6

¹ Одӥгпол, Пасхалэн кыктэтӥ нуналыз бере нырысетӥ субботае, Со дышетскисьёсыныз кизем ю-бусы пыртӥ мыно вал, но Солэн дышетскисьёсыз ю-шепъёсты ишкалтыса киазы жильдыса сиыны кутскизы.

² Фарисейёс пӧлысь кудогез шуизы солы: малы тӥ лэсьтӥськоды сыӵе ужъёсты, кудъёссэ субботае лэсьтыны уг яра?

³ Иисус соослы пумитазы шуиз: тӥ ӧд шат лыдӟе, мар лэсьтӥ Давид но солэн калыкез, куке кӧтсы сюма вал?

⁴ Кызьы со пыриз Инмарлэн корказ, басьтӥз нянь, кудзэ нокинлы но, священникъёслы сяна, сиыны уг яра вал, но сииз ачиз но соин лыктэм калыкъёсыз но?

⁵ Но шуиз соослы: Адямилэн Пиез субботалэн но кузёез.

⁶ Нош мукет субботае кылдӥз Солы пырыны синагогае но дышетыны. Отын вал адями, кудӥзлэн бур киыз куасьмемын вал.

⁷ Нош фарисейёс но книжникъёс Со шоры лушкем учкылӥзы, уза меда катья Со висисез субботае, уго утчало вал Иисусэз янгыше уськытыны.

⁸ Но Со, тодэ вал соослэсь малпанъёссэс, но шуиз адямилы, кудӥзлэн куасьмемын киыз: султы но пот синагогалэн шор вадесказ. Со султӥз но потӥз.

⁹ Соку шуиз соослы Иисус: юало Мон тӥлесьтыд: мар лэсьтыны яра субботае? ӟеч уж яке урод уж? утыны лулэз, яке быдтыны? Соос чус улӥзы.

¹⁰ Но ваньмыз шоры учкыса, вераз висись адямилы: ӝут кидэ. Со озьы ик лэсьтӥз; но солэн киыз катьяськиз, палляныз кадь ик луиз.

¹¹ Нош соослэн туж вожзы потӥз но куспазы малпаны кутскизы: мар лэьтоно Иисусэн.

¹² Со нуналъёсы Со тубиз гурезё интые вӧсяськыны, но отын уйбыт Инмарлы вӧсяськиз.

¹³ Нуназе вуэм бере ӧтиӟ дышетскисьёссэ но соос пӧлысь быръйз даскыксэ, кудъёссэ апостолъёсын нимаз:

¹⁴ Симонэз, кудзэ Пётрен нимаз, но солэсь Андрей братсэ, Иаковез но Иоаннэз, Филиппез но Варфоломеез,

¹⁵ Матфеез но Фомаез, Алфеейлэсь Иаковзэ но Симонэз, кудзэ Зилот шуыса нимало,

¹⁶ Иаковлэсь Иудазэ но Искариотлэсь Иудазэ, кудӥз бӧрысь Сое вузаз.

¹⁷ Но соосын ӵош васькиз но Со ӵошкын интые султӥз, отын Солэн дышетскисьёсыз но вань Иудеяысь но Иерусалимысь, море дурысь Тир но Сидон шаеръёсысь трос лыктэм калык вал,

¹⁸ соос Сое кылзыны лыктӥзы на асьсэлэн висёнъёссылэсь катьяськыны. Кырсь духъёсын пачкатэмъёс но катьяськылӥзы.

¹⁹ Но ваньмызлэн калыкъёслэн Со борды кутсемзы потэ вал, уго Со бордысь кужым шӧдӥське вал, кудӥзлэсь катьяськылӥзы

²⁰ Иисус, дышетскисьёсыз шоры учкыса, вераз: " Майбыресь начаръёс! Уго Инмарлэн Царствоез вылӥынгес.

²¹ Майбыресь али кӧтсы сюмаса улӥсьёс, уго кӧтсы тыроз. Майбыресь али бӧрдӥсьёс, уго серекъялозы.

²² Майбыресь тӥ, куке адӟемпотостэм каро тӥледды калыкъёс но улляло, куарето но Адямилэн Пиез понна ултӥяло.

²³ Со нуналэ шум потэ, шумпотэменыды тэкчалэ! Инмын тӥледды вите быдӟым кузьым. Уго озьы лэсьтылӥзы пророкъёсын соослэн атайёссы.

²⁴ Нош тӥледлы узыръёс - куректон! Уго тӥ тырмымон шулдыръяськиды ини.

²⁵ Куректон тӥледлы, али кӧтты тыр улӥсьёс! Тӥ сютэм улоды. Куректон тӥледлы, кин али серекъя! Тӥ бӧрдоды но вузоды.

²⁶ Куректо тӥлед, куке вань калык тӥ сярысь ӟеч вералозы! Уго озьы лэсьтылӥзы лжепророкъёсын соослэн атайёссы.

²⁷ Нош тӥледлы, кин кылзэ монэ, верасько: яратэ асьтэлэсь тушмонъёстэс, ӟэч лэсьтэ тӥледды адӟемпотостэмъёсты,

²⁸ тӥледды каргасьёсты благословить каре но тӥледды вӧсь карисьёс понна вӧсяське.

²⁹ Кин шуккоз тонэ бамад, пукты шуккыны мукет палзэ но бамдэ, кин таланы тыршоз тынысьтыд вылӥ дӥсьтэ, эн люкет мед басьтоз дэремдэ но.

³⁰ Котькудӥзлы, кин куроз тынысьтыд, сёт, но тынысьтыд басьтӥседлэсь берин эн ни кур.

³¹ Но кызьы малпаськоды тӥледын мед лэсьтозы шуыса мукет калыкъёс, тӥ но соосын озьы ик лэсьтэ.

³² Нош яратӥськоды ке тӥледды яратӥсьёсты, кыӵе тӥледлы кузьым? Уго сьӧлыкын улӥсьёс но ярато, соосты яратӥсьёсты.

³³ Но тӥледлы ӟеч лэсьтӥсьёслы ке ӟеч лэсьтӥськоды, соку кыӵе тӥлед со понна кузьым? Уго сьӧлыкын улӥсьёс но озьы ик лэсьто.

³⁴ Но пунэмен сётӥськоды ке, тодыса, тӥледлы пунэмен сётэмдэс берыктозы шуыса, соку кыӵе тӥлед со понна кузьым? Уго сьӧлыкын улӥсьёс но пунэмен сёто, но пунэмен сётэмзэс берин куро.

³⁵ Нош тӥ яратэ асьтэлэсь тушмонъёстэс, ӟеч ужъёс лэсьтэ, пунэмен сётэ но берин сётэмзэ эн вите. Соку вите тӥледды быдӟым кузьым, но Вылӥысьлэн пиосыз луоды, уго Со ӟеч лэсьтэ урод адямиослы но таукарыны быгатӥсьтэмъёслы но.

³⁶ Озьыен, гажась-жалясесь луэ, кыӵе тӥляд Атайды но гажась-жалясь.

³⁷ Эн судьялэ, тӥледды но нокин но уз судья; нокинэ но янгыше эн уськытэ, тӥледды но нокин но янгыше уз уськытэ; простть каре, соку тӥледды но простить карозы;

³⁸ сётэлэ, тӥледлы но сётэмын луоз: ӟеч мертэтэн(безьменэн), пачкатыса но йырвыло кисьтозы тӥляд сӧзыулады. Кыӵе мертэтэн(безьменэн) мертаськоды, сыӵеен ик тӥледлы но мертамын луоз.

³⁹ Иисус вераз соослы таӵе притча: быготоз-а синтэм валтыны синтэмез? уз-а кыкназы ик усе гуэ?

⁴⁰ Дышетскӥсь уг луы дышетӥсезлэсь вылӥынгес, нош дышетсконзэ быдтэм бераз дышетӥсез кадь ик луоз.

⁴¹ Мар учкиськод шелепез шоры синмысьтыз тынад братэдлэсь, нош аслад синмысьтыд кордэ уд адӟиськы?

⁴² Кызьы быготӥсько вераны аслад братэдлы: " братэ! вай мон басьто тынысьтыд синмысьтыд шелепсэ", куке аслад синмысьтыд уд адӟиськы корзэ? Чеберъяськись! басьты нырысь аслад синмысьтыд корзэ, но соку адӟёд, кызьы басьтыны шелепсэ братэдлэсь синмысьтыд.

⁴³ Ӟеч писпу уг сёт урод емыш; но урод писпу уг сёт ӟеч емыш,

⁴⁴ уго котькыӵе писпу тодмо луэ емышезъя, инжир емыш уг бичало люгы пӧлысь но терновникысь уг вандыло виноград гуры.

⁴⁵ Ӟеч адями аслаз сюлэмызлэн ӟеч ваньбур возённиысьтыз поттэ ӟечсэ, нош урод адями аслаз сюлэмызлэн урод ваньбур возённиысьты поттэ уродзэ, уго адями вера сое маин тырмемын солэн сюлэмыз.

⁴⁶ Малы тӥ Монэ шуиськоды: " Кузёе! Кузёе!"- нош уд лэсьтӥське сое, мар Мон тӥледлы верасько?

⁴⁷ Котькудӥз кин лыктэ Мон доры но кылзэ Мынысьтым кылъёсме но быдэсъя соосты, верало тӥлед, кин кадь со.

⁴⁸ Со корка пуктӥсь адями кадь, кудӥз мур копаз но инъет пуктӥз из вылэ. Вутудӟён дыръя, ву бызиз со корка улэ, но ӧз быгаты сое куашкатыны, уго корка из вылэ пуктэмын вал.

⁴⁹ Нош со, кин кылзэ но уг быдэсъя верам кылэз, инъеттэк музъем вылэ корка пуктӥсь адями кадь, кудӥзлэн пуктэм коркаез ву бызьыны кутскыку ик куашкалоз, но со коркалэн куашканэз туж бадӟым луоз.