¹ Matiyu Jesu Kilisiti yaajanba yela togida ye ne. Jesu Kilisiti den tie Dafidi bijua, leni Abalahama bijua. ² Abalahama den mali isaaka, Isaaka n maa Jakoabo, Jokoabo n maa Juda len o cianba leni o waamu. ³ Juda den taa Tamala ki mali Peletisa leni Sela, Peletisa n maa Etilona, Etilona n maa Alama, ⁴ Alama n maa Abinadabi, Abinadabi n maa Nasona, Nasona n maa Salimono, ⁵ Salimono den taa Lahaba ki mali Boasa. Boasa den taa Luta ki mali Obedi, ⁶ Obedi n maa Isayi, Isayi n maa o bado Dafidi. Dafidi den taa Uli pua ki mali Salomono, ⁷ Salomono n maa Loboami, Loboami n maa Abia, Abia n maa Asa, ⁸ Asa n maa Josafati, Josafati n maa Yolami, Yolami n maa Osiasi, ⁹ Osiasi n maa Yotami, Yotami n maa Akasi, Akasi n maa Esekiasi, ¹⁰ Esekiasi n maa Manase, Manase n maa Amoni, Amoni n maa Josiasi, ¹¹ Josiasi n maa Jekonia leni o waamu, Babilona yaaba n den paadi Isalele yaaba ya yogunu, ki cuo ba ki gedini ti yonbidi bi diema nni ¹² Isalele yaaba yonbidi Babilona diema nni n pendi, Jekonia den mali Salitieli, Salitieli n maa Solobabeli, ¹³ Solobabeli n maa Abiyudi, Abiyudi n maa Eliakimi, Eliakimi n maa Asolo, ¹⁴ Asolo n maa Sodaka, Sodaka n maa Akimi, Akimi n maa Eliyudi, ¹⁵ Eliyudi n maa Eleyasala, Eleyasala n maa Matana, Matana n maa Jakobo, ¹⁶ Jakobo n maa Josefi, Maliyama calo, yua n den mali Jesu ke bi yini o Kilisiti. ¹⁷ A ya coadi ki cili Abalahama ki ya caa hali Dafidi, li pia piiga n nifiima naa. Ki cili Dafidi ki ya caa hali Babilona cuonu mo, piiga n nifiima naa. Ki cili Isalele yaaba yonbidi Babilina diema nni ki ya caa hali U Tienu n Gandi cuama mo tie piiga n nifiima naa.

¹⁸ Diidi Jesu Kilisiti madi n den tua maama. O naa Maliyama n da den tie Josefi toginaa hali ke bi daa den taani leni biyaba, Maliyama den ti sua ke o punba kelima U Tienu Fuoma Yua paalu po. ¹⁹ O togiba Josefi yua n den tie niteginkoa naa den bua ki fiagi o a sala nni. Lani yaa po o den jagi ke o baa paadi leni o hasiili nni. ²⁰ Wan den kpaagi yeni ya yogunu, o Diedo maleki den doagidi o kani ti dangidi nni ki yedi o: Josefi, Dafidi bijua, han da jie ki taa Maliyama wan tua o pua. Kelima wan punbi ya biga, o punbi ga kelima U Tienu Fuoma Yua yaa paali po. ²¹ O baa maa bonjaga, han yini o Jesu, kelima wani n baa faabi o niba leni bi tuonbiadi. ²² Lankuli den tieni ke o Diedo n den tuodi ki teni ke o sawalipualo pua yaa sawalo n tieni: ²³ Diidi, li ppowondiali baa punbi ki maa bonjaga. Bi baa yini o Emanuweli. Laa yeli bundima n tie U Tienu ye leni ti. ²⁴ Josefi n den fundi, o den tieni o Diedo maleki n waani o yaala. O den taa o pua. ²⁵ Ama waa den taani leni o hali wan ban mali o biga. Josefi den yini o Jesu.