¹ Mi, olsem presina blong Masta Jisas Kraes, mi stap tok long yufala blong wokbaot long stret fasin we yu folem singaot we yu bin akseptem. ² Mi askem yu blong liv wetem bigfala tingting blong hampolnes, mo blong stap kwaet mo gat longfala tingting, mo serem fasin blong lavlavem wanwan man. ³ Yu mas mekem bes blong yu blong save kipim spirit blong uniti ya long fasin blong stap wan ples long pis. ⁴ I kat wan bodi mo wan spirit, semak nomo olsem taem we God i bin singaot yu mo wetem hop ia we yu kat long hem tru long singaot ia. ⁵ Mo i kat wan Masta Jisas Kraes, wan Feit, wan Baptisim, ⁶ mo wan God mo we hemi Papa blong everiwan, mo we hemi rul ova long everiwan mo we i wok tru long everiwan mo everi samting we i hapen. ⁷ Hemi kivim glad had blong hem long wan wan man i stret nomo folem mak blong kiv we Kraes i kivim long yumi. ⁸ Hemi olsem we toktok blong God bifo i talemaot se, " Taem we hem i bin ko antap long hae ples long heven, hem i lidim ol man we oli karem olgeta, iko long ples we ino blong olgeta. Mo hem i kivim ol samting blong olgeta iko long ol man olsem ol kiv." ⁹ Mining blong toktok ia, " hem i ko bak antap," i mekem yumi save se hem i bin stap long heven antap mo we i kam daon long wol ia? ¹⁰ Hem we i bin kam daon hem i semak man we i bin kobak antap long heven mo kasem posisen we i hae i bitim olgeta nara posisen long heven blong mekem se hem i save controlem olgeta samting. ¹¹ Jisas Kraes hem i makem maot sam blong oli kam ol aposol, sam olsem ol profet, sam olsem ol evanjelis, mo sam olsem ol pasta mo ol tija ¹² blong mekem redi ol man blong God blong mekem wok blong helpem nara man, blong biltimap laef blong man we i folem Kraes, ¹³ kasem taem we yumi kat uniti long feit mo olgeta save we yumi kat long pikinini blong God, blong mekem yumi gro bigwan long save mo kasem gud mak blong save Masta Jisas Kraes. ¹⁴ Kraes hemi biltim ap yumi blong yumi nomo kam olsem ol smol pikinini we oli save muvmuv ko kam olsem wok blong wev long solwota, mo ol win blong doctrin we i save pulumaot yumi long biliv mo ol kiaman blong ol man blong kiaman gud long ol man. ¹⁵ Insted, wetem tru toktok blong lav, yumi mas gro ap long everi rod blong ko long hem we hemi olsem hed, we hem i, Kraes. ¹⁶ Kraes hem i mekem bodi blong yumi, every pat blong bodi oli joen tugeta mo wok gud blong mekem se bodi ia i save wok, mo taem wan wan pat oli wok tugeta, i mekem se bodi ia i save gro hem wan blong mekem ol wok tru long lav blong hem. ¹⁷ From samting ia, mi stap tok strong long yufla long nem blong Masta blong yumi, se, yu no mas wokbaot long laef blong ol man nogud, olsem oli no usum tingting blong olgeta. ¹⁸ Undastanding blong olgeta hemi stap long tudak, olsem ol man blong nara ples from laef blong olgeta oli stap no wantem kat save long God, from had blong olgeta i strong tumas. ¹⁹ Olgeta oli nokat sem mo oli komitim olgeta long wantem blong sin, mo oli stap mekem everi fasin we ino klin wetem fasin blong kavet. ²⁰ Be hemia i no hao blong yu kam blong save Kraes. ²¹ Mi kasem se yu bin harem finis, mo we yu kasem ol save ia long hem, olsem trut we i stap long Jisas Kraes. ²² Yu bin kasem save tijing ia se yu mas putum aot wanem fasin we i blong olfala laef blong yu, blong putumaot olfala man. From olfala man ia nao we hemi korap from ol kiaman trik blong ol wantem blong hem. ²³ Yu bin kasem tijing blong kat niufla spirit long tingting blong yu, ²⁴ mo blong putum niu man ia we God i bin mekem long pija blong Hem--- we i truli stret gud mo we i holi. ²⁵ From samting ia, yufala i mas leko fasin blong kiaman, mo letem wan wan long yufla i talem ol tru toktok nomo wetem man we istap klosap long yu, from yumi olsem ol memba blong wan wan long yumi. ²⁶ Yu save kros be yu no mas letem kros i mekem yu ko sin. ²⁷ Yu no mas letem sin i ko daon wetem kros blong yu. Yu no mas kivim wan janis i ko long devel. ²⁸ Man we i stap stil i mas leko fasin nogud ia. Be, hem i mas mekem wok, wokem ol gudfla samting wetem ol han blong hem, blong mekem se hem i save kat samsamting blong save serem wetem ol nara man we oli stap long nid. ²⁹ No letem eni toktok blong spolem man i kamaot long maot blong yu. Usum ol toktok nomo we i gud blong olgeta we oli nidim oli save lanem wan samting aot lem, blong mekem se toktok blong yu i save mekem man i glad. ³⁰ Mo no mekem Holi Spirit i harem nogud long fasin ia blong yu, from tru long hem nao i mekem se God i makemaot yu blong hem long dei ia we hemi i pemaot yu. ³¹ Lego olgeta fasin we i mekem yu harem se laef blong yu i konkon, fasin blong kros bitim mak, fasin blong kros hariap, fasin blong singaot strong long man, fasin blong tok ackens long man blong mekem se ol narafala man oli tingting nogud long hem, mo wetem olgeta nara kind rapis fasin nogud long feis blong God. ³² Be yu mas kaen long ol nara man, likem olgeta wetem had blong yu, fogivim ol narafla man semak olsem we God i bin fogivim yu tru long Masta Jisas Kraes.