¹ የይሁዳ ነገሥታት ዖዝያን፣ ኢዮክታም፣ አካዝና ሕዝቅያስ በነገሡበት ዘመን ስለ ይሁዳ ለአሞጽ ልጅ ለኢሳይያስ ያህዌ የሰጠው ራእይ፡፡ ² ያህዌ እንዲህ ይላልና ሰማያት ሆይ ስሙ፤ ምድርም አድምጪ፤ ‹‹ልጆች አሳደግሁ፤ እነርሱ ግን ዐመፁብኝ ³ በሬዎች ባለቤታቸውን ያውቃሉ፤ አህዮችም የሚመግባቸውን ያውቃሉ፤ እስራኤል ግን አያውቅም፤ እስራኤልም አያስተውልም፡፡›› ⁴ በዚህ በኀጢአተኛ ሕዝብ፣ በዚህ የኀጢአት ሸክም በተጫነው የክፉ አድራጊዎች ትውልድ፣ ዐመፀኞች ልጆች ላይ ክፉ ነገር ይመጣል፡፡ የእስራኤልን ቅዱስ ያህዌን ትተዋል፤ ከእርሱም ዘወር ብለዋል፡፡ ⁵ የያህዌን ቅጣት የሚያመጣባችሁን ነገር የምታደርጉት ለምንድነው? በእርሱ ላይ የምታምፁት ለምንድነው? እናንተ አእምሮና ልቡ እንደ ታመመ ሰው ናችሁ ⁶ ከእግር ጥፍር ጀምሮ እስከ ራስ ጠጉር ድረስ ጤናማ አካል የላችሁም፡፡ ቁስልና እባጭ፣ መግልም ሞልቶበታል፤ ቁስላችሁ አልታጠበም፤ አልታሰረም፤ በዘይትም አልለዘበም፡፡ ⁷ ጠላት አገራችሁን አጥፍቷል፤ ከተሞቻችሁን አቃጥሎአል የተረፈም የለም፡፡ ዐይናችሁ እያየ እርሻችሁ ላይ ያለውን እህል ባዕዳን ይዘርፋሉ፤ ዐይናቸው የሚያርፍበትን ነገር ሁሉ ያጠፋሉ፡፡ ⁸ የኢየሩሳሌም ከተማ እንደ እረኛ ጐጆ አንሳለች፤ የወይን እርሻ ላይ እንዳለ መጠለያ፣ በዱባ ተክል ውስጥ እንዳለ ጐጆና በጠላት እንደ ተከበበች ከተማ ሆናለች፡፡ ⁹ የሰራዊት ጌታ ያህዌ ከሕዝቡ ጥቂቱን ባያተርፍልን ኖሮ፣ እንደ ሰዶምና ገሞራ ከተሞች ሁላችንም እንጠፋ ነበር፡፡ ¹⁰ እናንተ የሰዶም ገዦች ያህዌ የሚነግራችሁን ስሙ! እናንተ የገሞራ ሰዎች የአምላካችንን ሕግ አድምጡ! ¹¹ ‹‹የመሥዋዕታችሁ ብዛት ለእኔ ምን ይረባኛል?›› ይላል ያህዌ፤ የአውራ በጐች ወይም የሰቡ እንቦሳዎችን የሚቃጠል መሥዋዕት አልፈልግም፡፡ የእንቦሳዎች፣ የበጐች ወይም የፍየሎች ደም ደስ አያሰኘኝም፡፡ ¹² እነዚህን ሥርዐቶች ሁሉ እየፈጸማችሁ እኔን ለማምለክ እንድትመጡና የመቅደሴን አደባባይ እንድትረግጡ የነገራችሁ ማን ነው? ¹³ ለእኔ ምንም ስለማይጠቅመኝ እነዚህን መባዎች አታምጡ! ካህናት የሚያቀርቡትን ዕጣን እጸየፋለሁ! የወር መባቻችሁን፣ ሰንበቶቻችሁንና በዓሎቻችሁን ከዐመፃችሁ የተነሣ እጠላለሁ፡፡ ¹⁴ የወር መባቻችሁንና በዓሎቻችሁን ሁሉ ጠልቻለሁ፤ እንደ ከባድ ሸክምም ሆነውብኛል፡፡ ¹⁵ ወደ እኔ ለመጸለይ እጆቻችሁን ስታነሡም ወደ እናንተ አልመለከትም፤ ዘወትር ወደ እኔ ብትጸልዩም አልሰማችሁም፤ ምክንያቱም እጆቻችሁ በገደላችኋቸው ሰዎች ደም ተበክለዋል ¹⁶ ልባችሁን ታጥባችሁ ንጹሕ ሁኑ፣ ክፉ ሥራችሁን ሁሉ አስወግዱ፡፡ ¹⁷ መልካምን ማድረግ ተማሩ፤ ሰዎች እውነትን እንዲያደርጉ አስተምሩ የተበደሉትን ታደጉ፤ ለድኻ አደጐችና ለመበለቶች ተሟገቱ፡፡›› ¹⁸ ያህዌ እንዲህ ይላል፤ ‹‹የምታደርጉትን አስቡ፤ ኀጢአታችሁ እንደ ዐለላ ቢቀላ እንደ በረዶ ይነጣል፤ እነደ ደም ቢቀላም፣ እንደ ባዘቶ ነጭ ይሆናል፡፡ ¹⁹ ለእኔ ብትታዘዙ፤ የምድርን በረከት ትበላላችሁ፤ ²⁰ እምቢ ብትሉኝና ብታምፁ ግን የጠላቶቻችሁ ሰይፍ ይበላችኋል›› ያህዌ ተናግሮአልና ይህ ይሆናል፡፡ ²¹ እናንተ የኢየሩሳሌም ሰዎች በአንድ ወቅት ያህዌን ብቻ በታማኝነት ታመልኩ ነበር፤ አሁን ግን ለባልዋ ታማኝ እንዳይደለች አመንዝራ ሆናችኋል፡፡ ነዋሪዎቹ ሁልጊዜ እውነትና ጽድቅ ያደርጉ ነበር አሁን ግን ከተማችሁ በነፍሰ ገዳዮች ተሞልታለች፡፡ ²² ብራችሁ ከእንግዲህ ንጹሕ አይደለም፡፡ ወይን ጠጃችሁ ከውሃ ጋር ተደባልቆአል፡፡ ²³ መሪዎቻችሁ ዐመፀኞችና የሌቦች ግብረ አበር ሆኑ፡፡ ሁሉም ገንዘብ ማግኘትና አድልዎ ለማድረግ ስጦታ ይፈልጋሉ፡፡ ለድኻ አደጐች አይቆሙም፤ መበለቶችንም መርዳት አይፈልጉም፡፡ ²⁴ ስለዚህ የሰራዊት ጌታ ያህዌ፣ የእስራኤል ኀያል እንዲህ ይላል፤ ‹‹ተቃዋሚዎቼን እበቀላለሁ፤ ጠላቶቼንም እቀጣለሁ፡፡ ²⁵ እጄን በእናንተ ላይ አነሣለሁ በጽኑ ቁጣም እቀጣችኋለሁ፡፡ ዝገታችሁን ለማስወገድ እንደ ብር አነጥራችኋለሁ፡፡ ²⁶ ከዚያ በኋላ እንደ ጥንቱ መልካም ፈራጆችን እሰጣችኋለሁ፤ እንደ ጥንቱ ዘመን መልካም መካሪዎች ይኖሩዋችኋል፡፡ ሰዎች ከተማችሁን የጽድቅ ከተማ፣ የታመነች ከተማ ብለው ይጠሩዋታል፡፡›› ²⁷ የኢየሩሳሌም ሰዎች ቅን የሆነውን በማድረጋቸው ያህዌ ከተማቸውን ይጠግናል፤ ንስሐ የሚገቡትንም በጽድቃቸው ያድናቸዋል፡፡ ²⁸ ዐመፀኞችና ኀጢአተኞችን ግን ያደቅቃል እርሱን የሚተውም ይጠፋሉ፡፡ ²⁹ የተቀደሱ ከምትሏቸው ወርካዎች በታች ጣዖቶችን በማምለካችሁ ታፍራላችሁ ደስ ተበሰኛችሁባቸው አትክልት ቦታዎችም ለጣዖቶች በመስገዳችሁ ትዋረዳላችሁ፡፡ ³⁰ ቅጠሉ እንደ ጠወለገ ታላቅ ወርካ፣ ውሃ ከማጣቱ የተነሣ እንደ ደረቀ አትክልት ቦታ ትሆናላችሁ፡፡ ³¹ ከእናንተ ብርቱዎች እንደ ደረቅ እንጨት ይሆናሉ ሥራቸውም እንደ ብልጭታ ይሆናል፡፡ እነርሱም ሆነ፣ ክፉ ሥራቸው ይቃጠላሉ እሳቱንም የሚያጠፋው የለም፡፡››