¹ ۱۔ہُوں یُوحنا جکو وشواسی منݙݪی رو راہنُما ہاں، ایہ خَط اُوئے چُگیوڑی وشواسی منݙݪی اَن اُوئے رے ٻاݪاں یعنی وشواسیاں نا لِکھئیں وو جکاں خاں ہُوں خَچائی ری وجہ خاں پریم راکھئیں۔ نی چھَڑو ہُوں پݨ او خارا وی پریم راکھئی جکاں نا خَچائی ری ٹھاء ہے۔ ² ۲۔ایہ خَچائی آپاں میں قائم رہئی اَن ہمیشہ اَپݨے بھیݪی رہخے۔ ³ ۳۔اِیشوَر ٻاپ اَن اُوئے رے ݙِیکرے یسوع مسیح ری کِرپا، دَیا اَن خُکھ آپاں ماتھے خَچائی اَن پریم خاں ہووتا رہ۔ ⁴ ۴۔ہُوں گھݨو راضی ہویو جَݙے مھناں ٹھاء لاگو کہ تھارا کئیں وشواسی اُوئے خَچائی ماتھے بَہی وا جکے رو حُکم آپاں نا ٻاپ ری طرف خاں لابھو ہے۔ ⁵ ۵۔اِیئے خارُو اَے مھان٘ری ٻہن آݪِیکار وشواسی منݙݪی، ہُوں تھاری مِنتھ کرئیں کہ آؤ آپاں خارا ہیکے ٻِجے خاں پریم راکھاں۔ ہُوں ایہ کوئی نَووں حُکم کونی لِکھتو وو پݨ ایہ اوج حُکم ہے جکو شرُوع خاں لابھو ہے۔ ⁶ ۶۔پریم رو مطلب ایہ ہے کہ آپاں اِیشوَر رے حُکماں ماتھے بَہاں۔ ایہ اوج حُکم ہے جکو تھاں شرُوع خاں خُݨیو ہے اَن تھاں نا اِیئے ماتھے بہوݨ چاہیجے۔ ⁷ ۷۔کیان٘کے گھݨا کُوڑا نبی دُنیا میں آیا را جکو اِیئے بات نا مِنکھاں رے رُوبرُو کونی منتا کہ یسوع مسیح اِنسان رے رُوپ میں آیو۔ ایَہڑا مِنکھ بھَٹکاوݨ آݪا اَن مسیح را مُخالف ہے، ⁸ ۸۔اِیئے خارُو ہُشیار رہو کہ مھاں جکو محنت تھاں میں کی ہے اُوئے نا تھے گُما نی ݙو پݨ تھاں نا پُورو اَجر لابھے۔ ⁹ ۹۔جکو کوئی مسیح رے خِکھایوڑے باتاں ماتھے قائم کونی رہتو اَن اُوئاں نا چھوڑ ݙئی اُوئے کَڈھے اِیشوَر کونی۔ جکو کوئی مسیح رے خِکھایوڑے باتاں ماتھے قائم رہئی اُوئے کَڈھے اِیشوَر وی ہے اَن اِیشوَر رو ݙِیکرو وی۔ ¹⁰ ۱۰۔جے کوئی تھاں کَڈھے آوے اَن ایہ نی خِکھاوے، تو نی اُوئے نا گھرے آوݨ ݙو اَن نِیج اُوئے نا سلام کرو۔ ¹¹ ۱۱۔جکو کوئی ایَہڑے مِنکھ خاں واسطو راکھئی، او اُوئے رے بُرے کاماں میں بھیݪو ہووئی۔ ¹² ۱۲۔مھیں گھݨے باتاں تھاں نا لِکھݨے ہے اَن ہُوں او باتاں کاگݙ اَن مَخ خاں کونی لِکھݨ چاہوتو پݨ مھناں اُمید ہے کہ تھاں کَڈھے آ رو رُوبرُو بات کراں کہ اَپݨی خُوشی پُوری ہووے۔ ¹³ ۱۳۔تھان٘ری ٻہن را ٻاݪ جکاں نا اِیشوَر چُگ لِنا را یعنی مھے تھاں نا سلام کَہیں۔