1 ଯିରୁଶାଲମରୁ କେତେକ ଫାରୁଶୀ ଓ ଶାସ୍ତ୍ରଜ୍ଞମାନେ ଯୀଶୁଙ୍କ ନିକଟକୁ ଆସି ପଚାରିଲେ, 2 ଆପଣଙ୍କ ଶିଷ୍ୟମାନେ କାହିଁକି ଆମ୍ଭମାନଙ୍କ ପୂର୍ବପୁରୁଷମାନଙ୍କ ପରମ୍ପରା ବିଧି ସବୁକୁ ଅମାନ୍ୟ କରୁଅଛନ୍ତି? କାରଣ ସେମାନେ ଭୋଜନ କରିବା ପୂର୍ବରୁ ଆମର ପ୍ରଥା ଅନୁସାରେ ହାତ ଧୋଇବା ନୀତିକୁ ମାନୁ ନାହାନ୍ତି! 3 ଯୀଶୁ ଉତ୍ତର ଦେଲେ, ମୁଁ ମଧ୍ୟ ଦେଖୁ ଅଛି ଯେ, ତୁମ୍ଭେମାନେ ମଧ୍ୟ ତୁମ୍ଭମାନଙ୍କ ପୂର୍ବପୁରୁଷମାନେ ତୁମ୍ଭମାନଙ୍କୁ କହିଥିବା ଆଜ୍ଞାଗୁଡିକୁ ପାଳନ ନ କରି କାହିଁକି ଈଶ୍ୱରଙ୍କ ସ୍ପଷ୍ଟ ଆଜ୍ଞାଗୁଡିକୁ ଅମାନ୍ୟ କରୁଅଛ? 4 ଈଶ୍ୱର ଦୁଇଟି ଆଜ୍ଞା ଦେଇଅଛନ୍ତି, ତୁମ୍ଭମାନଙ୍କ ପିତା ମାତାଙ୍କୁ ମାନ୍ୟ କର ଏବଂ ଯେ କେହି ଆପଣା ପିତା ମାତାଙ୍କୁ ନିନ୍ଦା କରେ, ସେ ନିଶ୍ଚୟ ମରିବ! 5 କିନ୍ତୁ ତୁମ୍ଭେମାନେ ଲୋକମାନଙ୍କୁ କହିଥାଅ, ତୁମ୍ଭର ପିତା ମାତା ଅଭାବଗ୍ରସ୍ତ ହେଲେ ହେଁ, ତୁମ୍ଭେ ସେମାନଙ୍କର ଭରଣପୋଷଣ ପାଇଁ ସେମାନଙ୍କୁ ଅର୍ଥ ନ ଦେଇ ଈଶ୍ୱରଙ୍କ ଉଦ୍ଦେଶ୍ୟରେ ତାହା ଦାନ କରି ପାର | 6 ଏହାଦ୍ୱାରା ତୁମ୍ଭେମାନେ ଭାବି ଥାଅ ଯେ, ତୁମ୍ଭମାନଙ୍କ ପିତା ମାତାଙ୍କୁ କିଛି ଦେବା ଆବଶ୍ୟକତା ନାହିଁ | ଏହିପରି କରି ତୁମ୍ଭେ ଈଶ୍ୱରଙ୍କ ଆଦେଶକୁ ଅମାନ୍ୟ କରୁଅଛ ଓ ତୁମ୍ଭେମାନେ ତୁମ୍ଭମାନଙ୍କ ପୂର୍ବପୁରୁଷମାନଙ୍କ ଦ୍ଵାରା ଉଚିତ ନିୟମ ଦ୍ୱାରା ତାହା ବ୍ୟର୍ଥ କରିଥାଅ | 7 ତୁମ୍ଭେମାନେ କେବଳ ଉତ୍ତମ ବ୍ୟକ୍ତି ହେବାର ବାହାନା ଦେଖାଇ ଥାଅ, ଏଣୁ ଯିଶାଇୟ ଭାବବାଦୀ ତୁମ୍ଭମାନଙ୍କ ପୂର୍ବପୁରୁଷମାନଙ୍କ ସମ୍ବନ୍ଧରେ ଯଥାର୍ଥ ଭବିଷ୍ୟତ ବାଣୀ କରିଥିଲେ | 8 ଏହି ଲୋକମାନେ ମୋତେ ଭକ୍ତି କରନ୍ତି ବୋଲି କହନ୍ତି, କିନ୍ତୁ ସେମାନଙ୍କ ହୃଦୟ ମୋ’ଠାରୁ ବହୁ ଦୂରରେ ଥାଏ | 9 ସେମାନଙ୍କର ଉପାସନା ଓ ଆରାଧନା ସମ୍ପୂର୍ଣ୍ଣ ବୃଥା | କାରଣ ସେମାନେ ଈଶ୍ୱର ଦତ୍ତ ନିୟମ ପରିବର୍ତ୍ତେ ମନୁଷ୍ୟ ରଚିତ ନିୟମର ଶିକ୍ଷା ଦେଇଥାନ୍ତି | 10 ତତ୍ପରେ ଯୀଶୁ ଲୋକମାନଙ୍କୁ ଆପଣାର ନିକଟକୁ ଡ଼ାକି କହିଲେ, ମୋର କଥା ଶୁଣ ଓ ବୁଝିବାକୁ ଚେଷ୍ଟା କର | 11 ଖାଦ୍ୟ ଖାଇବା ଦ୍ଵାରା ଜଣେ ଅପବିତ୍ର ହୁଏ ନାହିଁ, ମାତ୍ର ମନୁଷ୍ୟ ଭିତରକୁ ତାହାର କଥାବାର୍ତ୍ତା ଓ ଚିନ୍ତାଧାରା ହିଁ ତାହାକୁ ଅପବିତ୍ର କରେ | 12 କିଛି ସମୟ ପରେ ଶିଷ୍ୟମାନେ ଯୀଶୁଙ୍କ ନିକଟକୁ ଆସି କହିଲେ, ଆପଣଙ୍କ ଏହି କଥାରେ ଫାରୁଶୀମାନେ ଯେ ଆପଣଙ୍କ ଉପରେ ବିରକ୍ତି ହୋଇଅଛନ୍ତି, ଏହା କ’ଣ ଜାଣନ୍ତି? 13 ଏଥିରେ ଯୀଶୁ ସେମାନଙ୍କୁ ଏକ ଦୃଷ୍ଟାନ୍ତ କହିଲେ, ମୋର ସ୍ଵର୍ଗସ୍ଥ ପିତା ଯେଉଁ ସବୁ ବୃକ୍ଷ ରୋପଣ କରି ନାହାନ୍ତି, ସେସବୁ ବୃକ୍ଷକୁ ଉପାଡ଼ି ଦିଆଯିବ | 14 ଫାରୁଶୀମାନଙ୍କ ପ୍ରତି ଧ୍ୟାନ ଦିଅ ନାହିଁ! କାରଣ ସେମାନେ ଲୋକମାନଙ୍କୁ ଈଶ୍ୱରଙ୍କ ପ୍ରକୃତ ଆଜ୍ଞା ବିଷୟରେ ଶିଖାନ୍ତି ନାହିଁ | ଏମାନେ ନିଜେ ଅନ୍ଧ ହୋଇ ଅନ୍ଧ ମାନଙ୍କର ପଥ ପ୍ରଦର୍ଶକ ଅଟନ୍ତି, ଅନ୍ଧ ଯେବେ ଅନ୍ୟ ଅନ୍ଧକୁ ପଥ ଦେଖାଏ, ତେବେ ସେମାନେ ଉଭୟେ ଖାତରେ ପଢ଼ନ୍ତି | 15 ପିତର ଯୀଶୁଙ୍କୁ କହିଲେ, ନିୟମ ବିରୁଦ୍ଧରେ ଖାଦ୍ୟ ଖାଇଲେ, ଲୋକେ ଅପବିତ୍ର ହୁଅନ୍ତି ନାହିଁ, ଏହି କଥାର ଅର୍ଥ ଆମ୍ଭମାନଙ୍କୁ ବୁଝାଇ ଦିଅନ୍ତୁ | 16 ଯୀଶୁ ସେମାନଙ୍କୁ ଉତ୍ତର ଦେଲେ, ମୁଁ ତୁମ୍ଭମାନଙ୍କୁ ଯେଉଁ ଶିକ୍ଷା ଦେଉଅଛି, ତାହା ଯେ ତୁମ୍ଭେମାନେ ବୁଝି ପାରୁ ନାହଁ, ଏଥିରେ ମୁଁ ଚମତ୍କୃତ ଅଟେ | 17 ଯାହା ତୁମ୍ଭେ ଖାଅ, ତାହା ପାକସ୍ଥଳୀରେ ପ୍ରବେଶ କରି ପୁଣି ବାହାରି ଯାଏ, ଏହା କ’ଣ ଜାଣ ନାହିଁ | 18 ମାତ୍ର, ମନ୍ଦ କଥା ମନ୍ଦ ହୃଦୟରୁ ବାହାରେ, ଓ ଯେ କହେ, ତାହା ତାହାକୁ ହିଁ ଅପବିତ୍ର କରେ | 19 କାରଣ, କୁଚିନ୍ତା, ନରହତ୍ୟା, ବ୍ୟଭିଚାର, ବେଶ୍ୟା ଗମନ, ଚୋରି, ମିଥ୍ୟା କଥା ଓ ପରନିନ୍ଦା ହୃଦୟରୁ ବାହାରେ | 20 ଏହିସବୁ ହିଁ ମନୁଷ୍ୟକୁ ଅପବିତ୍ର କରେ, କିନ୍ତୁ ଭୋଜନ ପୂର୍ବରୁ ହାତ ଧୋଇବା ରୀତିନୀତି ପାଳନ ନ କରିବା ଦ୍ଵାରା ଆଧ୍ୟାତ୍ମିକ ଅପବିତ୍ରତା ହୁଏ ନାହିଁ | 21 ଏହାପରେ ଯୀଶୁ ଶିଷ୍ୟମାନଙ୍କ ସହିତ ଗାଲିଲୀ ଅଞ୍ଚଳ ପରିତ୍ୟାଗ କରି ସୋର ଓ ସୀଦୋନ ଅଞ୍ଚଳକୁ ଗଲେ | 22 ସେହି ଅଞ୍ଚଳରେ ବାସ କରୁଥିବା ଜଣେ କିଣାନୀୟା ସ୍ତ୍ରୀ ଯୀଶୁଙ୍କ ପାଖକୁ ଆସି ବିନତି ଅନୁରୋଧ କରି କହିଲା, ହେ ପ୍ରଭୁ, ରାଜା ଦାଉଦଙ୍କ ସନ୍ତାନ, ତୁମ୍ଭେ ହିଁ ଖ୍ରୀଷ୍ଟ ଅଟ | ମୋ’ପ୍ରତି ଓ ମୋର ଝିଅ ପ୍ରତି ଦୟା କରନ୍ତୁ | କାରଣ ମୋର ଝିଅକୁ ଏକ ଭୂତାତ୍ମା ସବୁବେଳେ ଅତ୍ୟନ୍ତ ଯନ୍ତ୍ରଣା ଦେଉଅଛି | 23 କିନ୍ତୁ ଯୀଶୁ ତାହାକୁ ପଦେ ହେଲେ ଉତ୍ତର ଦେଲେ ନାହିଁ ଦେଖି ତାହାଙ୍କ ଶିଷ୍ୟମାନେ ତାଙ୍କୁ ଅନୁରୋଧ କରି କହିଲେ, ଏହାକୁ ବିଦାୟ କରନ୍ତୁ, କାରଣ ସେ ଏପରି ବାରମ୍ବାର କରିବା ଦ୍ଵାରା ଆମ୍ଭମାନଙ୍କୁ ବିରକ୍ତି କରୁଅଛି | 24 ଏଥିରେ ଯୀଶୁ ସେହି ସ୍ତ୍ରୀ’କୁ କହିଲେ, ଈଶ୍ଵର ମୋତେ କେବଳ ଇସ୍ରାଏଲର ଲୋକମାନଙ୍କ ନିକଟକୁ ପଠାଇଛନ୍ତି, କାରଣ ସେମାନେ ହଜି ଯାଇଥିବା ମେଷ ତୂଲ୍ୟ ଅଟନ୍ତି | 25 କିନ୍ତୁ ସ୍ତ୍ରୀ’ଲୋକଟି ଯୀଶୁଙ୍କ ଅତି ନିକଟକୁ ଆସି ତାହାଙ୍କ ପାଦ ତଳେ ପଡି ଅନୁରୋଧ କରି କହିଲା, ପ୍ରଭୁ ମୋତେ ଦୟା କରନ୍ତୁ | 26 ଏଣୁ ସେ ତାହାକୁ କହିଲେ, ପିଲାମାନଙ୍କ ନିକଟରୁ ଖାଦ୍ୟ ନେଇ କୁକୁରମାନଙ୍କୁ ଦେବା ତ ଆଦୌ ଉଚିତ ନୁହେଁ | 27 ମାତ୍ର ସ୍ତ୍ରୀ’ଲୋକଟି ତାଙ୍କୁ ଉତ୍ତର ଦେଲା, ପ୍ରଭୁ ତୁମ୍ଭେ ଯାହା ଯାହା କହିଲ, ତାହା ସତ ଅଟେ, କିନ୍ତୁ ମାଲିକ ଆପଣା ମେଜରେ ବସି ଖାଉଥିବା ସମୟରେ ତଳେ ପଡୁଥିବା ଖାଦ୍ୟ ଖଣ୍ଡଗୁଡିକୁ ତ କୁକୁରମାନେ ଖାଆନ୍ତି | 28 ତହିଁରେ ଯୀଶୁ ତାହାକୁ କହିଲେ, ଗୋ ମହିଳା, ମୋ’ଠାରେ ତୁମ୍ଭର ବଡ ବିଶ୍ୱାସ | ତୁମ୍ଭର ଏହି ବିଶ୍ୱାସ ଅନୁସାରେ ମୁଁ ତୁମ୍ଭ ଝିଅକୁ ସୁସ୍ଥ କରୁଅଛି, ଆଉ ସେହିକ୍ଷଣି ତାହାର ଝିଅଟି ସୁସ୍ଥ ହେଲା | 29 ଏହାପରେ ଯୀଶୁ ଆପଣା ଶିଷ୍ୟମାନଙ୍କୁ ନେଇ ଗାଲିଲୀ ହ୍ରଦର ଆର ପାରିକୁ ଫେରି ଗଲେ ଏବଂ ନିକଟସ୍ଥ ଏକ ପାହାଡ଼କୁ ଯାଇ ସେଠାରେ ବସି ଲୋକମାନଙ୍କୁ ଶିକ୍ଷା ଦେବାକୁ ଲାଗିଲେ | 30 ଆଉ ଦୁଇ ଦିନ ପର୍ଯ୍ୟନ୍ତ ବହୁ ସଂଖ୍ୟକ ଲୋକ ଛୋଟା, ଅନ୍ଧ, ପଙ୍ଗୁ, ମୂକ ଓ ବିକଳାଙ୍ଗ ରୋଗୀମାନଙ୍କୁ ଯୀଶୁଙ୍କ ନିକଟକୁ ଆଣି ତାହାଙ୍କ ସମ୍ମୁଖରେ ସେମାନଙ୍କୁ ଶୁଆଇ ଦେଲେ, ତହିଁରେ ଯୀଶୁ ସେମାନଙ୍କୁ ସୁସ୍ଥ କଲେ | 31 ଯେଉଁମାନେ ପୂର୍ବେ ପଦେ ହେଲେ କଥା କହି ପାରୁ ନ ଥିଲେ, ସେମାନେ କଥା କହିବାକୁ ଲାଗିଲେ, ଏବଂ ଯେଉଁମାନଙ୍କର ହାତ ଓ ପାଦ ଚଳୁ ନ ଥିଲା, ସେମାନ ଚାଲିଲେ ଓ ଯେଉଁମାନେ ଅନ୍ଧ ଥିଲେ, ସେମାନେ ଦୃଷ୍ଟି ପାଇଲେ | ଏହା ଦେଖି ଲୋକମାନେ ଅତି ଆଶ୍ଚର୍ଯ୍ୟ ହେଲେ ଓ ଇସ୍ରାଏଲର ସ୍ଵର୍ଗସ୍ଥ ପରମେଶ୍ୱରଙ୍କ ସ୍ତୁତିଗାନ କରିବାକୁ ଲାଗିଲେ | 32 ଆଉ ଯୀଶୁ ଆପଣା ଶିଷ୍ୟମାନଙ୍କୁ ନିକଟକୁ ଡାକି କହିଲେ, ଏହି ଲୋକମାନଙ୍କ ପ୍ରତି ମୋର ଦୟା ଜାତ ହେଉଛି, କାରଣ ଏମାନେ ତିନିଦିନ ହେଲାଣି, ମୋ’ ସହିତ ଏଠାରେ ଅଛନ୍ତି ଏବଂ ଏମାନଙ୍କ ପାଖରେ ଆଉ କିଛି ଖାଦ୍ୟ ନାହିଁ, ଏମାନଙ୍କୁ ଭୋକ ଉପାସରେ ଘରକୁ ବିଦାୟ କରି ଦେବାକୁ ମୋର ଇଚ୍ଛା ହେଉ ନାହିଁ, କାରଣ ଏମାନେ ଘରକୁ ଯାଉ ଯାଉ ହୁଏତ ବାଟରେ ମୂର୍ଚ୍ଛା ଯିବେ | 33 ତହିଁରେ ଶିଷ୍ୟମାନେ କହିଲେ, ଏହି ନିର୍ଜନ ସ୍ଥାନରେ ଏତେ ଲୋକଙ୍କ ପାଇଁ ଖାଦ୍ୟ ଯୋଗାଇବା ଆମ୍ଭମାନଙ୍କ ପାଇଁ ଅସମ୍ଭବ | 34 ଯୀଶୁ ସେମାନଙ୍କୁ ପଚାରିଲେ, ତୁମ୍ଭମାନଙ୍କ ପାଖରେ କେତୋଟି ରୋଟୀ ଅଛି? ସେମାନ ତାହାଙ୍କୁ କହିଲେ, ଆମ୍ଭମାନଙ୍କ ପାଖରେ ସାତୋଟି ରୋଟୀ ଓ ସାନ ସାନ କେତୋଟି ମାଛ ଅଛି | 35 ଯୀଶୁ ଲୋକମାନଙ୍କୁ ଘାସ ଉପରେ ବସିବାକୁ ଆଦେଶ ଦେଲେ, 36 ଏବଂ ସେହି ସାତୋଟି ରୋଟୀ ଓ ଭଜା ମାଛଗୁଡିକୁ ହାତରେ ଧରି ଈଶ୍ୱରଙ୍କୁ ଧନ୍ୟବାଦ ଦେଇ ସେଗୁଡିକୁ ଖଣ୍ଡ ଖଣ୍ଡ କରି ଶିଷ୍ୟମାନଙ୍କୁ ଦିଅନ୍ତେ, ସେମାନେ ତାହା ନେଇ ଲୋକମାନଙ୍କ ମଧ୍ୟରେ ବାଣ୍ଟି ଦେଲେ, 37 କାରଣ ଯୀଶୁ ସେହି ଖାଦ୍ୟକୁ ନେଇ ଆଶ୍ଚର୍ଯ୍ୟ ଭାବେ ବହୁ ଗୁଣିତ କଲେ, ଆଉ ଲୋକମାନେ ତୃପ୍ତ ହେବା ପର୍ଯ୍ୟନ୍ତ ତାହା ଖାଇଲା ପରେ ଶିଷ୍ୟମାନେ ବଳକା ଭଙ୍ଗା ଖଣ୍ଡ ଗୁଡିକୁ ଏକାଠି କରି ସେମାନଙ୍କ ପାଖରେ ଥିବା ବଡ ବଡ ଟୋକେଇରେ ତାହା ପୂର୍ଣ୍ଣ କଲେ | 38 ସେଠାରେ ସ୍ତ୍ରୀ ଓ ପିଲାମାନଙ୍କ ବ୍ୟତୀତ ପ୍ରାୟ ଚାରି ହଜାର ପୁରୁଷ ଖାଇଲେ | 39 ତହିଁରେ ଯୀଶୁ ଲୋକମାନଙ୍କୁ ସେମାନଙ୍କ ଘରକୁ ବିଦାୟ କରି ନିଜେ ଶିଷ୍ୟ ମାନଙ୍କ ସହିତ ନୌକାରେ ବସି ମଗ୍ଦାନ ଅଞ୍ଚଳକୁ ଗଲେ |