¹ ۱۔ تے بنی اسرائیل نے خداوند دی نِگاہ وچ فیر بدی کیتی، تے خداوند نے اوہناں نوں چالی وریاں لئی فلستیاں دے ہتھ چ دے دتا۔ ² ۲۔ تے دان دے قبیلے وچوں صرعا دا اک بندہ سی جہدہ ناں منوحہ سی۔ اوہدی جنانی بے اولاد سی تے اوہدے کوئی بال نہ ہویا۔ ³ ۳۔ تے خداوند دا فرشتہ اوس جنانی نوں وکھالی دتا۔ تے اوہنے اوہنوں آکھیا پئی توں بانجھ ایں تے تیرا کوئی بال نیں پر توں حاملہ ہوئیں گی تے تیرے ہاں اک منڈا پیدا ہووئے گا۔ ⁴ ۴۔ ایس لئی ہن توں دھیان رکھیں تے نہ مے تے نہ کوئی نشے والی شے لیئں۔ تے نہ ای کوئی ناپاک شے کھائیں۔ ⁵ ۵۔ ایس لئی پئی توں حاملہ ہوویں گی تے تیرے چوں اک پتر ہووے گا تے اوہدے سر تے اُسترا نہ پھرے گا۔ کیونجو اوہ منڈا ماں دے ڈیڈھ چوں ای خدا دا نذیر ہووئے گا تے اوہ اسرائیلیاں نوں فلستیاں دے ہتھ توں رہائی دواناں شروع کرے گا۔ ⁶ ۶۔ فیر اوہ جنانی آئی تے اپنے بندے نوں دسیا، پئی اک رب دا بندہ میرے کول آیا تے اوہدی صورت خداوند دے فرشتے وانگر ڈاہڈی ڈرونی سی، تے میں اوہنوں نیں پچھیا پئی توں کتھوں دا ایں تے نہ اوہنے مینوں اپنا ناں دسیاں ۔ ⁷ ۷۔ تے اوہنے مینوں کہیا، ویکھ توں حاملہ ہوئیں گی تے تیرے چوں منڈا پیداہووے گا، ایس لئی توں مے، تے نہ نشے والی کوئی ہور شے پیویں۔ تے نہ کوئی ناپاک شے کھاویں۔ کیونجو اوہ منڈا پیٹ توں ایں ،مرن دے ویلےتیک خدا دا نذیر ہووے گا۔ ⁸ ۸۔ تد منوحہ نے خداوند دے اگے فریاد کیتی تے آکھیا، اے خداوند میں تیری منت کرنا ں پئی اوہ رب دا بندہ جہنوں توں گھلیا سی فیر ساڈے کول آئے تے سانوں سکھائے پئی اسیں اوس منڈے لئی جہیڑا جمن والا اے کیہ کریئے۔ ⁹ ۹۔ تے خداوند نے منوحہ دی فریاد سُن لئی تے خداوند دا فرشتہ اوس جنانی دےکول جہدوں اوہ کھیت چ سی فیر آیا۔ پر اوہدا بندہ منوحہ اوہدے نال نیں سی۔ ¹⁰ ۱۰۔ اوس جنانی نےچھیتی کیتی تے نس کے اپنے بندے نوں دسن لگی،ویکھ اوہ بندہ مینوں فیر وکھالی دتا اے جہڑا اوس دن میرے کول آیا سی۔ ¹¹ ۱۱۔ منوحہ اُٹھیا تے اپنی بڈی دے پچھے گیا تے اوس بندے کول آیا تے اوہنوں آکھیا پئی توں اوہ ای بندہ ایں جہنیں ایس جنانی نال گلاں کیتیاں سن؟ اوہنے آکھیا میں ا ای ا ٓں۔ ¹² ۱۲۔ تد منوحہ نیں آکھیا تیریاں گلاں پوریاں ہون۔ پر اساں اوس منڈے دی پالنا کنویں کرنی ایں ، تے اوہدے نال کیہ کرنا ایں؟ ¹³ ۱۳۔ خداوند دے فرشتے نے منوحہ نوں آکھیا، اوہ ساریاں گلاں جہیڑیاں میں ایس جنانی نوں دسیاں نیں اوہ اوہناں دا دھیان رکھے۔ ¹⁴ ۱۴۔ اوہ کوئی اجہی شے جہڑی تاک نال پیدا ہوندی اے نہ کھاوے ۔ تے نہ ای مے یا نشے والی شے پیوے۔ نہ کوئی ناپاک شے کھاوے۔ تے جو کجھ میں اوہنوں حکم دتا اے اوہنوں منے۔ ¹⁵ ۱۵۔ منوحہ نے خداوند دے فرشتے نوں آکھیا پئی جے اجازت ہووے تے اسی تینوں روک لیئے تے بکری دا اک بچہ تیرے لئی تیارکریئے۔ ¹⁶ ۱۶۔ تد خداوند دے فرشتے نے منوحہ نوں جواب دتا پئی اگر توں مینوں روک وی لیئں تے میں فیر وی تیری روٹی نیں کھاواں گا پر جے توں سوختنی قربانی کرنا چاہویں تے تیرے لئی لازمی اے پئی اوہنوں خداوند لئی گزرانیں۔ کیونجو منوحہ جاندا نیں سی پئی اوہ خداوند دا فرشتہ اے۔ ¹⁷ ۱۷۔ تے منوحہ نے خداوند دے فرشتے نوں آکھیا پئی تیرا ناں کیہ اے تانجو جیویں تیریاں گلاں پوریاں ہون تے اسیں تیری عزت کریئے۔ ¹⁸ ۱۸۔ خداوند دے فرشتے نے اوہنوں آکھیا، توں میرا ناں کیوں پچھنا ایں ، میرا ناں تے عجیب اے؟ ¹⁹ ۱۹۔ فیر منوحہ نے بکری دا بچہ نذر دی قربانی لئی لے کے اک چٹان تے خداوند لئی اوہنوں گزرانیاں ۔ فیر فرشتے نے اک عجیب کم کیتا۔ تےمنوحہ تے اوہدی بڈی دونویئں ویکھن ڈیئے سن ۔ ²⁰ ۲۰۔ تے فیر اینج ہویا پئی جدوں شعلہ مذبحے توں اسمان ولے گیا تے خداوند دا فرشتہ مذبح دے شعلے چ ہووکے اوہدے نال اُتے چلا گیا۔ تے منوحہ تے اوہدی بڈی ویکھ کے منہ پرنے زمین تے ڈگ پئے۔ ²¹ ۲۱۔ پر خداوند دا فرشتہ منوحہ تے اوہدی بڈی نوں فیر کدی وکھالی نہ دتا۔ فیر منوحہ نے جان لیا پئی اوہ خداوند دا فرشتہ سی۔ ²² ۲۲۔ تے منوحہ نے اپنی بڈی نو ں آکھیا، ہن اسی ضرور مر جاواں گے کیونجو اسیں رب نوں ویکھ بیٹھے آں۔ ²³ ۲۳۔ اوہدی بڈی نے اوہنوں آکھیا، جے رب سانوں مارنا چاہندا، تےاوہ ساڈے ہتھوں سوختی تے نذر دی قربانی نہ لیندا۔تے نہ ای سانوں ایہہ ساریاں شیواں وکھاندا ، تے نہ ای ساڈے نال اجہیاں گلاں کردا۔ ²⁴ ۲۴۔ فیر اوس جنانی دے گھر اک منڈاجمیاں تے اوہنے اوہدا ناں سمسون رکھیا۔ اوہ منڈا وڈا ہویا تے خداوند نے اہنوں برکت دتی۔ ²⁵ ۲۵۔ فیر خداوند دا روح اوہنوں دان دے خیمیاں چ جہیڑا صرعہ تےاستال دے وچکار سی اکسان لگا۔