¹ Yakobo, omwidu wa Katonda no Mukama waisu Yesu Kristo, eri ebika eikumi n'ebibiri ebyasaansanire, mbasugiirye. ² Mulowoozenga byonabyona okubba eisanyu, bagande bange, bwe mwagwanga mu kukemebwa okutali kumu; ³ nga mutegeera ng'okugezebwa kw'okwikirirya kwanyu kuleeta okugumiinkiriza. ⁴ Era omulimu gw'okugumiinkiriza gutuukirirenga, kaisi mubbenga abaatuukirira, abalina byonabyona, abataweebuuka mu kigambo kyonakyona. ⁵ Naye oba ng'omuntu yenayena ku imwe aweebuuka mu magezi asabenga Katonda ataima awa bonnabona so takayuka; era galimuweebwa. ⁶ Naye asabenga mu kwikirirya, nga abulaku ky'abuusabuusa: kubanga abuusabuusa afaanana ng'eiyengo ery'enyanza eritwalibwa empewo ne lisuukundibwa. ⁷ Kubanga omuntu oyo talowoozanga ng'aliweebwa ekintu kyonakyona eri Mukama waisu ⁸ omuntu ow'emyoyo eibiri, atagumira mu mangira ge gonagona. ⁹ Naye ow'oluganda omukopi yeenyumirizienga olw'obukulu bwe: ¹⁰ era n'omugaiga yeenyumirizienga olw'okukopawala kwe: kubanga aliwaawo ng'ekimuli ky'omwido. ¹¹ Kubanga eisana livaayo n'omusana omungi n'eriwotokya omwido; n'ekimuli kyagwo ne kigwa n'obusa bw'ekifaananyi kyagwo ne bigota: era n'omugaiga atyo bw'aliwotoka mu kutambula kwe. ¹² Alina omukisa omuntu agumiinkiriza okukemebwa: kubanga bw'alimala okusiimibwa aliweebwa engule ey'obulamu, Mukama waisu gye yasuubizirye abamutaka. ¹³ Omuntu yenayena bw'akemebwanga, tatumulanga nti Katonda niiye ankemere kubanga Katonda takema no bubi, era iye mwene takema muntu yenayena: ¹⁴ naye buli muntu akemebwa, ng'awalulwa okwegomba kwe iye n'asendebwasendebwa. ¹⁵ Okwegomba okwo kaisi ne kubba ekida ne kuzaala okwonoona: n'okwonoona okwo, bwe kumala okukula; ne kuzaala okufa. ¹⁶ Temwebbeyabbeyanga, bagande bange abatakibwa. ¹⁷ Buli kirabo ekisa na buli kitone kituukirivu kiva waigulu, nga kiika okuva eri Itawaisu ow'ebyaka, atayinza kuba no kufuukafuuka waire ekiwolyo eky'okukyuka. ¹⁸ Olw'okuteesia kwe yatuzaire n'ekigambo eky'amazima, kaisi tubbe ng'omwaka omuberyeberye ogw'ebitonde bye. ¹⁹ Ekyo mukimaite, bagande bange abatakibwa. Naye buli muntu abbenga mwangu wo kuwulira, alwengawo okutumula, alwengawo okusunguwala ²⁰ kubanga obusungu bw'omuntu tebukola butuukirivu bwa Katonda. ²¹ Kale muteekenga wala obugwagwa bwonabwona n'obubbiibi obusukiriire, mutoolenga n'obuwombeefu ekigambo ekisigibwa ekisobola okulokola obulamu bwanyu. ²² Naye mubbenga bakozi be kigambo, so ti bawulizi buwulizi, nga mwebbeyabbeya. ²³ Kubanga omuntu yenayena bw'abba omuwulizi w'ekigambo, so nga ti mukozi, oyo afaanana ng'omuntu eyebona amaiso ag'obuzaaliranwa bwe mu ndabirwamu: ²⁴ kubanga yebona n'ayaba, amangu ago ne yeerabira bw'afaanaine. ²⁵ Naye alinga mu mateeka amatuukirivu ag'eidembe n'anyiikiriramu, nga ti muwulizi eyeerabira naye mukozi akola, oyo anaaweebwanga omukisa mu kukola kwe. ²⁶ Omuntu yenayena bwe yeerowooza nga we idiini, bw'ataziyiza lulimi lwe, naye nga yebbeeya omwoyo gwe eidiini y’oyo ebulaku ky'egasa. ²⁷ Eidiini enongoofu ebulamu eiko mu maiso ga Katonda Itawaisu niiyo eno, okulambulanga abafuuzi na banamwandu mu bunaku bwabwe, n'okwekuumanga obutabba na mabala ag'omu nsi.