaraky gny fokony rozy,magnaraky gny filaharan'ny hasaveregnan'ny razambeny.