¹ Ke O Diedo yedi Moyiisi, "Mɔlane, a ba la min ba sɔndi Farawɔn maama. A ba la lani, kelima o ba cedi bi niba ń gedi, ki dugni n nuu paaciamu po. N nuu paaciamu po yo, ke o ba deli ba ki ñani ba o diema nni."

² U Tienu maadi yeni Moyiisi, ki yedi o, "Mini n tie O Diedo. ³ N dɔgdi Abrahama po, Isaka po yeni Jakɔbu po, ke mini n tie U Tienu, U Paaciamu kuli daano; lan ñani n yeli, O Diedo, N naa cedi ke bi bandi nni. ⁴ N gɔ den loli yeni ba u ñɔnianu ke n ba teni Kanana diema, ban den yi waa a gɔda ki caani ki gɔ kali naani. ⁵ N gɔ gbadi Israyeli yaaba fanfabni, kelima Ejipti yaaba ń cagni ba maama ti yonbdi nni, ki ji tiadi n ñɔnianu po. ⁶ Lanwani ii, ŋan maadi Israyeli yaaba, 'Mini n tie O Diedo. N ba ñani yi ti yonbdi nni Ejipti yaaba nui nni, ki fie yi bi nui nni, ki faabi yi. N ba waani n paaciamu yin baa mi fuoma, ki tieni yaalidgu banma bona ki jia yeni ba ti buudi. ⁷ Mini mɔno ba taa yi, yin ya tie n buolu, ke i N tie i Tienu. I ba bandi ke N tie O Diedo, i Tienu, yua n ñani yi ti yonbdi nni Ejipti yaaba nui nni. ⁸ N ba gedi yeni yi min den poli ke n ba teni Abrahama, Isaka yeni Jakɔbu ya tinga nni. N ba puni yi li diema, man tua i diecema. Mini n tie O Diedo.'" ⁹ Moyiisi ń yedi Israyeli yaaba lanya maama, baa den bua ban cengi o, kelima bi pala den wadi yaali n tie ti yonbdi cacagbiadma po.

¹⁰ O Diedo den maadi yeni Moyiisi ki yedi o, ¹¹ "Gedi ki maadi Farawɔn, Ejipti badciamo, ke wan cedi Israyeli buolu ban ña o diema nni." ¹² Moyiisi den yedi O Diedo, "Israyeli yaaba yaa cengi nni, li ba tieni ledi i, Farawɔn wani ń nan cengi nni, kelima mii paa maama? ¹³ O Diedo den yedi Moyiisi yeni Haarɔn. O den ñani ñɔbonli ki sɔni Israyeli yaaba po yeni Farawɔn, Ejipti badciamo ya po, ke wan ñani Israyeli yaaba Ejipti tinfanma nni.

¹⁴ Bi yaajanba cuga n ne: Rubeni, Israyeli bijakpelo bijaba n ne, Henɔki, Paalu, Hesirɔn, yeni Kaarmi. Bani n den tie Rubeni cugli nni yaajanba.

¹⁵ Simeyɔn ya bijaba den tie: Jemueli, Jamini, Ohadi, Jacihini, Sohari yeni Cihawuli. Kananiti pua ya bija. Simeyɔn cugli nni yaajanba n yeni.

¹⁶ Lefi bijaba yela mo n diani ne, bani yeni bi puoli ŋuani: Bani n den tie: Jercihɔni, Kohati, yeni Merari. Lefi den pundi bina kobga n piitaa n bina lele (Bina 137) ki fo. ¹⁷ Jercihɔni bijaba bo tie Libni yeni Cihimeyi. ¹⁸ Kohati bijaba bo tie Amradi, Isihari, Hebrɔn yeni Usiyeli. Kohati den pundi kobga n piitaa n bina taa, ki fo. ¹⁹ Merira bijaba bo tie Mahili yeni Mucihi. Bani n den tie Lefi yaaba yaajanba yeni bi puoli ŋuani.

²⁰ Amrami den kuani Jocihebedi, ke o tie o báa ya ninsalo. Wani n bo mali Haarɔn yeni Moyiisi. Amrami den pundi kobga n piitaa n bina lele, ki fidi ki kpe. ²¹ ISihari bijaba bo tie Korha, Nepihegi yeni Sicihiri. ²² Usisieli bijaba bo tie Micihayeli, Elisafan yeni Sitiri.

²³ Haarɔn den kuani Elicheba, ke o tie Aminadabi bisalo, ki tie Nacihɔn ninsalo. O den mali o po Nadabi yeni Abihu, Eleyasari yeni Itihamari.

²⁴ Kora bijaba bo tie Asiiri, Elikana yeni Abiyasafi. Bani n bo tie Kora yaaba buolu yeni bi puoli ŋuani.

²⁵ Haarɔn bijua Eleyasari den kuani Putiyeli bisiaba nni yendo. O den mali o po Finehasi. Bani n bo tie niyula Lefi buolu yaajanba yeni bi puoli ŋuani.

²⁶ Haarɔn yeni Moyiisi bo tie niba lie, yaaba ke O Diedo bo yedi. "Ñani mani Israyeli yaaba Ejipti tinga nni, ki bobni ba nicagli cagli, nani a tɔbgola yeni." ²⁷ Haarɔn yeni Moyiisi n bo maadi Farawɔn, Ejipti badciamo, ke wan cabi ba u sanu, ban ñani Israyeli yaaba Ejipti diema nni. Li bo tie bani Moyiisi yeni Haarɔn ligi i.

²⁸ O Diedo ń bo maadi yeni Moyiisi Ejipti diema nni, ²⁹ O bo yedi o, "Mini n tie O Diedo, ŋan maadi Farawɔn, Ejipti badciamomin ba yedi a yaali kuli." ³⁰ Ama Moyiisi den yedi O Diedo, "Mii paa maama, li ba tieni ledi i, Farawɔn ń cengi nni?"