27

¹ ጋእ ይርወዳ ኧካሀን አለቃይ ኧገኝ ባሪቅ እንእ ኢኢየሱስ ያቲኢቲሪ ብእማታ ተስማሞኦም ። ² ቀጥወ ኢኢየሱስ አኮጁምታ ኧይሁዳ ገኘ ዳኝ ኣጽላጦሲ አዎኦምታ አኢይፖሪ ።

³ ኢኢየሱስ አዎኦምታ አአይፐረን ይሁዳ በኢየሱስ ኧፎጅኮኸ በሃረጋ ተውዘከቨ ኢየሱስ አሲየወ ሳሳ ደረእ ብር ኧካሃናት አለቃ ኧገኝ ባሪቅ ዋኸ ቲይር ዠፐረኖም ⁴ «አት ኢፋድ ኤኖወ ጥርር ሰቭ ኧውንድ አኢይፐርሁኒ አአፋሁ» ባረኖም። ሁኖዋ ጭን «ኢና ምር አገፓንረ ገግማኸ ተጠረቁወ» ባሪይ ። ⁵ ይሁዳቭ ደረእ ሳሳ ብር ኧቤተ መቅደስ ከስ ቃሽን ወረታ ገግሞኋ ተሰኧረ ሞደ ። ⁶ አለቃቭ ዋጋ ሁዳ ኖሾይታ «ዋ ብር ኧደቭ ዋጋ ኣኸሬ ተቤተ መቅደስ መባ እማቲ ንራእርነይ አይትቨቃካናአር» ቧርም ። ⁷ ሁንም አትዋቾምታ ኧቫዘራ ሞጎማ ኤኤዲ ኢኸረኸ ሰህራ ያረሽካ ምሲ አፈር ሥራውኮ ። ⁸ ብእም ኧቫአ ሃ አፈር ዋአካ ስን ኧደቭ አፈር ቧርሙ ኢሆይ ። ⁹ ብእም ኧቫአ «እእስራኤለ ሰብ ኧሁዳ ዋጋ ኢኸረኸ ኧዋጪ መጥ ሳሳ ደረእ ብር ጠቦጩም ወርሙ ። ¹⁰ ጎይታ ኤኤዘዘመኸ ሰህራ ያረሽካ ምሲ አፈር ስራኮ» ቲዩሪ በነቢ ኤርሚያስ ኤኤጂ ትንቢት በህም ግዚየ ኧረቭ ።

¹¹ በህም ግዚየ ኢየሱስቭ ኧዳኝ ጲላጦሲ ኢፍቲ በቴኤነቭጋ ዳኘ ሁዳ «አኸ ኧይሁዳ ሰቭ ንጉስንኸዌ?» ባረታ ተሳአረን ። ኢየሱስቭ «ኧቫኸንመኸ» ቲይር ዠፐረነ ። ¹² ቢኸር ጭን ኧካሃን አላቃ ኧገን ባሪቅ ኢኢየሱስ ቲኮሺሺዳ አትቭ መልስ አናቨኖታ ። ¹³ በህም ግዚየ ዳኘ ጲላጦስ «ምራህር ሄቶ አቴኤኖምታ ኢኮሽሽኮኸ አስቫአካዌ?» ባረን ። ¹⁴ ኢየሱስ ጭን ዳኘ ሁዳ ኖኦራ ወግ ቲኸርወ ስን አታአር አንዠፐረነዳ ። ¹⁵ ኧገኝቭ ዳኛሁዳ በኽርቭ ኽርቭ በአይሁድ ኧፋሲካ ሙራ ቀረ ኧገኝ ሰቭ ኧሸፐተን አት ኧታአከደ ሰብ ተወህኔ ፈታ በጉፉርት አርዎሸኖዋአር ባንደ ። ¹⁶ በህም ግዚየ «በርባን» ይሪዳአር በገኝኋ ኧትሄረ አደሮገ በወህኔ ኧታአከደምስ ባነደ ። ¹⁷ እመኸ ኧኸሬ ሰቭ በደሞጅኮ ኤኤዲ ዳኝቭ ጲላጦስ «ማን ኧፈዳኖሁዋይ ቲሲኢዋ? ባርባን ወይ ክርስቶስ ዩሪዳ ኢየሱስ?» ቲይር ተባአረኖም ። ¹⁸ ጲላጦስ እመዳ ኧቫረ በኢየሱስ በቅናድ አዎኦም አአይፖሪኸ ኢኸሪ ኧረፐረዴ ። ¹⁹ ጲላጦስቭ ኢፈርዲ በዙፋንኋ በቸናኤዲ ሚሽትሞኋ «በሁዳ ኧቫአ ምሳአረ በኧዳር በቨርዛዝ ኖኦራአር አጨነቀናይ ኧኸሬ በዋ አት ባጢር ባኔፐ ምስ አት ዘንጋ እኔፐኸወ» ባረቸንታ ኬሼቸወ ባንደ ። ²⁰ በህም ግዚየ ኧካሃን አለቃ ኧገኝ ባሪቅ ሁኖዋ ጭን «ባርባን ግፍንረ ኢየሱስ ኡትሪ» ቧርምታ ኧጲላጦስ ኢሶኦሪዀዓስብ ሁኖዋ ይኢፖፕሪዮዋ ²¹ ጲላጦስ ዠፐረታ ተውሬትሁኖዋ ኧተሁኖዋ ኧገፍነሁዋይ ቲሲኢዋ?» ባረኖም ። ሁኖም «ባርባን ግፍንረ ቧርሙ ። ²² ጲላጦስ «ክርስቶስ ዩሪዳ ኢየሱስ ሁዳ ማሀ ነናነሁዋ?» ባረኖም ። እንሞሁኖዋ «ኧሱኡሪ» ቧርም ። ²³ ኧቭር ምር ሙጥጣአር ኤፐ?» ተሳአረኖም ሁኖዋ ጭን «ኧሱኡሪ» ቲዩርዋ አደቦሹም አሆኖም ። ²⁴ እመኸ ኧኸሬ ጲላጦስ ዋ ዘንጋ መራክስ ኢረሳይ ባሃሬ አት ዘንጋ አይረሁኮኸ ባሸ ግዚየ እሀ አቫአታ ተዋ አት ባጢር ታኔፐ ምስ ደቭ ኢያ ጥርርንሁ ፥አሁዋ ጭን ኧሳረናሁዋአር ኦኖዋ» ቲይር በስቭ ሁኖዋ ኢፍቲ ኧጅኋ ታኧቨ ። ²⁵ ሰቭሁኖዋ እንእ «በሁዳ ኧቫአ ኢቫአካ ደቭኋ ቢናይ በዴጋመንራ ኧህር ቧርሙ ። ²⁶ በህም ግዚየ ጲላጦስ በርባን ገፈረኖም ። ኢኢየሱስ ጭን ባትጌፈረን ቀጥወ ኢሶኡሪ አዋአ አአይፐረንፕም።

²⁷ በህም ግዚየ ኧጲላጦስ ወታደር ኢኢየሱስ ኧዳኘ ጲላጦሲ ወረጀ ባጎፔጋ ወታደር ሁኖዋ እንእ ኢኢየሱስ ሄቤበዊ ። ²⁸ ውጅርሞኋ ሞንጩምታ ብሻ ሁጅር አሆተሪ ። ²⁹ ኧሶህ ዘውድ ጌኬነታ በጉነርኋ ሆኖነ በቀነ ኧጅኋ ኧሸቦቆ አአር አጠቦጪ ቢኢፍትሞኋይ ሱጁት ወኮም «ኧአይሁድ ንጉስ ወጌምት አኸ ኧህር» ቲዩርዋ አኬሽኮ ። ³⁰ ኢባቀመሁኖዋ ኢትፍ ዩኮ ባንደ ፤በኧጅሞኋ አጠቦጪ ኧሸቦቆ አአር ወሰጅኮታ ጉነርኋ ደኖጊ ። ³¹ ታኬሽኮ ቀጥወ ብሻ ሁጅርኋ ሞንጩም ቦቾይታ ኧገግኋይ ሁጅርኋ አሆተሪታ ፥ኢሶኡሪ ወስጂ ።

³² ተዳኝ ሁዳይ ቶኡር ሠቻጋድ ቲዎኦዋታ ስሞኦን ዩሪዳ ኧቀሬና ገኘ ምስ ነኮምታ ኢየሱስ ኢሰኡርኮዳ መስቀል በግርድ አፌኖጊ ³³ ተህም ቀጥወ «ቀራኒዮ» ወይ «ኧጉነር አእቭ» ዩሪዳ ኤኤዲ ጎሎጎልታ ሰኖም ። ³⁴ በህሜ ተአሞት እራኦሪ ወይን ኢሰጪ ኢኢየሱስ አዊ፤ ሁድቭ በቀመሰንጋ ኢሰጪ አንሴኧዳ ። ³⁵ ኢየሱስ በሶኦሪ ቀጥወ ሁጅርኋ ኧርጥ አቶኮታ ተሻኮጂ ። ³⁶ በህመኸ ቾኖምታ ይኢዮይ ባንደ ። ³⁷ «ዋዳ ኧአይሁድ ንጉስ ኢየሱስን» ይካ ጡፍ በጉነርኋይ አጥረጠሪ ባደ ። ³⁸ በህም ግዚየ ውሬት ሽፍጣ አት ሁዳ በቀነ አጋድ አት ሁዳ በጉራ አጋድ ተኢየሱስ እማትሜ ሶኦሪዮም ባንደ ። ³⁹ በህም መያ ያርዋ ኧረፖርዋ ሰቭ ቡሼኤኸ ቲያትቃኑም ጉነርሁኖዋ ቲያቁረቁርዋ ፥ ⁴⁰ «ቤተመቅደስ ባሪተሁ በሶኦስት ቀረ አረሽኩዴ ኧቫኸ እንዴ ዋአካ ገጋኸ አትርፍ ፤ ኧጎይታ ትከ በኸርኸ እንዴ ተሰኧርኸወ መስቀል ውረድ» በዋርት ያኬሽኮ ባንደ ። ⁴¹ ኧመኸቭ ኧካሃን አላቃ ኧሙሴም ኧቂጫ አስተማሪ ተገኘ ባሪቅ እማትሜ ዋኸ ቲዩርዋ ያኬሽኮ ባንደ ። ⁴² ኤኛሁኖዋ አተነፍኸ ፤ አካ ገግኋ እናተነፍኸ ባንደ? ፥ ሁዳ እእስራኤል በኸረ በኸረ እንዴ ዋአካ ተዋ ተሰኧረወ መስቀል ኧረድ ኢናቭ በሁዳ ነኧቨነሴ ። ⁴³ ሁዳቭ በጎይታ ታአመረታ [ኧጎይታ ትከንሁ} ባረ፤ጎይታ በረመደን እንዴ ዋአካ አትርፍኩ» ቧርሙ ። ⁴⁴ እመኸ ተሁዳ እማትሜ ኧሰኦሪዮዋ ሽፍጣ ዋኸ ቧርሙ ይቆርዊ ባንደ ።

⁴⁵ ተግት ዋአና ቀነሰ ዢኧ ሰዓት ስን በአፈር እንእ ጠነቫ ወንደ ። ⁴⁶ ዢኧ ሳዓት ቲኸርካ ኢየሱስ «ኤሎሄ ኤሎሄ ላማ ሰበቅታኒ?» ባረታ ቃርኋ ነሳ አኸና ፤እመኸ ኧዋርት «ጎይታኞ ጎይታኞ ኧቭር ቼኤኸይ?» ኧዋርትን ። ⁴⁷ በህመኸ ተሸኮዋ ሰቭ አታትሁኖዋ ቃርኋ ሰሞምታ «ዋ ምስ ኤኤሊያስ ኢኸራ» ቧርሙ ። ⁴⁸ በህም ግዚየ ተሁኖም አት ሁዳ ስፍንግ አቫአታ አንቆይ ኧቫራአር ሜናወታ በሸንቦቆ ነሳ ኢኢየሱስ ኢሰጪ አቴኤነበነ ። ⁴⁹ ኤኛሁኖዋ «ኧኩሽዋ እንዴ ኤሊያስ ሜኤተ ያተርፍኮኸ ነዥኝ» ቧርሙ ። ⁵⁰ ኢየሱስ ኧውሬትኝ ቃርኋ ነሳ አኸናታ ሉሁዮኋ አአዋአ አአይፐረ ። ⁵¹ በህም ግዚየ ኧቤተ መቅደስ መዘኔድ ተፎሬ ቀነሰ ኧገዳኒነ ተዠኧረ ውሬቲ ተሻከደ ፤አፈር ቅረቀረታ እቭር ተዠኧረ ። ⁵² ሞጎማ ተከፈደታ ሞጁም ኧረፖርዋ ኖኦራ ቅዱሳን ሰቭ ተረሾም ። ⁵³ ተወገማ በዎኦዋጋ ኢየሱስ ተውንድ በትረሳ ቀጥወ ቅዱስ ከተማ ኢየሩሳአሌም ጎፖምታ በህሜ ኖኦራ ሰቭ አሸኖም ። ⁵⁴ ኧመቶ አለቃ ተሁድ እማትሜ ኢኢየሱሲ ኢሲኢዋ ኧረፖርዋ ወታደር ኧአፈር ኧቆርቁርት ኤኛአር ባሸዋ ቀጥወ ቡሼኤኸ ፌኞምታ «እሸዳሽ ኧወረ ኧጎይታ ትከ ባንደ» ቧርሙ ። ⁵⁵ በኖኢ ኸራምታ ያዣታ ኖኦራ ኢስቻ በህመኸ ባናተ ፤ ህናም ተገሊላ ገኘ ቀነሻም ኢኢየሱስ ቲያጌክራይ ኢትኼተራይ ኧረፐራታናአር ። ⁵⁶ ተህናም ግት ኧመግደላ ማሬያም ኧያቆብሜ ኧዮሴፍሜ አዶድ ማሪያም ኧዘብዲዮስ ዴጋሜ አዶድቭ ባናተ ።

⁵⁷ ቲቨሽካ ኧአርማቲያስ ዮሴፍ ዩሪዳ ደንገኝ ምስ ተአርማቲያስ ገኘ ማአ ፤ ሁድቭ ኢኢየሱስ ተማሪ ባንደ ። ⁵⁸ ሁዳቭ ኧጲላጥሲ ማአታ ኢኢየሱሲ ኒሳ አቬ ባረታ ተሳአረን ፤ ጲላጦስቭ ይዊኸ ኧኤዘዘ ። ⁵⁹ እመኸ ኧኸሬ ዮሴፍቭ ኒሳ ሁዳ አወንደታ በወያ ከፈና ከፈነን ። ⁶⁰ ኧገግኋ ተኑእየ እቭር ፍረፈታ ታወናን ወያ ሞገማ ሞኬንታ ተህም ቀጥወ ኑህእ እቭር አክቭነረ ሞገማ ሁዳ ኤፈንታ ወረ ። ⁶¹ ኧመግደላ ማሪያምቪ ሶማመሻ ማሪያም በህም ሞገማ ኢፍትኢፍት ቸናም ባንደ ።

⁶² በጅማት ምረገኝ ቅጣት ሰንበት ኧካሃን አላቃ ኧፈሪሳ ሰቭ ኧዳኝ ጲላጦሲ ተደሞጁም ሞኦምታ ፤ ⁶³ «ጌታንሮ ዋ አታላይ ኢየሱስ በአያሞኋ ታነ <በዎድሁ በሶኦስት ቀረ ቀጥወ ኧትረሳኬ> ኧቫረኸ ቀለብ ባረን ። ⁶⁴ እመኸ ኧኸሬ ተማሪሞኋ ሆይተዋ አይሰኡዋኸ ኧሰብ <ተውንድ ተረሳ> ባይተዋ አይርዋኸ ኦካ ሞጎሟኋ ሶኦስት ቀረስን ይኢዮየኸ ሰቭ ኧዝዝ ሃ በኸረ ኧዋአካ ኧድዋወርትንራ ቲኢፍት ሁዳ ኧድዋወርትንራ ኢቨኧስኬ ። ⁶⁵ ጲላጦስቨ «አኪያ ይኢዮታ ሰብ አነውነኩዋ ሆርሙታ ቢቲሂሪዳ ኧኋርት ሞጎሟኋ ይኢዮሮዋኸ ኦኖዋ» ባረኖም ። ⁶⁶ ሁኖም ዎሩምታ እቭር ሁዳ በማተም አቶምኮታ ሞጎሟኋ በወታደር አትኢራዊ ።