¹ Uwizusye ukutontela kuwa katungulula nawa nsambu, ukuwatontela, pakuyipekania pamulimo wonsi uwuzima, ² mutavwanjila wumwi uwuwipe, mutakalawuka pakulwa, nukuwa awamyalale, ukulolesya uwuntu kwe wensi. ³ Amuno naswenye twatezile tuwa awawelewele nawantivwila. Twaponzile nukunyepwa nivikumbuchilwa ivipusane pusane nivyakusechelesya. Twikazile muwuwipe namuwuzuwa. Twalinji swe wakandamane nukupatana. ⁴ Kweni pano inkumbu zye Leza ekatula swinya nulukundo lwakwe ku wantu lwalolesile. ⁵ Chitalinji acha milimo yawulungamane yano twawonvile kweni uwila wakwe wuno watuzile sweswe, ukupitila mulupwizyo lwa kukwatwa ulupya nukuyaniaswi kwa muzimu umutele. ⁶ Wino Leza muwukankala wapungulizile pakwe sweswe ukupitila ekatula witu Yesu Kilisitu, ⁷ ukuti pano twalungamikwa ni nkumbu zyakwe, tuzipizile ukuwa awampyani pakuwa nuwusuwizi wawumi wamuyaya. ⁸ Lyo ilandwe alyakusimichila. Nkulonda wewe usimpisye pa vintu vyoo, ukuti wonsi wano wati wasuwila mwe Leza wazipizile wasayilile pakuyiwika mumilimo iyizima. Vyo ivintu avizima swinya avyakwavwa wiliwensi. ⁹ Kweni ufuntuke imipanzi imiwipe ninkwatwa ni mpokoto nukulwa ku vya masundo. Vyo ivintu nukulunduluka ni vyavye. ¹⁰ Mukanani wensi wino akulenjesya ukupawunkana mwakwe mwemwe, ala pano wamusochela lyonga pamwi kawili, ¹¹ pakumanya ukuti umuntu vino weyo ati apiluka ukufuma ku nzila inzima nga apo akuwembuka nukuyipanzya wenganye. ¹² Pano natuma Artimasi pamwi tayikikasi kwe mwemwe, pitisyani nukwiza kwenene pa Nikopoli, kuno nelenginie ukuwa kulyanie impindi yaminjililo. ¹³ Womba chino ungawomba pakuwatuma pamusinzo we Zenasi ekamanya wamasundo ne Apollos, ukuti watakusowelwa chimwi. ¹⁴ Awantu witu wazipizile wasambilile ukuyiwika wonga mumilimo iyizima yino yikuleta ivyakulondwa zuwazuwa, nga lelo watawa awantakoma. ¹⁵ Wonsinye wano wali nanene wawavwanzya. Vwanzyani wawo wano wakunzile sweswe mwi suwilo. Inkumbu ziwe namwe mwensi.