¹ Jesu wakazwa abusena oobo a kwiinka ku cisi caku Judiya alimwi kubusena buli kunze amulonga wa Jolodani, imbunga yabantu yakainka kuli nguwe alimwi. Wakakubaisya alimwi, mbuli cilengwa. ² Mpamunya ba Falisi bakainka kuli nguwe kuya kumusunka akumubuzya, ''Sena cili mumulawo kuti mulumi aleke mukaintu wakwe?'' ³ Wakavwiila wakati, ''Ino Muusa wakamwambila kuti nzi?'' ⁴ Bakamba kuti, ''Muusa wakazumizya mulumi kulemba cipepa cakulekana akumutanda.'' ⁵ Nkaambo kakuyuma kwamyoyo yanu ncakalembela mulawo ooyu,'' Jesu kuli wakati mbabo, ⁶ ''Pele kuzwa nakatalika kulenga, 'Leza wakabalenga mwalumi amwanakazi.' ⁷ Kumuzeezo yoyu mwalumi uyakubasiya bausyi abanyina akukkala amukaintu wakwe, ⁸ alimwi aaba bantu bobilo bayakuba nyama yoomwe,' ⁹ Aboobo eeco Leza ncaabikka antoomwe, takwe muntu uukonzya kucandaanya.'' ¹⁰ Nibakali mung'anda, basikwiiya bakwe bakamubuzya alimwi kukaambo aaka. ¹¹ Wakati kuli mbabo, ''Kufwumbwa yooyo uleka mwanakazi wakwe mpamunya wakwata umbi mwanakazi wacita cimambi kuli nguwe. ¹² Kuti naa mwanakazi waleka mulumakwe wakwatwa kumwalumi umbi wacita cimambi.'' ¹³ Mpamunya bakamuletela bana baniini kutegwa abagume, pele basikwiiya bakabakasya. ¹⁴ Eelyo Jesu nakazyiba ceeci, wakanyema akuti kuli mbabo, ''Amubazumizye bana baniini kuti baboole kuli ndime, mutabakasyi, nkaambo bwami bwa Leza mbwababo bali mbuli mbabo. ¹⁵ Kasimpe ndamwambila kuti, kufwumbwa utakatambuli bwami bwa Leza mbuli mwana muniini takalinjili. ¹⁶ Eelyo wakababweza bana akubabika mumaboko akwe akubaleleka mbuli mbwakatandabika maanza akwe alimbabo ¹⁷ Nakatalika lweendo lwakwe, mwalumi umwi wakabalikila kuli nguwe akumufwugamina akumububzya, ''Omwiiyi mubotu,ncizi ncindeelede kucita kutegwa ndikone bwami bwakujulu?'' ¹⁸ Jesu wakati, ''Nkaambo nzi ncondiita kuti omubotu? Kunyina naba omwe uluzi kunze kwa Leza alikke. ¹⁹ Muliizi milawo yamba kuti: Utajayi, utalaliki, utabbi, utabbi caluuni, utacengi, lemeka uso abanyoko.''' ²⁰ Mwalumi wakati, ''Omwiiyi, zyoonse eezi zintu ndakazi tobobela kuzwa ciindi nindakacili, mukubusi.'' ²¹ Jesu wakamulanga akumuyandisya. Wakati kuli nguwe, ''Ncintu comwe ncobulide. Welede kuuzya zintu zyoonse nzyojisi akuzyaba kubacete, uyakuba abuvwubi mukati kajulu. Wamana , unditobele.'' ²² Pele akaambo kabwinguzi mbwakapegwa wakaboneka kuusa mpamunya wakazwa abusena aawo kauside kapati, nkaambo wajisi mpasya zinji. ²³ Jesu wakalanga cakuzinguka a kuti kuli basikwiiya, ''Nciyumu buti kubavwubi kunjila bwami bwakujulu!'' ²⁴ Basikwiiya bakagambwa kumajwi aakwe. Pele Jesu wakati kuli mbabo alimwi, ''Nobana, nciyumu buti kunjila bwami bwakukujulu! ²⁵ Ncuba-uba kunkamela kunjila mu disyo lyanyeleti kwiinda muvwubi kunjila mubwami bwakujulu.'' ²⁶ Bakagambwa maningi akwaamba kuli umwi aumwi, ''Ino nguni ukonzya kufwutulwa?'' ²⁷ Wakabalanga Jesu akuti kuli mbabo, ''Kubantu nciyumu, pele kutali kuli Leza. Zintu zyoonse kuli Leza nzyuba-uba.'' ²⁸ Petulo wakatalika kwamba kuli nguwe, ''Langa, tasiya zyoonse akutobela nduwe.'' ²⁹ Jesu wakati, ''Ndamwaambila kasimpe kuti, taakwe naba omwe uusiya ng'anda, nibaba bainandumi, nibaba bacizyi, nibaba banyina, nibaba bausi, nibaba bana, niiba myuunda nkaambo kandime amulumbe ³⁰ utakatambuli zyiindi mwaanda mbuli mubunji bwacecino ciimo: Maanda, bainandumi, bacizyi, bamaama, bana, anyika nyabiyo, amunyika iboola . ³¹ Pele bunji bwabo bali kumpela, bayakuba kumamanino, abaabo bali kumamanino bayakuba kumpela.'' ³² Bakali munzila kabaya ku Jelusalemu, eelyo Jesu wakali kumpela lyabo. Basikwiya bakagambwa, aabo bakali kutobela musyule bakayoowa. Mpamunya Jesu wakabweza basikwiiya bali kkumi ababili kumbali akubaambila cakali kukozya kucitika kuli nguwe mukaindi kasyoonto. ³³ ''Amubone, tya kuumutala lya Jelusalemu, Imwanaa Muntu uyakwaabwa ku bapaizi bapati abalembi. Bayakulombozya kuti ajayigwe akumwaaba kuli basikalumamba. ³⁴ Bayakumusampaula, kumuswida mate, bayakukwabbaula limwi kulufwu. Pele mubuzuba bwatatu#, uyakubuka." ³⁵ Jemusi alimwi aJohani, bana ba Zebbedeya, bakaboola kuli Jesu bakati, ''Omwiiyi, tuyanda kuti utucitile kufwumbwa ncotutalombe kuli nduwe.'' ³⁶ Wakati kuli mbabo, ''Muyanda kuti ndimucitile nzi?'' ³⁷ Bakati, ''Tuzumizye tukkale anduwe mubulemu bwako, omwe kululyo lwako alimwi umwi kulumwesyi lwako.'' ³⁸ Pele Jesu wakabaingula wakati, ''Tamucizyi ncomulomba pe. Sena mulacikozya kunywa munkomeki njindiyanda kunywa, naa kubbizigwa alubbizyo ndundiyanda kubbizigwa?'' ³⁹ Bakati kuli nguwe, ''Tulacikonzya.'' Jesu wakati kuli mbabo, ''Nkomeki njindiyanda kunywa, mulanywa, alubbizyo ndundiyanda kubbizigwa, andinywe mulabbizigwa. ⁴⁰ Pele ooyo utakkale kululyo lwangu kufwumbwa kulumwesi lwangu takuli kwangu kupa, pele nkwabaabo bakabambilidwe.'' ⁴¹ Ino nibakavwa ceeci basikwiya bamwi bali kkumi, bakatalika kubanyemena ba Jemusi a Johani. ⁴² Jesu wakabaita kuli nguwe akuti, ''Mulibazi aabo baitwa kuti mbaleli balida amitwe yabantu alimwi beendelezi babo babelesya nguzu zyabo alimbabo ⁴³ Pele tacili munzila eeyi akati kanu. Kufwumbwa uyanda kuba mupati akati kanu weleede kuba mubelesi wanu, ⁴⁴ alimwi kufwumbwa uyanda kuba mutaanzi akati kanu weleede kuba muzike wa boonse. ⁴⁵ Mbukuli mwanaa muntu takazida kumaninwa mapenzi, pele kumanina bamwi, alimwi akupa bumi bwakwe kuti afwutule banji.'' ⁴⁶ Bakasika ku Jeliko. Lino mbwakazwa biyo mu Jeliko abasikwiiya bakwe ambungano mpati, mwanaa Temiyasi, uutegwa Batimaneyasi, moofwu mulombi, wakali kkede kumbali lyamugwagwa. ⁴⁷ Lino nakavwa kuti ngu Jesu waku Nazaleti, wakatalika koompolola akuti, ''Jesu, Omwanaa Davidi, ndifwide luzyalo!'' ⁴⁸ Bantu banji bakamukasya kwambula akumwambila kuti aumune. Pele wakaindilizya kulila cakujinka, ''Omwanaa Davidi, kondifwida luzyalo!'' ⁴⁹ Jesu wakaima akwaamba kuti ayiitwe. Bakamwita ooyu moofwu, akuti, ''Kkondwa! Imikila! Ulakwiita.'' ⁵⁰ Wakasowa cibaki cakwe aambali, wakanyampuka, akuya kuli Jesu. ⁵¹ Jesu wakavwuwa wakati, ''Uyanda kuti ndikucitile nzi?'' Ooyu mwalumi moofwu wakati kuli nguwe, ''Mwiiyi, ndiyanda kuti ndibone.'' ⁵² Eelyo Jesu wakati kuli nguwe, ''Lusyomo lwako lwakufwutula.'' Mpamunya-mpamunya wakalanga alimwi, akumutobela mumugwagwa.