¹ Moyiisi den taani Israyeli cugli nni yaaba kuli, ki yedi ba, "O Diedo ń ñani yiko ke yin tieni yaali n ne ² I baa tuuni dana luoba, ama, li daaleleli, baa tie daaŋanli daali, Saba daali, mi fuodma daamunli daali, ya daaŋanli n gagdi ki dagdi yeni O Diedo kpiagdi. Ya nilo n sɔni tuonli lanya daali li dagdi ke ban kpa o. ³ I diedi nni kan cuoni mu Saba daali.

⁴ Moyiisi den maadi yeni Israyeli nitaanli kuli, ki yedi, "Ne tie O Diedo ń ñani ya yiko i. ⁵ I siiga nni, yaaba n pia li paalu yeni li yanbuama, ke bi pali siadi ban bobni paabu O Diedo po. Li ba fidi ki ya tie: wula, kupiendi, ŋanjilfa, kumɔndi; ⁶ Ti pakobdi yaadi naani galula, ki mɔni cocoli, ki mɔni ki tuudi, Leni tiidi caba, ti ŋɔkobdi; ⁷ Ya patongbandi n tuu, ki mɔndmɔndi, Ya gbanjuagdi ke bi nugi, Akasia daadi; ⁸ Mi fidsankpama li gbandieli nni fisanmu po, ya tiipuuma nuulu n mani yeni li ŋubŋanli. ⁹ Oniksi tana yeni ya tana a pia mayuli boncianla, u benŋuunu yeni salga yidkaciamo benliadli po.

¹⁰ Yaaba n pia mi tuonsɔnbanma i siiga nni, ban cua ki todi O Diedo ń buali ya tuona kuli. ¹¹ Li gbandieli yeni li jongu yeni bu kpalilibinkaabu i tialɔginkaani, li biana, li daasierdi yeni li bunbuna; ¹² Yiko ñɔmaama kpagu yeni ku bonbiili yeni ya kpaljɔnkaabu n ba dɔgni, ki lindi gu. ¹³ Bi den bobni li gbandieli taabli yeni li daasieda, yeni bu paabu kpanu; ¹⁴ U fidsantuankaanu yeni u tiabobinkaadi, mu fidsanmu yeni mi fidsankpama, li gbandieli nni yendma po; ¹⁵ Tolaali juuma binbindli yeni li daasieda, mi kpaŋanma yeni li ŋubli; bu kpajɔnkaabu, u kaangagdiŋamu bulñɔbu po; ¹⁶ A padjuukaana binbindli yeni li kumɔndi gilyaasi, li daasieda yeni li bonbaanbidi, ku tadgu yeni ku tuankaanu. ¹⁷ Li gbandieli luolu cabɔjnkaana, a daasieda yeni a bunbuna yeni bu kpaldɔginkaabu u luolu bulñɔbu po; ¹⁸ Yeni li gbandieli kpaana yeni a baabi u kaangagdiŋamu yeni u luolu po. ¹⁹ Ya tialakaadi n gagdi ki ŋani, u kaangagdiŋamu nni tuona po yeni Haarɔn, salga yidkaaba ciamo yeni o bijaba tialakaadi yaadi n gagdi ki ŋani salga yidma tuona po."

²⁰ Lanwani ii, Israyeli nitaanli den siedi Moyiisi kani. ²¹ Yua ke o pali den siadi, ke o buama mo yabi O Diedo po kuli den guani yeni bu paabu li gbandieli yeni u kaangagdiŋamu maama po, li paabu den tie li tuona yeni li tialakaadi bonbaanbidi yeni a tiabobinkaadi po i. ²² Bi jaba yeni bi puoba yaaba ya pala n den siadi, ke bi pia mi buama O Diedo po kuli den guani yeni wula yeni ŋanjilfa badlaani yeni li tutuuda mu biamu, a biana yeni wula canyiedi kuli. Bikuli den puni O Diedo bu pocaapaabu, ke bu tie wula yaabu. ²³ Yaaba n den pia ya pakobdi n naani galula, bii ki mɔni colcoli, bii ki mɔni ki tuudi; Leni tiidi caba, ti pagbandi yaadi n tuu ki mɔni, ti ŋɔgbandi, ya gbanjuagdi ke bi nugi den cua yeni lankuli. ²⁴ Yua n den cua yeni wula bii ŋanjilfa kuli den yi puni O Diedo i li paabu, yaaba n den pia Akasia daadi kuli, ke ti ba fidi ki sɔni tuonli bakuli, den yi cua yeni ti. ²⁵ Bi puoba yaaba n den bani mi lugma kuli den lugi ya caba n tie galula, ki mɔni colcoli, ki mɔni ki tuudi yeni ti pakobdi yeni Leni tiidi caba. ²⁶ Ya puoba pala den siadi, ke bi pia mi buama O Diedo po den lugi a caba yeni ti ŋɔkobdi i. ²⁷ Liiga yaaba yeni bi paatieba den cua yeni Oniksi tana, yeni ya taŋana n pia mayuli u benŋuunu yeni ti bentiadi po; ²⁸ Bi den cua yeni ya tiidi n pia nuulmanu, yeni mi kpama, mi kpaŋanma po mu fidsanmu yeni li ŋubli po. ²⁹ Israyeli yaaba den teni O Diedo bi yanbuapaabu; ya jaba yeni ya puoba pali n den siadi, ke bi pia mi buama O Diedo po den cua yeni ya bona ke O Diedo den buali ke Moyiisi ń bobni wan puogi o ya tuona kuli po.

³⁰ Moyiisi den yedi Israyeli yaaba, "Diidi mani, O Diedo yini Huuri yaabili, Uuri bijua, Besaleli, ke o tie Juda cugli nni yua. ³¹ O den gbieni Besaleli yeni o foŋanma, ki puni o mi yanfuoma, niima nni gbadma yeni mituonsɔnbanma, tuonbuolukuli po, ³² Ke wan bobni tuonbuolu kuli, ki sɔni wula, ŋanjilfa yeni ti kupiendi tuona; ³³ A tana jiama yeni a kpiedma yeni ti daadi jiama yeni ti duunma, yeni tuonbuolu kuli bobinma. ³⁴ O bili lankuli o yuli nni, ki ba bangi wani yeni Ahisama bijua Oholiabi, ke o tie Dani cugli nni yua, ³⁵ O gbieni ba yeni mi bancianma tuonbuolu kuli po, ke bi ba sɔni yeni mi tuonsɔnbanma, u tankpiedu po, galula pakobdi caba yaa n mɔni colcoli, ki mɔni ki tuudi lugma yeni a kpaama yeni a tuonjaana kuli bobinma.