¹ Bwabere bwacha sezi, abakulu b'eshengero haguma n'abagula b'olubaga, baj'omu ndagano y'okuyirha Yesu. ² Babere bamala kumushweka, bamuhek'emw'omurhegesi Pilato.

³ Yuda aber'abona bamushwekere ahungama, agalul'efuranga makumi masharhu bamuhaga, ⁴ Aderha: Najirir'echaha ch'okuhana eshagama echere. Nabo bashubiza ntya: bichi ebyo birhumalire? Ebyo bikulolere. ⁵ Yuda akabula ezo furanga omu shengero, aji chimanika. ⁶ Abakulu b'eshengero bazirhola, baderha ntya: zirhakwanene okuja omu shaho echere, bulala eri ngulo y'eshagama. ⁷ Bayunvikana oku bazigul'eshwa ly'omubumbi libe lya kuhamba mw'abalambagizi. ⁸ Baliyirika shwa ly'eshagama guhika z'ene. ⁹ Ler'omwazi omulebi Yeremiya aderhaga gwahikirira, guderhe ntya: Barhola bichira makumi masharhu by'efuranga nka luganjo lw'engulo abana b'e Israeli bachiranaga, ¹⁰ bazigula eshwa ly'omubumbi, nkoku Nahano ana ntegekaga.

¹¹ Yesu ahekwa embere z'omurhegesi Pilato, n'omurhegesi amudosa, ntya: ka we mwami w'Abayahudi? Yesu amushubiza: w'ederhe ko.

¹² Aliko ntacho ashubize abadahwa bakulu na bagula eri bamusidaka. ¹³ Na ntyo, Pilato amudosa: k'orhali wayunv'ebi byoshi bakusidakire? ¹⁴ Yesu achisirira, arhashuzaga chichi. Omurhegesi Pilato asomerwa bwenene. ¹⁵ Ngasi lusiku luku, baliherh'engeso, omurhegesi abashokolere omushwekwa muguma, ey'olubaga lwachishogere. ¹⁶ Baliherhe mushwekwa muguma omanyikene mpu, ye Baraba. ¹⁷ Ene bali omu chigusho cha boshi, Pilato ababwira, ntya: Mulonzeze mbashwekulire nde, Baraba eri Yesu Kristu? ¹⁸ Bunola alimanyire oku bwongwa bamusidakire.

¹⁹ Pilato abere ayiker'omu ntebe y'emanja, mukage amurhumir'entumwa: Orhabaga n'omwazi k'oyu muchesibwa; zene budufu, nalibukire bwenene enyanya zage omu bilorho.

²⁰ Abakulu bashengero n'abagula bahir'olubaga mw'amashumi, mpu baheme Baraba ashwekulwe balibuze Yesu. ²¹ Omurhegesi abadosa, ababwira ntya: mw' abala bombi, nde mulonzeze nshwekule? Baderha: Baraba.

²² Pilato ababwira ntya: gurhe njirage Yesu Kristu? Boshi bashuza: Abambwe!

²³ Omurhegesi aderha: Aliko bubi buchi ajirire? Bayama bwenene: akwanene abambwe!

²⁴ Pilato, abon'okwagabirwe, ery'abantu bamajira olwamo lunene, arhol'amenji, amakalaba embere zabo, aderha: Ntaherh'echibazo ch'eshagama yoyu omuchere. Ebyola bibalolere mwenine.

²⁵ Olubaga loshi lwayama: eshagama yage eb'enyanya zerhu n'abana berhu! ²⁶ Nantyo Pilato abashwekulira Baraba; n'eri amala shurhisa Yesu emizereti, amuhana mpu abambwe.

²⁷ Enfola miherho z'omurhegesi, zaheka Yesu omu ngombe, n'eguku lyoshi ly' enfola miherho lya mugorha. ²⁸ Bamuhogola emishangi yage, banamuyambisa echishuli ch'omuduku. ²⁹ Baluka eshungwe ly'emishaki, bamuyambisalyo omurhwe, banamuhira olusheke omu fune y'amalyo; baja bafukama embere zage, bamushekera, baderha: rhwalamusize, mwami w'Aba yahudi ! ³⁰ Banamuchirako, barhola lulala lusheke, bamushurhalo omwirhwe. ³¹ Bamuchinaguza ntyo, bamuhogola chilala chishuli, bamuyambisa emishangi yage, baja muhanika.

³² Ene bagenda, babugana muntu muguma w'Ekurene, mpu ye Simoni, bamuseza aheke omusalaba gwa Yesu. ³³ Bahika ahantu baderha Goligota, mpu ly'evuha ly'erhwe, ³⁴ Bamuha amavu gali mw'endulu mpw'amaywe; aliko, eri amamimako, amalahira. ³⁵ Bamalire kumurhindibuza, bagaban'emyambaro yage, bayisharhir'esimbi, mpu, ly'omwazi gwaderhagwa n'omulebi guhikirira, guderhere: bagabana emyambaro yani, banasharhir'esimbi olubindo lyani. ³⁶ Bayikala, banamulanga. ³⁷ Baheba enyanya w'erhwe lyage, ebirego biyandikirwe ntya: Oyu Yesu Mwami wa Bayahudi. ³⁸ Mwago mango bishambo bibiri byalihanikirwe haguma naye, muguma ekulyo n'owindi okulembe kwage. ³⁹ Abalambagizi bageraga mw'eyo njira bamu jachira, badunda amarhwe gabo, ⁴⁰ baderha: we washand'eshengero oku lusiku luguma, n'okuliyumbaka omu siku esharhu, chi chungulaga wenyine! Akaba oli mwene Nyamuzinda, chikula kw'ogo mulingoti (musalaba).

⁴¹ Abakulu babadahwa, haguma na bandisi na bashamuka, nabo bamushekera, n'okuderha: ⁴² Achungulaga abandi, arhakanagali kuchichungula yenyine! Akaba Ye nali mwami waba Israeli, ajag'arhenga kw'ogu musalaba, rhwana muyemera. ⁴³ Ayemerere Nyamuzinda; ajag'amukulaho, akab'amusimire. Bulal'aderhaga: mpu, ndi mwene Nyamuzinda. ⁴⁴ Ebishambo, byalibuzagwa haguma naye, nabyo bya mujachira kuguma nabo.

⁴⁵ Gurhenga saa ndarhu kuhika saa mwenda, omwizimya gwab'omu gulu lyoshi. ⁴⁶ Yabere yaba saa mwenda, Yesu alak'oku mulenge gunene, aderha: Eloi, Eloi, lama saba kitani? kw'okuderha: Nyamuzinda wani, Nyamuzinda wani, gurhe wakandeka?

⁴⁷ Baguma baliyimangireho, eri bayunva ntyo, baderha: Oyu muntu ly'ahamagala Eliya.

⁴⁸ Honaho, muguma wabo alibirha kurhola ehikuzo, ahiyunjuza enkala, ahiheba oku lusheke, amunywesa. ⁴⁹ Aliko abandi baderha: Leka, rhulole akaba Eliya ayinji kumuchungula. ⁵⁰ Yesu ashubi banda endulu bwenene, afa.

⁵¹ Ntyo, omushangi gw'eshengero gwabereka bisharhe bibiri, kurheng'enyanya kuhik'eshishi, egulu lyadirhimana, ebirimbi byabereka, ⁵² eshinda za chinguka, emibiri minene ya bachesibwa bafire ya fuka. ⁵³ Barhenga omu shinda eri Yesu aba amafuka, baj'omu Yerusalemu ntakatifu, banabonekera bantu banene. ⁵⁴ Enfol'emiherho n'abandi bantu baliri haguma naye mpu balanga Yesu, amango babonaga ogo musisi gw'egulu n'ebyajirikaga, bayubaha bwenene, baderha: Kubinali, oyu muntu aliri mwene Nyamuzinda. ⁵⁵ Na bakazi banene baliry'aho, bahenguza, bayimangira hale; balala bamukoleraga kurheng'e Galilaya, ⁵⁶ omu garhi Kabo haliri Mariya Magdalena, na Mariya nina wa Yakobo na Yozefu, na nina wa bene Zebedayo.

⁵⁷ Lyabere egolo, mugale muguma w'e Arimatayo ayinja, ezino lyage ye Yosefu, naye aliri mwigirizwa wa Yesu. ⁵⁸ Oyo muntu ashimba Pilato, amuhun'omubiri gwa Yesu. Pilato arhegeka mpu bamuhego. ⁵⁹ Yosefu agurhola aguzingir'omu mushangi gwinja gw'omweru, ⁶⁰ aguhek'omu shinda yage mpyahya, abaga ahumbire omu bale. Ahirakw'ebale emalangambere g'eshinda ya Yesu, anachigendera. ⁶¹ Mariya Magadalena aliri aho n'owindi Mariya, bayikala emalangambere g'eshinda.

⁶² Buch'esezi, olusiku lwa kulikiraga amarheganyo, abakulu babadahwa na Bafarisayo bagenda haguma emwa Pilato, ⁶³ baderha: Nahano, rhuyibukire oku oyu mubeshi aderhaga, amango ali chiririho mpu: enyuma wa siku esharhu nji nafuka. ⁶⁴ Orhegeke balang'eshinda kuhika olusiku lwa kasharhu, abegirizwa bage bakayinji kumuzimba, n'okubwira abantu mpw'afukire omu bafu. N'obubeshi buzinda bwanaba bubi kulush'oburhanzi.

⁶⁵ Pilato ababwira: Muherhe abalanzi; mugende, mulange oku mwakaba mugalire. ⁶⁶ Bagenda, balang'eshinda baheba kw'ebale, haguma n'abalanzi b'enfola miherho.