Bikoro 4

Unu buri maa mansa Yeso

1 Ba bibe bi han in Yeso anija, barki unu uburi ma mansa me. 2 Sa daki ma re imum yare tiye akuri Anazi niye nan uwui ikomo i meki me. 3 Unu mansa ugino ma eh ma gun me, "Inki hu vana Asere mani, kurzo apo age me a cukuno imum yare." 4 Yeso ma kabirka ma gu, a nyettike uguna, daki in bisana bini cas unu ma di vengize ba, senke in tize sa ti suso ahira Asere.'" 5 Ba unu uburi ma han me a nipin ni lau, ma tari me abitenteri me, 6 magun me, inki hu vana Asere mani, hinna adizi. Barki a nyittike agi, 'Ma di gu ibe i kadura ka me i benki we wa kuri wa kpatika we, Barki kati upilliko anipo."' 7 Yeso ma gun me, "A nyettike, uda mansa Ugomo Asere awe ba. 8 Unu buri ma kuri ma han me anire nipo nijongoron ma bezi me adodu unee ariri. 9 Ma gun me "Inki wa rizom adizi wa nonzom indi nya we." 10 Yeso magun me, "Dusa abame, unu uburi! A buki idi nonzo Ugomo Asere mani, barki me mani cas udi rizi adizi u nonzo me.

11 A' anime unu buri ma duku ceki me, abini me ibe ikadura ka Asere i eh i nonzo me.
Yeso maa tubi katuma kame me u Galili

12 Sa Yeso ma kunna a korso Yuhana, ma hiri uhana u Galili. 13 Ma ceki u Nazarat, ma kuri u hana u kafarnahum upuru uraba udang u Galili, ubinani u manyanga mu zabalina nan Naftali. 14 Igino me yaa cukuno barki a myincikina ubuka u Ishaya.
15 Manyanga mu zabaluna nan u Naftali, nan u Baha, nan uhuru uraba u Urdu, a manyanga mu Galili anu zati urusa utize ta Asere.
16 Anu ciki umareu wa iri masaa ma dang, nan anu ciki anikira niwono, masaa maa wati we."

17 Usuro uganiya ugino me, Yeso ma tubi tize, inu gusa, kaba ni tize ta Asere barki tigomo ta Asere ta aye mamu."
Yeso maa titi anu a mahurba wanazi

18 Maa haki urabi uraba udang u Galili, ma iri anu henu ware, saminu sa atisa me Bitrus, nan uhenu me Andrawus wa zi in mahurba uraba udang barki we anu mensi icere wani. 19 Yeso ma gun we, "Tarsani mi, indi kurzo shi anu mahurba ma anu." 20 Wa dusa wa ceki itaru me wa tarsi me. 21 Sa ma re aje, ma iri aye ana ware cangi anu henu wani, yakubu vana u Zabadi, nan uhenu me Yuhana, anyimo u zirgi nan kaco uwe Zabadi inu bara ikali iwe, ma titi we. 22 Ahira me wa ceki uzirgi nan kaco me, wa tarsi me.
Yeso maa benki anu gbardang

23 Ba ma kase a manyanga mu Galili, inu dungara anu ati denge ti utarsa Asere awe me, inu kisa u tize ti ugomo Asere, nan kuri uhumza in anu a tikoni nan anu zati u nihuma anyimo anu. 24 Abanga ame me a kati vat anyimo amanyanga mu Suriya. A ehzi me in anu zati u nihuma, anu ijas in tikoni sassas. Nan anu zito, nan anu agbergene nan anu a matirizi, nan anu wijo utikira ti nipum ma humzan we. 25 Ni ori ni anu gbardang wa tarsi me usuro u Galili, Dikafolis, u Urshalima nan manyanga mu Yahudiya, wan u kafa urabà udang u Urdu me.