¹ Iau Pol natamtamaol nakalabus page napasis ke Krais Jisas.Iau emilua waera Timoti emgingin me navore nalaulau eniko iwot kiom Pilimon, iom iem waem nalnge me ita rourata tingtia. ² Iau navore nalaulau ila ke Apia pau, ie ita waera neiwe tia me page Akipus ie napalpunga tame tia kita page napalpunga ke Natavolo. Me iau navore pau pagire naoguaingare ke narumpua soknge tiluplup ke nania kiom. ³ Nakewainga me nate tawainga ke Natavolo ita tamara me Ainge Jisas Krais isou pa arenge agingin. ⁴ Nae vunovuno iau navul savurim ilake Natavolo me napavulvule Natavolo pagami ke iau lekvetanga. ⁵ Iau nalongo vileko so iom kukim kimre natamtamaol ke Natavolo ngata me iom kuoguai ngata page Jisas ie Ainge. ⁶ Iau sevaio napavul vileko so nalupnga kiom me iem isoupa ikeve naoguainga kita ke ipapote naremo nalnga kita me ita pa tanal pagire navunga nalgare sogan ita tatokore ke Krais. ⁷ Waek natamtam, iau tinik igelgel me atek i tawai ngata, page aisae,me iom kukim kimre ire natamtamaol neigur ainge ke Natavolo me page nangol eko iom kupavotvote ire relmore. ⁸ Eta, tagule iau votvotik ngata luila ke Krais ke nakeve nangonga pagom page nasae iom i soupa kukeve, ⁹ Me page nagol ke nakimnga page tia pau ikaukauke tamulua, eta iau nangongo moiau pagom. Iau Pol, iau akolman o,me ailiakoko iau nakarabus page nourata ke Krais Jisas. ¹⁰ Ailiakoko iau navetaom page iau lekmelamela Onesimus, iau napautae page nagol ke Krais ke nasau elo iau nagingin ke karabus. 1 Muga ie ikeve iom lemourata nalnge tia avo, me ailiakoko ikeve nourata popue kiom me kiau pau. ¹² Ailiakoko iau nagulo mule iwot kiom me iau atek ikono kie. ¹³ Iau nakim so nalitae isio kiau so ikeve iom lemourata so ipauloau page nasau iau nagingin ke karabus page nourata ke naliwolnga nangonga ke Natavolo. ¹⁴ Me iau tinik so nakep sape nagol tia me iom remom siange avo. Me iau nakime navunga popue iom kukeve pagau avo, popue ngata so iom kukeve page iom remon. ¹⁵ Paso page pua eniko Onesimas ikorarangaom nasau polia volem. Page navunga erio tipot eio iom pa kutoko mule iwot kiom ta amilua agingin nae vunovuno. 6 Ie nourata tame sapa tiavo, me ie ila ngata page nourata tame sapa, ie iwai iom waem natamtam popue. Iau nakime ngata me iau nawotai so iom pa kukime ie pau ngata, luila ke anuwa me luila ke Ainge. ¹⁷ Eniko vileko meso iom, kutokoau nawai iom waem, popue so atoke ie pau iwai iami akeve pagau. ¹⁸ Me songe ie ikep siange pagom, avo me itoko navun kiom, popue ngata so kuliwol`iau ta naronre iom lemvulnga. ¹⁹ Iau Pol, iau navore nangonga eniko page iau vagek. Me iau pa nakole me narone navun kiom. Iau isoupa navuliom vileko, iom lembva navun kiau me eniko navun ke namamatanga kiom. Me iau tinik so navuliom vileko avo. ²⁰ Onauna ngata iau waek natamta, iom isoupa kukeve navunga tea pagau page Ainge epasis. Tamulua tagingin luila ke Krais me page nagol eko iom sevaio kukeve iau relmok popue. ²¹ Iau nawotai popue vileko so iom pa kuwatae nangonga eta iau navore nalaulau iwot kiom. Iau nanal vileko so iom pa kukeve navunga songan ngata tilangata page navulnga iau navuliom so kukevire. ²² Me nangonga tiapau so navule,iom sevaio kulaupotole iau mulik knge iom lemnia paso iau nakono knge. Iau naoguai so Natavolo pa ilonge iami limipavulnga me ie pa igulowau namule nami kiami. ²³ Epapras, ie iau waek me ie pau isio wai kalabus etamtamaol ke Krais Jisas. Ie ivul aigule pagom. ²⁴ Me page vileko Mak, Aritakus,Demas me Luk,eio emrengere lemaurata tiavolem, ire pau tivul aigule pangom. ²⁵ Nakewainga ke Ainge Jisas Krais pa igingin ke iom anunim.Onauna.