¹ Bol go Timoti, natamol uesues ne Kristo Yesu, ratok mtir pak natamol tap lap ne Atua nag rutok Filibae, skot te nag rupi telekor go te nag rupi tikon rumaui. ² Nasauian go ntmat nag itok Atua Apap negakit go Naot Yesu kristo mai kefi te nigamus. ³ A psaui ki Atua sermal nen a mroperkat amus, ⁴ senrak, seluan a nigamus kunom tafesfes preg natafesfesan nagneu skot nasemsemuen ⁵ nlaken teflan akam ku uesues skot kineu emrom nanrognrogon ui uan naliati pei perkati pamau maes nen. ⁶ Atae perkat tenen, nag nega nag ipei preg nauesien ui emaloput nigamus kefo tok pregi sermal panpan kefo preg silua pan tkal naliati nig Yesu Kristo. ⁷ Ilen nen kin kineu kafo mro teplan toklos mus kunom nlaken api atlak mus napok. Akam ku nomser skot kineu nasauian ipi tkaskei seluan atok namotien go seluan a tulen nen ka kor go ka kraksoksok nanrognrogon ui uan. ⁸ Apes tilimori nrae Atua, kineu amro ki mus itop skot nanromien ne Yesu Kristo. ⁹ Teuan kin nalotuen nagneu iteflan: nag nanromien nig amus ke nrus top go ke top go ke fiatlak ntaaen go namrotaaen top ¹⁰ teuan kin kofo tae trok nafte nag iui mesmes go teuan kin kofo tae pi lesok go kofo len tok reki naliati ne Kristo, ¹¹ nag nalenan nag imai totur Yesu Kristo kefi atlak nuan ke top nen kin Atua kefi atlak nanrernreruen go nasmanien wes. ¹² Malfanen amurin nen komaui tae nafet paluk ui nag nafte nag ipakor ki au, iprengi nag nanrognrogon ui uan itae nrus pan. ¹³ Teuan kin namotien nagneu emrom Yesu imai tok enali go telap nag rutok emrom praetorium rumaui tae go imer pi tkaskei ki telap nakon. ¹⁴ Ipiatlak paluk lap nang rutae lasok emrom Yesu nlaken kineu atok namotien, te wan kin rumro kasu nag ruk fes tilsei nafsan. ¹⁵ Tete nat ru termau tilsei Yesu skot pop sa go namaeto me tete nakon ru prengi skot pop ui. ¹⁶ Tete nag ru tilsei skot pop ui rumer prengi skot nanromien, nlaken ru tae nag kineu atok esan reki nen kin api kor ne nanrognrog wi. ¹⁷ Me tepei ru tilsei Kristo skot nametmakuran, go ru tu tislei skot natilmorian mau. Teuan ru mro kin nen ruk freg kineu ka mroput seluan atok namotien esan. ¹⁸ Tukfo tili ke tfale? Teuan mas tu murin nen kin ifuel ru pregi skot pop sa ko skot pop ui - me ruk tilsei Kristo, go teuan kineu kafo semsem as - ore, go kineu kafo semsem, ¹⁹ nlaken a tae nag nafte nen kefo pakor ipi namutien nagneu totur natafesfesan nigamus go naueluan nig naten nig Yesu Kristo. ²⁰ Ipi nafte kineu atok mro kasua kin kai tok lo rakin nag kafo kano malier, me kafo lasok malfanen taos senrak, go rukfo suman Kristo kefak elang totur namolik, if pi namolien go numaten. ²¹ Nlaken namolien nigneu ipi Kristo, go numaten kefla mai atae kafo mol. ²² Me ifuel afla mol ki namolik nen, teuan kin kafo lek nua nauesien nag a pregi. Me malnes, a nronror nafte kafo murin. ²³ Nlaken namroan nigneu itu lasok malnes mau me atok emaloput namroan nranru. Namurien nigneu ipi tenen ka tumalu kai pan skot Kristo, teuan imer ui top ²⁴ me ifuel aftok namolik nen tok, kefo mer ui ki mus. ²⁵ Tenmatun iskei a tae soksokin, a tae nag kafo tok po mer skot mus ku nom reki naftomuen go nasemseman nig amus emrom naseralesokon, ²⁶ teuan kin totur namolien nigneu akam kofo piatlak namroan ui lap nen kofo tae pes pak elang emrom Yesu Kristo seluan kamer ler mai lek mus. ²⁷ Teuan mas nasiueran go nafolfolon nig amus ke fekfek ki sup nag ilen ki nanrognrogon ui ne Kristo, reki nen kin seluan amai lek mus ko aftu mai mau, me kafo tae nrogo nag akam ku nomser tulen kerkerai naten iskei, skot namroan iskei, pol kerkerai naor iskei reki naseralesokon nig nanrognrogon ui. ²⁸ Go tu preg te nmatun ke freg mus ko mtak ki te nag rupi wal potae ki mus mau, nlaken nalasokuen nig amus ipi nafeifeien ne nunaten negar, go namutien nig amus - go tenen itok Atua mai. ²⁹ Nlaken ipi naftuan melmel mai pak mus nalo Kristo, itu pi nen kin ko seralesokos mas mau me nag ko nega nrogtesa nalo nagien, ³⁰ ko fiatlak nanrogtesan pi tkaskei nag ku leka itok kineu go malfanen ku nrogo nag itok kineu.