¹ Mɔlane, ŋan ba bili ba ya yikodi n ne: ² A ya daa yonbo, ke o tie Ebrewu buolu yua, o ba sɔni a po bina luoba, ama li binleleli, a ba cabi o, wan ña a kani, ki diedi o yuli, kaa pani libakuli. ³ O ya kua a kani o baba, o ba yaadi o baba i; o ya kuani pua, o ba gedi o kaani yeni o denpua i. ⁴ O yonbdaano ya puni o pua, ke o mali bonjala yeni bonpola, o pua yeni a bila tie o yonbdaano yaaba i, o ba yaadi wani o baba i. ⁵ Ama, o yonbo ya kadi ki maadi, "N bua n yonbdaano, n denpua yeni n bila; n ki bua ke n ñani n baba ki yendi n yuli," ⁶ Lanwani ii, o yonbdaano kua yeni o U tienu kani. O ba tabni o bu bulñɔbu bii ku bulñɔdaagu, ki pudi o tubli yeni li penkpaali. Lanwani ii, lanya yonbo baa tuuni o onbdaano po i, hali o miali bianu.

⁷ Nilo ya kuadi o bisalo nani potuado yeni, o kan ña ki baa o yuli nani jatuado yeni. ⁸ O yonbdaano yaa bua o wan tua o pocelo, lanwani ii, o ba kuadi o wan den daa o naani. Li ki cabi ke wan kuadi o nilamo po. Waa pia li yiko kelima wani n yie o pua. ⁹ O yonbdaano ya puni o o bijua, ke o kuani o, o baa kubi o nani o bisalo yeni i. ¹⁰ O ya taa potiano, o kan wadi jiema, o tialakaadi yeni o puodi yikodi. ¹¹ Li ya tie o ya cedi ke lani bona taa ne pɔdi o, lanwani ii, o ba fidi kisiedi ki yendi o yuli kaa pani libakuli.

¹² Yua n pua ki kpa nilo, li buali ke ban kpa o i. ¹³ Li nilo ya ki tia ka ki tieni la, ama ke li tie jalma i, lanwani ii, N ba waani wan ba sani ki gedi naani ki wuoni. ¹⁴ Nilo ya gedi ki woli o lielo, ki jagi ki kpa o, li buali ke yin cuo o, bá o ya ye U Tienu binbindli kani, li buali ke wan kpe i.

¹⁵ Yua pua o naá lanyaaka o báa, li dagdi ke ban kpa o.

¹⁶ Yua n bibi nilo, ki cuo o, ki kuadi, bii bi ya la li nilo o nui nni, lanya nisuuro dagdi yeni mi kuuma.

¹⁷ Yua n soli o báa bii o naá, li buali ke ban gbindi o miali.

¹⁸ Niba ya kɔni, ke yendo lugdi o lielo tanli bii ki pua o nuukukuli, ke waa kpe, ama ke li nan duoli o; ¹⁹ O ya paagi ki ba fidi ki cuoni yeni lanbanli (gbiamu), ya nilo n pua o yeni ba pa wan biani ya yaanma i. Wani n go ba pa ki tebi o. Ama, lanya nilo ki tie nikpalo ka.

²⁰ Nilo ya pua o jatuado bii o potuado yeni gbiamu, ke o kpe, ke li tie ti puadi po, li buali ke ban jia lanya nilo ti buudi. ²¹ Ama o tuado ya ki kpe, ki tieni dayenli bii dana lie, bi kan jia o yonbdaano ti buudi, kelima o da biani li tuado tuonli n yeni.

²² Niba ya kɔni, ki pua ki duoli tupunbo, ke o puoli ñani, ama ke laa duoli wani o pua, li buali ke lan bili i tagli daano li panli, wan pa nani o pua calo ń bili maama. ²³ Ama li ya tie ke li duoli o boncianla, li buali ke miali ń tuu miali panli i, ²⁴ nunbu ń tuu nunbu panli, ñinli ń tuu ñinli panli, nuu ń tuu nuu panli, taali ń tuu taali panli, ²⁵ naamaanu ń tuu naamaanu panli, yiagu ń tuu yiagu panli, fadma ń tuu fadma panli.

²⁶ Nilo ya pua ki fiadi o jatuado bii o potuado nunbu, li buali ke wan cabi o wan siedi ki yendi o yuli i, kelima wan fiadi o nunbu yeni ya po. ²⁷ O ya pua ki fendi o jatuado bii o potuado ñinli, o ba cabi li tuado ń siedi ki yendi o yuli kelima o ñinli fendma po.

²⁸ Nua ya tuoni nilo, ke o kpe, li buali ke lan lugdi li nua a tana ki kpa o, nilo go kan ŋmani o nandi; ama, o naadaano ki pia tagliba kuli. ²⁹ Ama li nua ya den tie naabiado i, ke bi tundi ki wangi o daano, ke waa fiini li maama nni, ke li nua tuoni ki kpa nilo, li buali ke ban lugdi ki kpa o nua, ki biani o daano mo ya miali. ³⁰ Li ya buali ke wan pa i ki ga o miali, o ba pa lan buali maama i. ³¹ Nua ya tuoni nilo bijua bii o bisalo, o naadaano ba cɔlni ki tieni ti buudi ń jia ki bili o maama i. ³² O nua ya tuoni jatuado bii potuado, o naadaano ba pa dibala piitaa (30), ki go lugdi ki kpa o nua.

³³ Nilo ya gbiidi caali, ki ŋa caayaangu, ke nua bii ŋunbo baa lieni nni, ³⁴ li caali daano ba pa o naadaano ń biani yaali i. O ba pa o yandaano ki yanga ligi, ki yendi ki yankpienga.

³⁵ Nua ya tuoni o naalielo, ki kpa o, bi ba kuadi ya nua n tuoni, ki bɔgdi i ligi, ki go kuadi o naakpiemo mo, ki bɔgdi o ligi. ³⁶ Ama, bi ya den tuodi ki bani ke li nua tie naabiado, ki waani o daano, ke waa cengi, o ba pa nua i, ki tuu nua panli, ki ji yendi o naakpiemo.