¹ Lau ba tohotohogu, lau ese Keriso na tohotohoamu hegeregerena. ² harihari na hanamomuimu badina be gau iboudiai olalolaigumu, bona hahediba herevadia, na abi bena na henimui gaudia o badinadia tarikatarikamu. ³ Harihari nauramu badiba, tatau iboudiai kwaradia na Keriso, hahine kwarana na tau, Keriso kwarana be Dirava. ⁴ Tau e gurigurimu eiava e perovetamu negadia ai kwarana e kumiamu, una na kwarana ehadikaiamu. ⁵ A hahine e gurigurimu eiava e perovetamu negadia ai kwarana sekumiamu, ia danu kwarana ehadikaiamu, ia na kwarana e nahuamu hahinena hegeregerena. ⁶ Badina be hahine ta ese kwarana basine kumia, ia huina do bae utua, a huina iutuna eiava kwarana inauna bema mai hemaraina, hahine ese kwarana bema kumia. ⁷ A tau ese kwarana baine mukoa na dia namo, badina be Ia na Dirava ihagoina tauna bona Dirava hairaina. A hahine be tau hairaina. ⁸ Badina be tau na hahine ena amo sevara, a hahine hari, tau ena amo e vara, ⁹ bona tau na sekaraia hahine ena, a hahine hari e karaia tau ena. ¹⁰ Una dainai hahine ena siahu toana kwarana ai baine mia, aneru daidiai. ¹¹ Gau tamona, hahine na dia sibona, a tau ida, bona tau na dia sibona, a hahine ida, Lohiabada lalonai. ¹² Badina be hahine na tau dainai vada e vara, a tau be hahine ena amo e varamu. A gau iboudiai na Dirava dainai e varamu. ¹³ Sibomui ba haeroa. Hahine be kwarana asi ikumilaina Dirava baine guria namo eiava? ¹⁴ Lalomui asie pararamu a, tau huina baine lata na hemarai gauna ienai. ¹⁵ a hahine huina baine lata na hairai gauna iena? badina be huina latana amo kwarana baine kumia. ¹⁶ A ta ese ina hereva baine gwaua tubu, egu haere binai: ai na kara idauna ta asi dibamai, bona Dirava ena ekalesia oreadia danu asi dibadia ¹⁷ Egu hahedua binai na henimuimu, asina hanamomuimu, badina be emui hebou amo namo ta sevaramu, a dika mo evaramu. ¹⁸ Hereva ginigunana binai: Lau na name kamonai emui ekalesia heboudia lalodiai heiriheiri evaramu bogaragimui ai. Una sivarai kahana na abia daemu. ¹⁹ Badina be lalohadai idauidau bogaragimui ai ba vara; bena mai edia lalohadai namo dia taudia emui ai bae hedinarai. ²⁰ Emui hebou negadia ai, Lohiabada ena anibou asio ania momokanimu. ²¹ Badina be tau-ana, tau-ana oanimu, una dainai haida e hitolomu, ma haida e kekeromu. ²² Be! Asi emui ruma a? unuseni ai boma aniani bona boma inuinu. Dirava ena ekalesia ihi-ihiraina bona ogogami taudia ihahemaraidia ouramu a? Ede baina hereva henimui toma a? Baina hanamomui a? Lasi vaitani. ²³ Badina be Lohiabada ena amo na abia umui na hamaorolaimui dalana binai; taona e torea hanuaboina ai, Lohiabada Iesu ese Flaoa atagana ta eabia, ²⁴ e hanamoa, bena e bitua, eto "Lau taugu binai, umui daimui ai baine makohi, ini bakara toma, lau ba lalogu." ²⁵ Unu hetomana danu, e aniani vaitani murinai ia ese kehere eabia , bena ma eto, "Ina kereher na herohemaino matamatana lau raragu ai, ba inua negadia ai ini bakara toma, lau ba lalogu." ²⁶ Una dainai, ina Flaoa atagana bavania bona ina kehere ba inua negadiai iboudiai na umui ese Lohiabada ena mase ba hahedinaraia, ela bona Ia do bainema. ²⁷ Benaini, tauta ese ina Flaoa atagana baine ania bona ina kehere baine inua kerere, Ia ese Lohiabada tau-anina bona rarana baine hadika. ²⁸ Tauta lalona baine tahua guna, bena ataga baine ania bona kehere baine inua. ²⁹ Badina be eania kavamu bona einua kavamu, se laloamu una na Lohiabada tau-anina, tauna ese Ia sibona ihahemaoro henina e aniamu bona e inuamu. ³⁰ Badina bunai hutuma umui bogaragimui ai e manoka-manokamu bona e gorerediamu, haida danu e masemu. ³¹ A ita siboda laloda baitama tahu, hahemaoro na edai basinema kau. ³² Gau tamona Lohiabada ese e hahemaoro henidamu, matada ihakanidia, ita bona tanobada baita dika bou na garina. ³³ Una dainai, varavaragu e, anibou dainai ba hebou negadia ai, ba henari heheni. ³⁴ Ta bema hitolo, Ia na ena ruma ai bema aniani, hahemaoro ai ba dika bou na garina. Hereva oredia do bae mia ela bona baina vasi, bena bain hamaoromaoroa.