Bikoro 28
Uhira u Yeso icau
1
Unu wunjoro uwui wa Asabar uribe uwui utuba anyimo usati, Maryamu Magadaliya nan ure Maryamu, wa eh barki wa gunkuno icau.
2
Abini me, uzuruko adizi udangdang uhiri, bibe bi ka dura ka Asere bi tu, usuro azesere, bi dusa bi tuburko nipo me bi cukuno ni.
3
Uzina ume me wa zi kasi u melke azesere, turunga tume me ta zi tirum pau.
4
Anu bee icau wa dusa wa kunna biyau. Wa rizi gusi mukizi.
5
Bibe bi kadura ka Asere ma buki aneh me tize ma gun we, "Kati i kunna biyau ba, in rusa i zin nu nyara u Yeso sa agankirka me.
6
Ma da rani ba, ma hira, kasi ubuka ume me. Aye iri ni ahira me sa a nati me ni.
7
Hana ni dibe dibe i buki anu tarsa ume me, 'Ma hira usuro iwono. Ira ni, ma dusa aje ashi me u hana u Galili. Abini me ani idika ira me ni, mi ma buka shi."
8
Aneh me wa ceki icau me dibedibe in biyau nan iriba irum, wa sumi uka buka anu tarsa ume me.
9
Abini me Yeso sa ma gurna nan we ma gu, "Tononzo ushi!" Wa dusa wa eh wa gbindirko tibuna tume me. Wa wuzi ninonzo.
10
Ba Yeso ma gun we, "Kati i kunna biyau ba, ka buka ni anu henu um wa ha u Galili, abini me ani wa di irum ni."
Ugamirka anu ubee icau
11
Uganiya sa aneh me wa zin tanu, abini me, anu nyariga me wa ribe a nipin wa buki Ugomo wa piristi imum me sa yaa haki.
12
Sa a piristi wa gurna nan ananu, wa gamirka tize, wa nya anu nikara nikono i kirfi gbardang.
13
Wa gun we, "Buka ni ukasu anu manza u Yeso' wa eh in niye wa cuzi nipum nume me uganiya sa taa zin moro.'
14
Inki kadura ka geme ka biki ahira u Gumna, ti di rigiza me ti hunguko iriba i me a ti buri shi anyimo a ma'aye."
15
Ba ana nikara ni nikono me wa kabi ikirfi me, wa wuzi imum be sa abuka we. Tize tige me ta samirka pash a Mayahudawa uhana u aye kani me.
Kadura ka Yeso ahira anu kirau in unu inde
16
A nime anu manza ume me ukirau in unu inde wagino me wa dusa uhana u Galili, a nipana me sa Yeso ma buki we.
17
Sa wa iri me, wa wuzi me ninonzo aye a nyimo awe me wazin unu harsa iriba.
18
Yeso ma eh ma kem we ma buki tize ma gu, "A nyam tigomo ti asere nan ti unee vat.
19
Barki ani me hana ni anyimo unee ika nyara anu manza tize ta Asere i zorzo we anyimo niza ni acoo, ni vana, nan bibe bilau.
20
Dungara ni we wa tarsi vat imum be sa ma wunna shi, ira ni, inzi nigo nan shi, uhana umara unee."