¹ Nao afta long sabat day, i start brok dea laet long fes day blong wik, Meri magdalen mo narafala Meri oli kam blong luk hol we oli berem Jisas long hem. ² Nao semtaem nomo i gat wan bigfla earthquake, nao i gat wan enjel i aot long heven i kam daon, i rolem aot stone mo i sidaon antap long ston ya. ³ Taem i kam i olsem wan laetning, mo klos blong hem i waet olsem snow. ⁴ Ol man blong lukaot hol blong stone ya oli seksek oli fraet mo oli kam olsem man we oli ded . ⁵ Nao enjel ya hemi ansa long tufala woman se, ''yu tufala ino fraet, mi save se yu tufala i stap lukaot Jisas ya, we oli nilim hem long kros. ⁶ Hemi no stap long ples ya, Hemi laef bakegen, olsem we hemi talem, yutufala i kam, luk ples we Jisas i slip long hem. ⁷ Yutufala go kwik talm long ol disaepol blong hem se, 'hemi laef bakegen long ded, mo naoia, hemi stap go fastaem long yufala, long Galili, bambae yufala i luk hem long ples ya.' Tingbaot tok ya we mi talem long yu tufala.'' ⁸ Nao kwik taem nomo, tufala i livim hol, tufala i fraet be tufala i glad tu. Tufala i resis blong go talemaot long ol man blong Jisas. ⁹ Nao wantaem nomo, Jisas i kam mitim tufala i talem se, ''halo long yu tufala!'' Nao tufala woman ya kam, nildaon long fes blong hem. Tufala i wosipim hem. ¹⁰ Wantaem nomo Jisas i talem long tufala se, ''yutufala ino fraet, go talem long ol brata blong mi, blong oli go long Galili blong oli luk mi.'' ¹¹ Afta taem tufala woman ya i stap kobak long semtaem, sam long ol soldia oli ko long taon oli ko talem long jif pris from ol samting we i hapen. ¹² Taem ol jif pris oli harem, oli mit wetem ol elder oli stap tok raon long samting ya, nao oli givim wan bigfala amaon blong mane long ol soldia ¹³ mo oli talem long olgeta se, ''yufala i talem long ol narafala man, ol disaepol blong Jisas oli kam long naet, oli karemaot bodi blong hem, taem yumi stap slip." ¹⁴ Sipos Paelot i harem bae mifala i explenem samting ya long hem, blong mekem se yu no mekem wan samting i rong. ¹⁵ Taem ol soldia oli tekem mane, nao oli mekem olsem we ol jif pris oli talem. Nao tok ya i stap ko raon long Jews kam kasem tede. ¹⁶ Taem ol elven disaepol blong Jisas oli stap go long Galili, long wan hil, taem Jisas i daerektem olgeta blong oli go long hem. ¹⁷ Taem oli luk Jisas oli wosipim hem, be sam oli gat tu tingting. ¹⁸ Nao Jisas i kam long olgeta i toktok long olgeta i talem se, ''God i givim paoa long mi, long evri samting long heven mo long wol. ¹⁹ Nao from samting ya yumi mas go long olgeta man long evri ples long wol, tijim olgeta blong oli kam man blong mi mo baptaesem olgeta long nem blong papa blong mi, long nem blong tabu spirit. ²⁰ Mo tijim olgeta blong oli obey long ol samting we mi givim finis long yufala. Mi bae mi stap wetem yufala oltaem, gogo wol ya i finis.''