22

¹ ኢየሱስ ዠፐረታ በሟሟካ ዋኸ ባረ ኤኤደኖም ፤ ² «ኧጎይታ መንግስት ኧኧችኋ አዠቨኝ ኧደገሰ ንጉስ ኢቨስር ። ³ ንጉስ ሁዳ አአዠቭኝ ኧሆኖዮዋ ሰቭ ኢዎኦዋኸ ኪሸረኝኋ ኬሸ እም አአዠቭኝ ኧሆኖዮዋ ሰቭ ጭን አንቫአነዳ ቧርሙ። ⁴ ንጉስ ሁዳ ዠፐረ ኤኛ ኪሸረኝኋ ዋኸ ባረ ኬሸ ፤<ኧሆኖዮዋ ሰቭ ሆርሙታ ኧአዠቨኝ ድግስ ደገስሁ፤ባውራመኛይ ኧቄኝዋ ዋጋመኛ አንጪዮም እንእአር ቁጥቁጥ ኧዋሪ ኧኸሬ ኧአዠቭኝ የሁዋኧ ቧሪዮዋ» ባረ ኬሽኖም ። ⁵ «ኧሆኖዮዋ ሰቭ ጭን ዘጋኋ ባጭ ኤፖም ቾኦዊታ ፣አት ሁዳ ኧቹጃኋይ አት ሁዳ ኧቂጥኋ ወረ፤ ⁶ ኧተኖፉም ሰቭ ኪሽረኘ ሁኗ ጠቦጩምታ አድዋኞም ኦቶሪዮም ። ⁷ በህም ግዚየ ንጉስ ሁዳ በቯአት ወታደርኋ ክሽታ ሀ ኪሸረኘኋ ኦኦቶርዋ ሰቭ አጋሁኗ ኧተረኖም ፤ ከተማሞሁኗ ብእሳድ ሜከረን ። ⁸ ተህም ቀጥወ ኧኪሸረኞኋ ዋኸ ባረኖም ፤ «አአዠቨኘ ድግስ ደጎሺ ኧሆኖዮዋ ሁኗ ጭን ኧዋ ድግስ ኢሆርታአር አሆርታ ። ⁹ ኧመኸ ኧኸሬ ጆፎረ ዎኦምታ ኧረኮዂይ ሰቭ እንእ አአዥቭኝ ድግሲ ሁሮዋ።> ¹⁰ ኪሸረኘቭ ሁኗ ጀፎረ ዎኦምታ ኧረከዊ ወሄ ተውጥጥሞኋ ሰቭ ቁጥቁጥ ኤፖም አዎኦምታ አአዠቭኘ ቢድ በሰቭ ሜኖይ ። ¹¹ ቢኸር ንጉስ ሁዳ ኧሆኖዮዋ ሰቭ ያዢ ቢገአ አአዥቭኘ ሁጅር አነትኸተረ አት ምስ በሄኤዲ ነከቨን። ¹² ኧቭስቭ ሁዳ <ኧአአዥቭኘ ሁጅር ታትኸተር ዋ ቢድ ኧተኸ ገፓኸ ባረን ።ሁድቭ ይካአር በከረታ ቁስ ባረ ። ¹³ ንጉስ ሁዳ አአገልጋይኋ ኧግርሞኋይ ኧጅሞኋ ኧጉጂታ ወረጀ ኦኦም በጠነቫ ቋሺ ፤በህሜ ቢኸይ ሽንቭ ኦፉኡት ፥ኢህርሴ ባረኖም ። ¹⁴ ኢየሱስ ዠፐረታ «ኧሆኖዮዋ ሁኗ ኖኦራኗአር ፤ ኧሸፖኢዮዋሁናጭን ቀሪኖአር» ባረኖም።

¹⁵ ተህም ቀጥወ ኧፈሪሳ ሰቭ ዎርምታ ኢኢየሱስ ኧተኸ ኧኝኧቶ በዘንጋ አጊቬተዋ ኢጠጪኸ አትዋቾም ። ¹⁶ ኧሁኗይ ተማሪ ተሄሮድሲ ሰቭ እማቲ ኬሾምታ «አስተማሪዮ አኸ ኧውረአር ትዝሬኵኸ ኧጎይታቭ መያ ታስተምርመኸይ አአትዎሁቭ ታታጥቃቅ እንዎኋ በቂጢየ ታዠኸ ንሂነ ፤ ¹⁷ «እንዴ አውድንረ ኧኧሮሟ ንጉስ ኧቄሳር ጊብር ኧጉቡርት አነቨንዌ ኤነቨንረዳ?» ምር ይቨስርኸ? ቧርሙ ተሳአሪ ። ¹⁸ ኢየሱስ ጭን ተንኮልሁኖዋ ሀረታ «አሁዋ ኸጣ ፣ኧቭር በዘንጋ ትጦሙጅኚ ትሲኢዋ? ¹⁹ «እንዴ ኣጊብር ኢኮሽኮዳ ፈራክ አቶሽኝ» ባረኖም፤ ሁኖም አት ብር አዎኦም አቴሸዊ ። ²⁰ ሁድ በዋ ፈራክ ፎር አነዳ መርክ ኧቫተናአር፤? ጥፈትኮኋ ኧቫተናአር»? ባረኖም ። ²¹ ሁኖም «ኧሮማን ጉስናአር ቧሪ ፤ሁድ ዥፐረታ አካ እእሮማ ንጉሲ ሁዳ ኧንጉስ ሁዳ አዊ ኧጎይታአር ኧኸረ ሁዳ ኣጎይታ አዊ፤» ባረኖም ። ²² ሁኖም ዋዳ ቢሶአ ወግ ኸረዎምታ ዎርም ።

²³ በህም ቀረ ኧዎደ ሰቭ አይትረሳካ» ቧርሙ ያአውርታ ኧሰዱቃ ሰቭ ኢኢየሱስ ሞኦምታ ዋኸ ቧርምታ ተሳአሪ ፤ ²⁴ «አስተማሪዮ አት ምስ ታገፓና ምሽት ትከ ታይኢኝ ቢዎድ ኧሰምኋ ኧዎደ ሁዳይ ምሽት አግቭአታ ዘር ኧናነ ባረ። ²⁵ ኧስማት ቲና እማቲ ባነውተ ፤ እንእዎሁኖዋ ኑእ ምሽት አገፓታ ታይኢኝ ኧዎዴ ኧኸሬ ፥ምሽትሂዳ እንስ ኧሰምኋ አገፓና ፤ ²⁶ ህመኸ ውሬተኝ ሶኦስተኝቭ ኧሰቫተኘ ኧሰሚ ስን እንእዎህኗ አጋ ባአጋ ባጎፔያ ቀጥወ ሞጁም ፤ ²⁷ ትንእዎሁኗ ቀጥወ ምሽት ሂዳ ገግመሻ ምፕደች ። ²⁸ «ዋ ምሽት እንእዎሁኗ አጎፔያይ ኧኸሬ ኧዎጁዋ ሰብ ቢትረሾኮዳ ቀረ ተሰቫአቸ ኧሰማት ኧኧተሁኗ ምሽት ትኸርኬ ። ²⁹ እየሱስ ዠፐረታ ዋኸ ባረኖም «ቅዱስ መጣፍ ዩታአርቪ ኧጎይታቭ ደረግ ቧኋርታሁዋ ትድፓፖርዋ ፤ ³⁰ ኧዎጁዋ ሰቭ ቲትረሾታ ሰቭ እንእ በሳቫይ አነውታ ኧጎይታ መላአይካ ኢኸርኬ ባሀሬ አያጋአቪ አያቨዳቭ ። ³¹ ኧወደ ሰቭ ቲትረሳካ ጭን ጎይታ ዋኸ ባረኧዝረካናሁዋ ሁዳ አናረበብሁዋታ?» ³² ኢየሱስቭ «ኢያ አአብርሃም ፤ኧይሳቅ ኧያቆብ ጎይታንሁ ።» እመኸ ኧኸሬ ፥ ጎይታ በክርስቶስ አሞርሙ ኧተነፉዋ ሁኖዋ ጎይታን ባሀሬ ኧዎጁዋ ሁኖዋይ ጎይታ አኸረዳ።» ³³ ሰቭ ሁኗ በሰሞኦዋጋ አትመረን ትምርት ወግ ኸረዎም ።

³⁴ ኢየሱስ ኧሰዶቃ ሰቭ ቁስ አአቴፐኖኸ ሶምኦምታ ኧፈሪሳ ሰቭ ብእማት ተደሞጁም ። ³⁵ ተሁኖም አት ኧሙሴ ቂጫ አስተማሪ ኢኢየሱስ ኢፈትርኵይ ሴኧታ ዋኸ ባረ ተሳአረን። ³⁶ «አስተማርዮ ተህግ እንእ ኢረእካ ትዛዝ ኧተዳን? ባረን ፤» ³⁷ ኢየሱስቭ ዋኸ ባረን ፤ «ጎይታ አምላካኸ በውርአ ሂናኸ በውርአ ነፍሳኸ በውርአ አሳባኸ ንቨድ ። ³⁸ ትንእዎሁኗ ኢረእካ ኢኢፊቲ ትዛዝ ዋዳን ። ³⁹ ሁሳቭ ኢቨስርካ ውሬኤተኘ፣ትዛዝ ሰቭ እንእ ኧገጋኸኸ ንቨድ ይቭካ ሁዳን ⁴⁰ ኧሙሴ ቂጫ ኧነቢቭ ትምርት እንእ ኧትሽኮኮ ዋ ትዛዝን ባረን ።

⁴¹ ኧፈሪሳ ሰቭ እማቲ በደሞጅ ቃይ ኢየሱስ ዋኸ ባረ ተሳአረኖም ፤ ⁴² ኧክርስቶሳአር ምር ይቨስርሁዋ? ኧቫን ትከን? ሁኖም «ኧዳዊት ተከን» ባሪ ኢየሱስቭ ። ⁴³ ኢየሱስቭ ዋኸ ባረኖም ፥ «ባቴ ዳዊት በመንፈስ ቅዱስ ደረግ ኧቭር ጌታኞ ዩኩ? ኧቭርቭ ዋኸ ዩኩ? ⁴⁵ ባቴ ዳዊት ጌታኛ ባረታ በኸናንጋሁ ኧተኸ ትከኋ ኢኸር» ባረን። ⁴⁶ ተህም ቀጥወ አት ቃር ኢዠፕኔ ኧኸረነ እማት ሰቭ አነፐረዳ ፤ተሁቀ ቀነሰታ እማት ሰቭ አታአር ኢትሳአርኵይ አደፈረዳ ።