¹ Nango embota uru pemi ami jorerari eto anagota samuna avo angere ai toaro vai ami ta pe re samuna ami ufuja. Nangota pikithi ai akari hijeri amiha avo humbati nango pitapa thoekatora. ² Nango Jesu ta ke avo ingeti-ingeti ue mohore, amita pe re Jesu re kepe ari ta susu eto pure akari amita susu ra. Amite pe avo Mama ari embo mi hanaina ari hijeri amiha avo humbati ivo pe ue i faira ai meme re sokakare me re kiae, avo sinikati Jesu ivo pe aja. Eto Bada Jesu re Mama peimi amita ingere pe ai arumba ansa ai akari arumbari ra. ³ Ato eto Bada Jesu othembevo amita pe re samuna embo mi amita samuna ea, avo embo ningota jo mane toavo vati uja te uketo tanini evo. ⁴ Nangota samuna ai Bada Jesu, nangota ando ai sasaha kuthena eto meme humbuna, nangota samuna ai. ⁵ Eto nango Mama peimi ta undi meni avo kiae ora eto jene ambu ora. Mama peimi ija: " Nau meni mane ejefa eto othembati ova, Jesu mi nango au tambu arae uja kivo." ⁶ Bada Jesu mi nango pitapa avo tunga ufuja, amita thane hijeri aro embo. Bada Jesu mi nango pitapa ufue re nangota meme hijouja. ⁷ Mama peimi mi ija, meme kame avo sini karae ija. Mama nimo au tambu ae ie re eto amita meni undi ija. Eto amita meni Jesu mi amuntu uja avo Mama peimi mi thane hijae? ⁸ Rate nimo Mama ta thane hijeri avo jikae oa avire, mamone ufo emone ambu ara-ira re ova. ⁹ Nango iso pe eto juju ambu eto nangota enda aija Mama ami nangota e thane hijora otofu ue thane avo jikore. Nango eto kito Mama ta ahihi ta thembai evore eto mohore? ¹⁰ Nangota endata Mama thafo ami thane hijora avire iji tufo ta thane avo hijoro kito othemba rae eto ambo-ambo arae. Eto Mama unga tofa ami nango tae thane hijou ja avire nangota akari avo eto. Eto Mama ta otofu ari thembai mohorae ija. ¹¹ Eto Mama unga tofo amita thane hijeri avo thoungatora avo Mama mimeme hijeti uja. Rate iji ambo ai, nango peka akarita i pe piji retora. Embo avo ivaja ari embo ami akari re humbati ora. ¹² Avo embo ningo ta ingere eto kova pandeva avo evo ivo vuvuroi. ¹³ Ningota utu ami reki evo tambuai, nio utu pandeva ari avo, avo kosari humbai. ¹⁴ Embo petapa amikao peka ai mihivo, eto nimo otofu ari mihe evire, Bada mane keti oa. ¹⁵ Eto kivo, embo eni eni ami, Mama ta hondate ari avo mihae ora. Eto avo sokaka eto pesusa avo mane pe pajikati uja. Eto avo mane ao sokaka pijati uja kivo. Eto ari emi mane avo sokaka re pijati uja. ¹⁶ Eto kivo aja vija, ahihi mihae embo Esau angari ami tofota nameni avo toraija. Eto minderi hijeri iji ai, Esau, nameni tofota pe avo turuja. Amita pe re Abel mi minderi akari avo Mama peimi ta overe hijouja. ¹⁷ Amita pe re iji ambo ai, Esau mi Cain ta akari avo humbati ue ari avire uja. Esau avo kusikoro ra, amita pe re, samuna uja avo vujekari ta jene avo humbae ra, eto sisivu kao pambuhuja avo kivo. ¹⁸ Eto nimo eha ei mane ohuto tonda eni avo thamontea, i jeva peri, mume kambijoro, eto va fi te humburute. ¹⁹ Eto tumama piji huja amita joai, Mama peimi ke ija eto Mama ari embo ke ija avo thoro au ingeti uje ae ora. ²⁰ Eto Mama peimi ke ija avo mane aro peimi ajae uje ae ora. Eto o fu ami mane fito tiri thambai jae uje ae, avo aro re koro ami tatora. ²¹ Eto ke evi joru take ra, angere ufo ufo Moses mi ija, namo jithuthu ue jeneki foneki ona kivo. ²² Avo embo, nimo tiri Zion ai vuvujo eto Mama peimi amita nai eto ungata na Jerusalem eto Mama ta anera ototofu injemeni kanjemeni ta joai. ²³ Eto embo avo giu pari embo eto meni kithange eto avo kajari ungai mehei. Mama ta ahihi ai amehera amite embo akakari avo ehere akari pe ara. ²⁴ Eto Bada Jesu ke ivaja ari nai, ati ari nai Abel ta sasaha ami ke ija. ²⁵ Eto kijo eto ingijo ke avo ija eto mane jeneki foneki atova. Eto ke mane ingeti uje ae eto joru pambati ora amita pe re embo enda ai hijeri amiha ami ke re era amara ingivo. Angato ue avo Mama ari embo peimi ungata ami ke pirisa ija avo ingae ova kivo. ²⁶ Eto iji tapa ami Mama ta ke povu te ami ke ei enda umo pitapa avo ujiji ta ujiji pere ea. ²⁷ Rate Mama mi ke amita amuntu ati ari avo ija. Eto Mama ta ke ami ujiji uja-au mihae uja. ²⁸ Nango embo avo Mama ta ke povu pe ami ujiji ae avire angato mehentora, eto ujiji eheija avire sivati ora. ²⁹ Mama peimi re i jeva aija fuikuruja kivo.