¹ Taem we dei blong Pentikos i kam, evriwan oli stap tugeta long wan ples nomo. ² I no longtaem i gat wan saon i kam long Heven olsem wan strong win, we i kavremap ful haos ia. ³ Taem ia i gat fulap smol faea we i kamaot long evri man we oli stap. ⁴ Olgeta evriwan oli fulap long Holi Spirit, mo oli stap toktok long ol difren lanwij we spirit i givim long olgeta. ⁵ Nao ol man Jiu we oli stap long Jerusalem, we oli kam long ol difdifren kantri, oli stap obei long loa blong God. ⁶ Oli harem ol noes ia, i mekem se olgeta Jiu oli kam tugeta mo oli no save wanem i stap hapen. From nomo oli stap toktok long ol lanwij blong olgeta. ⁷ Evriwan long olgeta oli sapraes mo oli talem long olgeta wanwan se, ''ol man we oli stap toktok long lanwij blong yumi hemi ol man Galili.'' ⁸ From wanem nao yumi stap harem olgeta oli stap toktok long lanwij we yumi bon wetem? ⁹ Olgeta man Pathia mo ol man medes, ol man Elamaet, ol man we oli stap long Mesapotamia, olgeta long Judia , Capadocia, long Pontus mo Asia. ¹⁰ Phrygia mo Pamphylia, long Egypt mo long Libia i go kasem Cyrene, mo ol visita we oli kam long Rome, ¹¹ JIus mo Proselits, Cretansmo olgeta long Arab, yumi stap harem olgeta ia oli stap talemaot ol strong wok blong God long lanwij blo yumi. ¹² Olgeta evriwan oli sapraes mo oli luk se i strong tumas mo oli stap toktok long olgeta bakeken se, '' Hemia i minim wanem?'' ¹³ hemia Be sam long olgeta i se, hemia oli fulap long niufala waen. ¹⁴ Be Pita i stanap wetem olgeta eleven, i tok strong, mo i talemaot long olgeta se, ''yufala ol man Judia mo yufala we i stap long Jerusalem, yufala i mas save hemia, mo yufala i lesin gud long ol toktok blong mi. ¹⁵ Ol man ia oli no drong olsem, we yufala i stap talem. Hemia i jes naen o'klok moning nomo. ¹⁶ Be hemia nao Profet Joel i stap talem bifo finis. ¹⁷ Bae long las dei, God i talem se, mi bae mi givim spirit blo mi long olgeta man .Ol yangfala boe mo gel bae oli talemaot ol samting we bae i hapen long fiuja. ol yangfala bae oli luk ol visen, ol olfala man bae oli drim long ol drims. ¹⁸ Nating spos ol boe mo ol gel blong wok nomo, bae mi givim spirit blong mi long olgeta blong oli save talemaot ol toktok we bae mi givim long olgeta. ¹⁹ Bae mi mekem ol samting long skae antap mo ol saens long paoa blong mi long wol ia. Hemia bambae i gat blad, mo faea wetem bigfala smok. ²⁰ Nao san bae i kam tudak mo mun bae i kam red olsem blad. Nao biaen long olgeta dei ia blong Hae God bae i kam. ²¹ Nao long taem ia, evriwan we oli stap singaot mi long nem blong mi, bambae mi sevem olgeta. ²² Ol laen blong Israel, yufala i harem ol toktok ia, Jisas we hemi blong Nazaret, God i soemaot i klia long yufala we hem nomo i sendem hem i kam, hemi kivim paoa long hem blong hemi mekem ol merikel mo ol saen, God hemi mekem olsem nomo blong yumi mas save hem. ²³ God i putum man ia long han blong yufala, i folem plan blong hem nomo. Mo yufala i kilim hem i ded, long sem fasin ia we yufala i putum hem long han blong ol enemi blong hem we oli nilim hem long kros. ²⁴ God i tekemaot hem long paoa blong ded mo i mekem hem i laef bakeken from we God i gat olgeta paoa i mekem se ded i no naf blong holemtaet Jisas. ²⁵ Hemia i olsem toktok blong king Devid i talem bifo finis, hemi talem se, ''Oltaem mi stap luk se hae God i stap wetem mi, mo i stap klosap long mi oltaem mo bae i nogat wan samting we bae i mekem mi mi seksek. ²⁶ From samting ia, mi mi glad tumas, mo mi stap talem tankiu long yu mo mi mi man we tingting blong mi i stap strong oltaem long yu. ²⁷ From se yu no mas livim mi stap long hom we hemi blong ol ded man. No letem bodi blong mi i roten blong i kam sting, from se mi mi holi man we mi stap mekem wok blong yu. ²⁸ Yu soemaot rod blong mi finis we i blong kasem laef, yu save mekem mi mi glad tumas, from se bae yu stap wetem mi oltaem''. ²⁹ Ol brata, mi wantem talemaot long yufala se, olfala blong yumi king Deved bifo, hemi ded finis, mo grev blong hem i stap long ples blong yumi kasem tedei. ³⁰ Hemi wan profet mo hemi save gud we God i mekem wan strong promes long hem, se wan man we bambae i kamaot biaen long hem i mas kam king bakeken olsem hem. ³¹ King Devid i save gud we God bae i mekem ol samting ia i kam tru long fiuja. Afta hemi tok se, God ino lego hem i stap long hom blong ol ded man mo bodi blong hem i no roten blo i kam sting, hemia hemi stap tokbaot Mesaea ia, we bae i laef bakeken. ³² God hemi mekem Jisas i laef bakeken finis i mekem se mifala evriwan ia i stap talemaot samting ia. ³³ God we hemi papa blong hem, i mekem se hemi leftemap hem i go antap, blong i stap long raet saed blong hem, mo i givim Holi spirit long hem olsem we i stap long promes blong hem finis. Ol samting we yufala i stap luk,yufala i stap harem, hemia hemi wok blong Holi Spirit we Jisas i givim long mifala. ³⁴ Deved we hemi king, hemi no go antap long heven, be tok blong hem i talem se, ''king. yu yu masta blong mi. God we hemi hae i talem long yu se, king bae yu sidaon long raet saed blong mi, mo yu wet. ³⁵ From samting ia bambae mi mekem ol enemi blong yu bae oli stap andanit long paoa blong yu mo bae oli kam slef blong yu. ³⁶ From samting ia yumi we yumi ol laen blong Israel, yumi mas save gud se Jisas we yufala i nilim hem long kros. Hemia nao God i mekem hem i kam Masta blong yumi, mo hem tu i Mesaea. ³⁷ Taem we oli harem ol tok ia, hemi rili stikim gud olgeta. Oli askem long Pita mo ol narafala aposol se, ''Ol brata? hemia bae mifala i mekem olsem wanem? ³⁸ Afta Pita i talem long olgeta i se, yufala i mas tanem tingting blong yufala from ol nogud fasin blong yufala, mo yufala evriwan i mas baptaes long nem blong Jisas Kraes. From se God bae i tekemaot ol nogud blong yufala. Mo bambae God nomo i givim holi spirit ia long yufala. ³⁹ From promes blong God i stap wetem yufala wetem ol pikinini blong yufala, mo long olgeta tu we oli stap long wei yet. Promes ia i stap wetem olgeta ia we Hae God hae god we hemi God blong yumi, i stap singaot olgeta. ⁴⁰ Pita i stap talemaot plante toktok bakeken long olgeta, mo i talem strong long olgeta se, ''Yufala i kamaot long ol rabis man ia, from bae yufala i no kasem panis wetem olgeta.'' ⁴¹ From samting ia olgeta we oli biliv long tok blong hem, oli baptaes. Nao long taem ia i gat sam wei long tri taosen man oli joen long grup blong olgeta. ⁴² Oltaem nomo olgeta we oli biliv long jisas, oli stap lesin long ol tok ia we ol aposol oli stap tijim long olgeta mo oli stap joen gud long ol grup blong olgeta. Oli joen gud blong kakae wanples mo tu blong mekem lodsapa, oli stap prea mo oltaem nompo oli strong blong mekem fasin ia. ⁴³ God i stap usum ol aposol blong wokem plante samting blong sapraes, mo plante saen tu i kamaot long paoa blong hem i mekem se plante long olgeta i seksek tumas long ol samting ia. ⁴⁴ Olgeta man ia we oli biliv strong long Jisas Kraes, oltaem nomo oli stap joen gud long wan grup, mo evriwan i glad blong serem ol samting blong olgeta wetem ol narafala man. ⁴⁵ Olgeta oli stap salem kraon wetem ol samting blong olgeta, blong seremaot mani blong olgeta i go long ol pua man, we hemi stret long wanem we ol pua man oli sot long hem. ⁴⁶ Oli stap joen long tabu haos blong God evridei. Oli stap kakae insaed long haos blong olgeta. Mo stap mekem lodsapa olsem we jisas i talem. From ol samting ia, oli stap kakae mo mekem tingting blong ol i stap daon, i mekem se oli stap glad tumas. ⁴⁷ Oltaem nomo oli stap presem Hae God, i mekem se ol man tu oli ona long olgeta. Evri dei Hae God i stap sevem ol man, mo i stap joenem olgeta long grup ia we hemi grup blong olgeta aposol.