16

¹ Аслаз дышетскисьёсызлы но вераз: одӥг адями узыр вал но солэн корка кивалтӥсез вылэм, кудӥз вылэ чагиськиллямзы, со пе кузёезлэсь ваньбурэ тус-тас каре;

² но, ӧтьыса сое, шуэм солы: " мар мон тон сярысь кылӥсько? кыл кут тынад кивалтэмедлы, уго тон уд ни быгатӥськы кивалтыны".

³ Соку шуэм аслыз ачиз корка кивалтӥсь: " мар мыным лэсьтыны кулэ? мынам кузёе корка кивалтонлэсь монэ палэнэ кароз; копаны уг быгатӥськы, курыны возьдаськисько;

⁴ куке коркаен кивалтэмысь палэнтэмын луо, тодӥсько, мар лэсьтыны".

⁵ Но, кузёезлэсь пунэмаськисьёссэ, котькудзэ огняз ӧтьыса, шуэм нырысетӥезлы: " кӧня тынад тыронэд мынам кузёелы?"

⁶ Со шуэм: " сю мертэт вӧй ". Но шуэм солы: " басьты аслысьтыд распискадэ но ӝоггес пуксьы но гожты: витьтон".

⁷ Собере мукетызлы шуэм: " нош тон кӧня кулэ?" Со шуэм: " сю мертэт чабей ". Но шуэм солы: " басьты распискадэ но гожты: тямыстон".

⁸ Но ушъям кузё осконтэм гурт кивалтӥсьсэ, малпаськыса но визьмын лэсьтэмез понна, уго та дуннелэн пиосыз ог огенызы кусыпъёс кылдытыкузы валасесьгес, югынтлэн пиосыныз ӵошатыса.

⁹ Мон но тӥледлы верасько: та дуннелэн шонертэм узырлыкеныз люкалэ асьтэослы эшъёс, уго ку тӥ начар кылёды, соос мед басьтозы тӥледды асьсэлэн пумтэм улонниосазы.

¹⁰ Ӧжытын оскымон тросын но оскымон, ӧжытын осконтэм тросын но осконтэм.

¹¹ Озьыен, тӥ осконтэм ке вал шонертэм узырлыкен, кин тӥледлы оскоз шонерзэ?

¹² Но тӥ ӧй ке вал муртлэнэныз оскымон, кин тӥледлы сётоз асьтэлэсь?

¹³ Нокыӵе ляльчи но уг быгаты тыршыны кык кузёослы, уго одӥгзэ адӟем потостэм кароз, нош мукетсэ яратоз, яке огезлы луоз оскымон, нош мукетызлы осконтэм. Уд быгатӥське тыршыны Инмар понна но коньдон понна.

¹⁴ Ваньзэ тае кылӥзы фарисейёс, кудъёсыз коньдон ярато вал, но соос серекъязы Сое.

¹⁵ Но Со соослы шуиз: тӥ калыкъёс азьын асьтэосты шонерлыкоен возьматӥськоды, нош Инмар тодэ тӥлесьтыд сюлэмъёстэс, уго со, мар вылӥлыко лыдъяське калыкъёслэн, со юрӟым Инмар азьын.

¹⁶ Закон но пророкъёс Иоанн дорозь; та дырысен Ӟеч Ивор ивортӥське Инмарлэн Царствоез, но котькудӥз отчы пырэ кужым поныса.

¹⁷ Нош ӝог-гес ин но музъем быроз, одӥг коть гожез законысь бырытчёзь.

¹⁸ Котькудӥз, кин люкиське аслаз кышноеныз но кышнояське мукетыныз, азон-калгон сьӧлык лэсьтэ, но котькудӥз, кышнояське-ке картэныз люкиськем кышномуртэн, азон-калгон лэсьтэ.

¹⁹ Одӥг узыр адями вылэм, царьёс кадь дӥсяськылӥз, но улонэз солэн праздникын кадь ввлэм, уго котькыӵе нуналэ со юон-шулдыръяськон лэсьтылӥз.

²⁰ Озьы ик Лазарь нимо начар адями вылэм, кудӥз узырлэн ӟезы азяз пуке но солэн мугорыз быдэсак яраосын шобыртэмын вылэм

²¹ узыр муртлэн ӝӧк вылысьтыз усем пырыосты солэн туж сиемез потыса улэм, но пуныос, лыктыса, нюлылӥзы солэсь яраоссэ.

²² Кулэм начар но ангелъёс нуиллям сое инме, Авраам доры. Узыр мурт но кулэм, но ватӥллям сое.

²³ Но адын курадӟыса, со ӝутэм аслысьтыз синъёссэ но кыдёкысь, инмысь адӟем Авраамез но Лазарез.

²⁴ Узыр мурт кесяськыса верам: " Авраам атай! жоля монэ но келя Лазарез, со мед чиньызэ коттыса вуын но сайкытатоз мынысьтым кылме, уго мон курадӟисько та тылын".

²⁵ Нош Авраам шуэм: " пие! тодад вай, уго тон басьтӥд ни ӟечсэ азьло улонад, нош Лазарь - уродзэ; табере со ӟечсэ адӟе татын, нош тон курадӟиськод;

²⁶ но, уката но, тӥленыд но миленым вискын пыдэстэм кылдытэмын, озьыен, кинлэн татысь потэмез потоз тӥ доры уз быгатэ, озьы ик отысь но татчы потыны уз быгатэ".

²⁷ Соку со шуэм: " курисько тонэ, атае, келя сое мынам атаелэн корказ,

²⁸ уго мынам вить братъёсы вал; мед со соослы вералоз, соос медам лыктэ шуыса та курадӟён интые".

²⁹ Авраам солы шуэм: " соослэн Моисейзы но пророкъёссы вань; мед соосты кылзӥськозы".

³⁰ Со Авраамлы шуэм: " ӧвӧл, атае, нош кин-ке кулэмъёс пӧлысь лыктоз, соку покаяться кариськозы".

³¹ Соку Авраам солы шуэм: " Моисеез но пророкъёсты ке уг кылзо, соку, кин-ке кулэмысь но ке улӟыса султӥз, уз оске".