¹ Cware enwe, ka mufwite mu bubbi bwenu ne zibbi. ² Kaili mwezi okutiye nimwa yenda lyonke kokuya ke nako yelinu fasi. Ka muyenda ko kuya ko muyendesi wa manta o kubusa ko ruho. Owu ngo muzya wakwe ozyo a tendera ku mwana ka kuteki. ³ Twenshe katwina lyonke mukati kabo ka bazumini. Twenshe katu zana kokuya ko bubbi bwe ntakazo zo mubili wetu. Katu tenda ezo wu shaka o mubili ne ngazyaro. Katuli bana ba bulyo bo bukali mbwee mbamunya. ⁴ Kono Nyambe ena e nshe ka zimani kebaka lye rato enene elyo na tushakisa. ⁵ Aho katu fwite mu bubbi, na tureta ku buharo buya twenshe kwa Kiresite. Nitwa hazwa ke chishemo. ⁶ Nyambe na tunanuna hantu honke no ku tu kalika hantu honke mu zibaka ze wiru kwa Kiresite Jeso. ⁷ Na tenda zabulyena okuteye mwi nako yi kezya nawore ku tusunda o bunene bwe chishemo chakwe. A tusunda za bulyena mu mukwa we chishemo kwa Kiresite Jeso. ⁸ Ke baka lye chishemo nimwa hazwa mu ntumero, mi hape ezi kali kazizwa kwenu, nchihewa cha Nyambe. ⁹ Kazi zwi mu mitendo cware no kubure ozyo awora ku litunta. ¹⁰ Kakuli tuli batendi ba Nyambe, tu tenderwa kwa Kiresite Jeso okutiye tutende zintu zirotu ezo ka turukisezere kare Nyambe, ye netu wore kuyenda mwazo. ¹¹ Kabulyaho mu azyare kute ye heba kamuli bashi Zishi mu nyama lyonke. Mu kuiwa "kushaya ku mukanda" kokuya kecho chi kuiwa mukanda mu nyama oko nikwa tendiwa ka maanja o buntu. ¹² Mwa yina e nako kamu bbatulitwa kwa Kiresite. Kamuli bezyira ku bantu ba Isiraere. Kamuli basazi ku chilikani che nsepiso. Kali kamu kwesi mazyimo kuamana niza kubuso. Kali kamu kwesi Nyambe mwi fasi. ¹³ Kono hanu kwa Kiresite Jeso enwe kamwina kure kure kuzwa kwa Nyambe nimwa retwa hafwihi ne Nyambe ka maroha a Kiresite. ¹⁴ Kakuli eye nje mpore yetu. Na tenda bobire kuba e chintu chonke. Ko mubili wakwe na xdapurura e mota lyo kubbatuka elyo kali tu bbatwire, e chitoyo. ¹⁵ Ezo, na manisa o murawo okutiye a tende o muntu muya kwakwe. Na tenda e mpore. ¹⁶ Na tenda za bulyena o kushanganya bonshe bantu mu mubili wonke kwa Nyambe munjira ye chifapano. Ke chifapano na manisa e chitoyo. ¹⁷ Jeso nakezya noka kuamba e mpore kwenu kamwina o kure waha ne mpore kwabena kabena hafwihi. ¹⁸ Ka Jeso tukwesi enjira yokuya kwe shwetu mu Ruho. ¹⁹ Cware he, hanu enwe bashi Zishi kamu shili basazi na bezyira. Kono shemuli bantu ba zyakite nabo ba bikirwa ku mbali ba Nyambe na bantu ba munjuo ya Nyambe. ²⁰ Nimwa zyakwa ha zanda za Baapositora na Baporofita. Jeso Kiresite yemwini kali cwe ligorete lyamu matefukero. ²¹ Kwakwe o muzyako wonshe wu shangenywe noku kura mbwe tempere ku Nfumu. ²² Nkwakwe nimwa zyakwa hantu honke nenwe mu chibaka cha makaro a Nyambe mu Ruho.