12

¹ Сокуспын люкаськиз трос сюрсо пала калык, ог огзэс пачкатыны ик кутскиллям, Со нырысь вераны кутскиз аслаз дышетскисьёсызлы: кышкалэ фарисейёслэн шӧмзылэсь, кудӥз чеберъяськон луэ.

² Номыр но ватэмын ӧвӧл, мар уз учкы, лушкемез но, мое уз тодэ.

³ Соин ик, мае тӥ пеймытын вералоды, югытын кылоды; но мае вералляды пеле корка пушкын, кылэмын луоз липет вылын.

⁴ Верасько тӥледлы, Мынам ешъёсы: эн кышкалэ соослэсь, кин мугорэз вие но со бере номыр но лэсьтыны уг ни быгаты,

⁵ нош верасько тӥледлы, кинлэсь кышкано: кышкалэ Солэсь, Кин кулэм бере куштыны быгатэ геенае: тани, верасько тӥлед, Солэсь кышкалэ.

⁶ Вить пичи тылобурдоос уг шат вузасько кук ассарияен? Одӥгез но соос пӥлысь вунэтэмын ӧвӧл Инмарлэн.

⁷ Нош тӥляд вань йырсиосты йырады лыдъямын. Озьыен, эн кышкалэ: тӥ дуногес трос пичи тылобурдоослэсь.

⁸ Верасько тӥледлы: котькудзэ, кин шара лыдъя Монэ Инмарен калыкъёс азьын, но Адямилэсь Пизэ шара лыдъя Инмарлэн ангелъёсыз азьын;

⁹ нош кин куштӥськоз Мынысьтым калыкъёс азьын, Мон солэсь куштӥсько Инмарлэн ангелъёсыз азьын.

¹⁰ Но котькудӥзлы, кин вералоз Адямилэн Пиез пумитэ, простить каремын луоз; но кин урод кыл вералоз Святой Дух пумитэ, солы проститькаремын уз луы.

¹¹ Ку тӥледды ваёзы синагогаос, кивалтӥсьёс но власьтёс доры, эн чаклаське, кызьы но мае вераны,

¹² уго соку Святой Дух дышетоз тӥледды, мае вераны кулэ.

¹³ Одӥг мурт калыкъёс пӧлысь Солы шуиз: Дышетӥсь! Вера мынам братэлы, мед со монэным наследствозэ люкоз.

¹⁴ Иисус шуиз со адямилы: кин Монэ пуктӥз судьяны яке висъяны тӥледды?

¹⁵ Соберо Со ваньмызлы вазьылӥз: учкелэ, палэнске аслыд гинэ пайда поттонлэсь, уго адямилэн улонэз шудо уг лу солэн трос ваньбурэзлэсь.

¹⁶ Но вераз соослы притча: одӥг узыр адямилэн бусыяз бадӟым ю-нянез далтэм;

¹⁷ но со ачич ас понназ малпаськем: " мар мыным лэсьтоно? Будэтэм ю-няньме поныны интые ӧвӧл".

¹⁸ Но шуиз: " тани мар лэсьто: куашкато кеносъёсме но бадӟымесьгес пукто, но отчы люкало ваньзэ няньме но ваньзэ ваньбурме,

¹⁹ но шуо лулылы: лулу! трос тынад ваньбуред кылле трос аръёслы: шутэтскы, си, ю, шулдыръяськы".

²⁰ Нош Инмар солы шуиз: " визьтэм! та уе тынысьтыд лулдэ басьтозы; кинлы бен кылёз нынад люкам ваньбуред?"

²¹ Озьы луэ соосын, кин ас понназ, нош Инмар понна уг узырмы.

²² Но шуиз Аслаз дышетскисьёсызлы: соин ик верасько тӥледлы,- эн чаклаське асьтэлэн лулды понна, мар тӥледлы сиёно, мугорды понна но эн, мар дӥсяськоно:

²³ лул бадӟымгес сиёнлэсь, но мугор - дӥсьлэсь.

²⁴ Учке кырныжъёс шоры: соос уг но кизё, уг но арало; соослэн ӧвӧл возённизы но, кеносъёссы но, но Инмар соосты сюдэ; кӧнялы нош тӥ ӟечгес тылобурдоослэсь?

²⁵ Бен кин тӥ пӧлысь, кужмысь тыршыса ке но, ватсалоз аслысьтыз ӝуждалазэ одӥг гырпумлы ке но?

²⁶ Озьыен, пичизэ ке но уд быгатӥське лэсьтыны, малы малпаськиськоды мукетыз сярысь?

²⁷ Учкелэ лилияос шоры, кызьы соос будо: соос уг но ужало, уг но черсо; нош верасько тӥледлы, Саламон но аслаз вань даназ озьы ӧз дӥсяськылы, кызьы котькудӥз соос пӧлысь.

²⁸ Нош бусыысь турынэз ке, кудӥз туннэ вань нош ӵуказе, куштэмын луоз гурэ, Инмар сокем дӥся, нош тӥледды укато но, осконды ӧжытъёс.

²⁹ Озьен, эн утчалэ, мар тӥледлы сионо, яке юоно, эн но чаклаське,

³⁰ уго ваньзэ тае утчало та дуннеысь калыкъёс; тӥляд Атайды тодэ уго мар тӥледлы кулэ;

³¹ нош утчалэ Инмарлэсь Царствозэ гинэ но ваньмыз та тӥледлы ватсаськоз.

³² Пичи ыж лукъёс, эн кышкалэ! уго тӥляд Атайды мылкыд кариз сётыны тӥледлы Царство.

³³ Вузалэ асьтэлэсь ваньбурдэс но сётчалэ кулэяськисьёслы. Дасялэ асьтэлы ноку но вужмисьтэм ваньбур возённи, омыръяса но быронтэм инмын сокровище, кытчы лушкаськись матаз но ул лыкты но кей но кытын уг кора,

³⁴ уго кытын сокровищеды, отын сюлэмды но луоз.

³⁵ Тӥляд кусты керттэмын мед луоз, светильникъёсты улӟытэмы.

³⁶ Но тӥ адямиос кадь луоды, кудъёсыз кузёзэс сюанысь витё, куке лыктоз но йыгаськоз, соку ик солы усьтыны.

³⁷ Куке кузё гуртаз бертоз, рабъёссэ шетьтоз ке сазен, шудоесь сыӵе рабъёс; зэм ик тӥледлы верасько, со куссэ керттылоз но пуктоз соосты, но, матэктыса, соослы служить кароз.

³⁸ Но лыктӥз ке кыкэтӥ возьмаськыку, куиньметӥ возьмаськыке ке лыктоз, ношедьтоз соосты озьы, соку шудоесь со рабъёс.

³⁹ Тӥ тодӥськолы, корка кузё тодысал ке, ку лушкаськись лыктоз, ӧй изьысал но ӧй лэзьысал копаны аслаз корка улаз.

⁴⁰ Тон но дась лу, уго уд тодӥськы, кыӵе дырын лыктоз Адямилэн Пиез.

⁴¹ Соку шуиз Солы Пётр: Кузё-Инмаре! ми понна-а вераськод та притчаез, яке ваньмыз понна?

⁴² Кузё-Инмар нош шуиз: кин оскымон но ӟёч малпаськись кивалтӥсь, кудзэ корка кузё пуктӥз аслаз ляльчиосыз вылын сётчаны нянь нормаез дырыз дыръя?

⁴³ Шудо со раб, кудзэ кузёез, лыктыса, шедьтоз озьы лэсьтыкуз.

⁴⁴ Зэм ик тӥледлы верасько, сое пуктозы аслаз ваньбурызлы кивалтӥсен.

⁴⁵ Нош со раб малпаз ке аслаз сюлмаз: " Ӝоген уз лыкты мынам кузёё", но жугоз ляльчиоссэ, сиёз но юоз но кудӟёз но,

⁴⁶ со раблэн кузёез шӧдтэк шорысь лыктоз, сыӵе нуналэ, ку со уг витьы, сыӵе часэ, ку со уг малпа, но жугоз сое, сое вите осконотэмъёслэн кадь ик удыс.

⁴⁷ Со раб, кудӥз тодэ кузёезлэсь волязэ, но дась ӧй вал, но ӧз лэсьты кызыьы со косӥз, трос жугемын луоз;

⁴⁸ нош кудӥз уг тоды, но лэсьтоз сыӵе уж, мар понна наказать карыны кулэ, ичигес жугемын луоз. Но котькинлэсь кинлы трос сётэмын, трос куриськоз, но кинлы трос оскемын, солэсь тросгес юалозы.

⁴⁹ Тыл Мон музъем вылэ вайыны лыктӥ, но со мед ӝуалоз ини шуисько!

⁵⁰ Крещенниен Мон крестится кариськыны кулэ; но со быдэсмытӵёзь, кыӵе Мон курадӟисько!

⁵¹ Малпаськоды Мон лыктӥ музъем вылэ вайыны тупаса улон? ӧвӧл, верасько тӥлед, нош люкон;

⁵² уго одӥг коркан вить муртъёс люкиськозы, куинез кыкез пумитэ, но кыкез куинез пумитэ:

⁵³ атай пиез пумитэ луоз, но пиез атаез пумитэ; анаез нылыз пумитэ, нылыз анаез пумитэ; свекровьез кенэз пумит, кенэз свекровьез пумит.

⁵⁴ Озьы ик трос калыкъёслы но шуиз: куке тӥ адӟиськоды шунды пуксён палась ӝутскись пилемез, соку ик вераськоды: " куазь зороз ",

⁵⁵ но озьы луэ; но ку лым шорысь палась тӧл пельтэ, вераськоды: " пӧсь луоз ", но озьы ик луэ.

⁵⁶ Чеберъяськисьёс! Ин шоры но музъем шоры учкыса куазез валаны быгатӥськоды, нош валаны, кыӵе али вуиз ини дыр уд валаське

⁵⁷ Малы бен тӥ асьтэос валаны уд быгатӥське, мар тӥледлы кулэ?

⁵⁸ Но тыныд кылдӥз ке мыныны аслад вожвылъяськисеныд кивалтӥсь доры, тыршы солэсь мозмытскыны, уго со нуыны тонэ быгатэ судья доры, нош судья сётоз тонэ стражниклы, нош стражник пытсалоз тонэ тюрьмае.

⁵⁹ Верасько тыныд: уд пот отысь, кӧня вань коньдондэ тырытчёзь.