¹ O Diedo den yedi Moyiisi, "Fii nakanba ne, fini yeni a nitaanli, ŋan ñani yaaba Ejipti diema nni yeni. Yin gedi min den poli ki niani Abrahama, Isaka yeni Jakɔbu, min den yedi ba, 'N ba teni a puolŋuani li diema' ² N ba sɔni n Maleki wan ya ye i liiga; ki deli ki yaani Kanana yaaba, Amori yaaba, Hititi yaaba, Perisi yaaba, Hi fi ti yaaba, yeni Jibusi yaaba. ³ Gedi mani li diema nni, mi naaŋanma yeni ti siidi puubi naani, ama, N kan ya ye i siiga ki da ti bolini yi li sancenli nni, kelima, i buolu tie yenyieda i. ⁴ Li ntaanli ń gbadi lanya yanyagdi laabaali, ke bi buudi, ki fabni, hali ke niloba ki lani jaantiadi. ⁵ O Diedo den yedi Moyiisi, "Maadi Israyeli yaaba, 'I tie yenyieda buolu i. N ya bi ba yegi yeni yi u yognu bá waamu, N bi ba bolini yi. Lanwani ii, yin landi i jaantiadi, min jagi min ba tieni yi maama.'" ⁶ Lanwani ii, Israyeli yaaba den ñani Horebi juali diema nni kaa lani jaantiadi hali bada.

⁷ Moyiisi den taa li gbandieli ki ban caani fagma, ku jongu niinpo. O den yini li u kadkaanu jongu. Ya nilo n den bua mia O Diedo bonli, o den yi ñ, ki gedi u kadkaanu jongu kani i. ⁸ Moyiisi ya den bua ñ ki gedi u kadkaanu jongu kani, yuakuli den yi fii ki sedi o jongu bulñɔbu kani i, ki ya nua Moyiisi hali wan ban kua li niinni. ⁹ Moyiisi ya kua ku jongu nni ya yognu, ku taawalgu den yi jiidi ki pibni bu bulñɔbu kani, O Diedo ń ya ji maadi yeni Moyiisi. ¹⁰ Li nitaanli ya la ke ti talwadi jiidi ku jongu bulñɔbu kani, bikuli den yi gbaani bi jondi bulñɔna kani i, ki ya pugi U Tienu. ¹¹ O Diedo den yi maadi yeni Moyiisi nunga yeni nunga i, nani o nilo ń yi maadi yeni o dɔnli yeni. Li ya gbeni, Moyiisi den yi guani ki lebdi ti jondi nni, ama, o naaciemo, jawaalo, Nuni bijua, Josuwe den li ye li gbandieli nni i, o den ki ña.

¹² Moyiisi den maadi O Diedo, "Diidi, a maadi nni yognu kuli, 'Taa li nitaanli ne yin cuo bi sancenli,' ama a nan ki waani nni ŋan ba yegni nni yeni yua. A den maadi, 'N bani a hali a yeli, ke a pali go mani npo. ¹³ Mɔla, a pali ya mani npo, ŋan waani nni min ba tieni maama ki bandi a bonŋanla, a pali ń ya bii ki mani npo. Ŋan ya tiani ke bi dodtieba ne tie a ya buolu i." ¹⁴ O Diedo den jiini, "Mini nbá, N baa ye yeni a, lan dagdi a. N go ba teni a mi fuodma." ¹⁵ Moyiisi den maadi o," A ya kan yegi yeni ti, ŋan da cedi tin fii nekanba. ¹⁶ Lanyaaka n ba tieni ledi i, ki bandi ke a pali mani npo, mine yeni a buolu kuli ii? Kase ke a yegi yeni ti, lanyaakam mini yeni a buolu ba teini ledi, ki ya pia mi paadma yeni ya buoli n sieni ki tinga po ne ee?

¹⁷ O Diedo den yedi Moyiisi, "N go ba tieni ŋan mia nni yaali, kelima N pali mani apo, ke N go bani a hali yeni a yeli." ¹⁸ Moyiisi den maadi, "N mia ŋa sugli, waani nni a kpiagdi." ¹⁹ O Diedo den yedi, "N ba cedi N ŋandi ń pendi a nintuali, ki kpaandi N yeli, 'O Diedo.' N ba di sugli min ba di sugli yaaba ya po, N baa pia mi niñingbadma min bua min ya pia mi niñingbadma yaaba ya po. ²⁰ "Ama, O Diedo den yedi, "A kan fidi ki la N nunga, kelima niloba kuli kan la N nunga ki go ya pia miali." ²¹ O Diedo den yedi, "Diidi, u kaanu n yeni, Mini n bobni; ŋan sedi ku tangu po. ²² N kpiagdi ya pendi ya yognu, N ba kuani a ku tanlongu nni, ki pii a nunga yeni n nuu haliki ban pendi ki gbeni. ²³ N ya ji piidi n nuu, a ba la n poli po, ama, a kan la N nunga."