¹ Mpamunya Jesu wakatalika kubayisya muzikozyano, Wakati, ''Umwi mwalumi wakabyala muunda, wakabikka lubaya kuzinguluka muunda ooyo, alimwi wakasya kkomba lyakudinina waini Wakayak busanza bwasikulindilizya, wakaupa muunda ooyu kubalimi. Eelyo wakazwa wakali aalweendo. ² Aciindi ceelede, wakatuma muzike wakwe kubalimi kuti akatambule michelo imwi kuzwa kumuunda wakwe. ³ Pele bakamujata, bamuuma akumutanda wakapiluka cinkamaanza. ⁴ Alimwi wakatuma umwi muzike kuli mbabo, awalo bakamuuma kumusiya azilonda mumutwe akumupenzya cuusisya nsoni. ⁵ Wakatuma umwi , lino ooyo bakamujaya. Abamwi banji bakabatundulula mbumunya, bamwi kuumwa abamwi kujayigwa. ⁶ Lino wakacilijisi muntu omwe wakutuma, mwana muyandisi. Wakali wamamanino kutumwa kuli mbabo. Wakati, 'Ooyu mwanangu baya kumulemeka.''' ⁷ Pele balimi bakati kuli umwi aumwi wabo, ''Ooyu ngusimulya zina,. Amuboole , tumujaye, eelyo muunda uyakuba wesu.' ⁸ Eelyo bakamujata, bamujaya, bamusweela kunze amuunda. ⁹ Aboobo ulamuunda ulacita buti? Uyakuboola akabanyoone balimi akuupa muunda kuli bamwi. ¹⁰ Sena takwe nimwakabala malembe aaya? ''Ibbwe eelyo ndibakakaka bayaki lyakaba ndiibwe lyantalisyo. ¹¹ Eeci cakazwa ku Mwami, alimwi cilagambya mumeso eesu. ¹² Kuzwe boobo basololi bamajuuda bakayeeya nzila yakwaanga Jesu nkaambo bakali kuyeya kuti uzendekezya mbabo mutwaambyo. pele bakayowa mbungano yabantu yakali mpawo. Mpamunya bakabusiya busena bakeenda. ¹³ Mpamunya bakatuma bamwi baba Falisi abantu ba Helodi kuli nguwe kuti bakamujanine mulandu kwiinda mumajwi aakwe. ¹⁴ Nibakasika, bakati kuli nguwe, ''Omwiiyi, ibantu nzibayeeya tukonzyi kuzibikka mumoyo wako nkaambo takwe nutondeezya kutalulama kumuntu omwe-omwe. Masimpe ulayiisya nzila zyabululami bwa Leza. Sena cili mumulawo kutela mutelo kuli Siza naa pe? Tuleelede kubbadela naa pe?'' ¹⁵ Pele Jesu wakaziba kuti bamupa-upa ameso, eelyo wakati kuli mbabo, ''Nkaambo nzi mwaboola kundisunka? Amundeetele kkobeli eelyo kuti ndililange.'' ¹⁶ Bakaleta kkobeli lyomwe kuli Jesu. Wakati kuli mbabo, ''Ino ijisi mutwe wani alimwi bulembo bwani?'' Bakati, ''Mbubwa Siza.'' ¹⁷ Jesu wakati, ''Amupe Siza zyakwe Siza, akuli Leza zyakwe Leza.'' Bakagambwa kapati kuli nzyakaamba. ¹⁸ Abalo ba Saduki, aabo baamba kuti taakwe bubuke, bakasika kuli nguwe. Bakamubuzya, bakati, ¹⁹ ''Omwiiyi, Muusa wakatulembela kuti, 'Kuti umwi mwaalumi wafwidwa mwanikakwe musankwa, wasiya mukaintu katakwe mwana, ooyu mwaluumi weelede kukwata mukamufwu akakomezye bana bamunyina.' ²⁰ Kwakali bana bokwabo baluumi bali ciloba, wakusanguna wakakwata mwanakazi mpamunya walo wakafwa, takwe abana mbakasiya, ²¹ Mpamunya awabili wakamukwata , wakafwa katako mwana ngwakasiya, awalo watatu mbumunya biyo awalo wakafwa. ²² Boonse aaba bali ciloba bakafwa tibakasiya bana pe. Kumamanino aazintu zyoonse, awalo mwanakazi wakazikufwa. ²³ Mubuzuba bwakubuka, bakubuka alimwi, uyakuba mwanakazi wani? Nkaambo boonse bali ciloba mubwana bokwabo bakali mukwete.'' ²⁴ Jesu wakati kuli mbabo. ''Nkakaambo ncimusweekede, nkaambo tamwazi malembe nikuba nguzu zya Leza? ²⁵ Nkaambo bakubuka kuzwa kubafwu takukabi kukwatana, pele bayakuba mbuli bangelo bakujulu. ²⁶ Pele kumakani aabubuke bwabafwu , sena tiimwakabala na mubbuku lya muusa, lyaamba makani aaciteyo chiyaka mulilo, mbuli Leza mbwakambula kuli nguwe akuti, ' Ndime Leza wa Abraham, a Leza wa Isaki a Leza wa Jakobo'? ²⁷ Tali Leza wabafwide pe, pele ngu Leza wabaponi. Mulisweekede kapati nywebo.'' ²⁸ Umwi wabalembi wasika akuvwa nzibakali kwaamba; wakabona kuti Jesu wakabavwiila kabotu. Wakamubuzya kuti, ''Ino nguli mulawo mupati kumilawo yoonse?'' ²⁹ Wakavwiila Jesu wakati, ''Mulawo mupati ngooyu, 'Swilila ,O Isiliyeli, Mwami Leza wesu, ngu mwami alikke. ³⁰ Yanda Mwami Leza wako amoyo wako oonse, amuuya wako oonse, amizeezo yako yoonse anguzu zyako zyoonse.' ³¹ Imulawo wabili ngooyu, 'Weelede kuyanda simukobonyoko mbuli mbuliyanda omwini.' Takwe mulawo umbi wiinda yeeyi.'' ³² Mulembi wakati , ''Omwiiyi mubotu! Wamba masimpe kuti kuli Leza omwe biyo, alimwi taakwe uumbi kunze kwanguwe. ³³ Kumuyanda amooyo oonse akuvwisisisya a nguzu zyako zyoonse, akuyanda simukobonyoko mbuli mbuliyanda nkaambo eeci cilainda acipego acipaizyo.'' ³⁴ Lino Jesu naakabona kuti mulembi ooyu wapa bwiinguzi buluzi, wakati kuli nguwe, ''Tuli kulafwu pe abwami bwaLeza. Kuzwe boobo, takwe awakabuzya mubuzyo umwi alimwi. ³⁵ Jesu nakali kuyiisya mutempele , wakati, ''Balembi ba mulawo baamba buti kuti Kilisito uyakuzwa kulunyungu lwa mwami Davida? ³⁶ Davida lwakwe, nakanjidwe muuya usalala, wakaamba kuti, 'Mwami wakati ku Mwami wangu, ''Kkala kululyo lwangu kusikila ndikabikke basinkondonyoko kunsi amatende aako.''' ³⁷ Davida lwake , umwiita kuti 'Mwami,' ino inga kilisito ulaba buti mwanaa Davida?'' Bunji bwabantu bakaswiilila cakukodwa kuli nguwe. ³⁸ Mukuyiisya kwakwe Jesu wakati, ''Amucenjele abalembi ba mulawo, aabo bayandisya kuya bweenda kabasamide masani malafwu, akujuzigwa cakulemekwa mumisika, ³⁹ alimwi akukkala muzyuuno zyabulemu muma sinagogo, amumasena alemekwa lyamapobwe. ⁴⁰ Balacenga bamuka bafwu akubanyanzya mbono zyabo mumaanda, akulicengeezya kupaila mipailo milafwu kubantu kutegwa babonwe.Aaba bantu bayakutambula lubeta lupati kwiindilila.'' ⁴¹ Lino Jesu kakkede munsi aacitambwido camali mutempele; Wakali kulangilizya bantu nibakali kubikka mali muciyobwedo. Bavwubi banji bakawala mali manji. ⁴² Mpamunya umwi muka mufwu wasika akubbika tuli tobilo, twansiliva. ⁴³ Eelyo wakaita basikwiya bakwe wakati, ''Kasimpe ndamwaambila kuti mukamufwu mucete ooyu wapa kunji kwiinda boonse babikka muciyobwedo. ⁴⁴ Nkaambo boonse babikka tuniini kuzwa kubuvwubi bwabo. Pele ooyu mukamufwu, kuzwa kubucete bwakwe wabikka oonse nzyajisi mubumu bwakwe.