¹ 1 परमेश्वरके सामने और जिन्दा और मरेनको इन्साफ करन आनबारो ख्रीष्ट येशूके सामने, और बाको आगमन और राज्यके ध्यानमे धरके मए तुमके कडा आज्ञा देत हौँ, ² 2 वचन प्रचार करओ, समय और बेसमयमे तत्पर वैठओ, अर्ती देओ, हप्काओ, उत्साह देओ, और धैर्यमे और शिक्षा देन बारी बातमे मत चुकओ| ³ काहेकी अइसो समय आए रहोहए, जब बे ठीक शिक्षाके ना सहान बारे होमंगे, पर अपनएऔर के मन पणि बात इकल्लो सुनन चाहंगे, और अपने रुचीअनुसार शिक्षा थुपारंगे, ⁴ और सत्य बात सुननसे बारए जए हँए, कहानी घेन घुमके चले जए हँए| ⁵ तुम त दरिलो होबओ| कष्ट भोगओ, प्रचारको काम करओ, और तुमर सेवाको काम पुरा करओ| ⁶ 6 काहेकी, मए त पुजनाके रुपमे अर्पण होन लागो हौ, और बिदाइको बेरा आइ गओ हए|| ⁷ 7 मए उत्तम लणई लणो हौँ| मए दौड सकाए डारो हौँ| मए विश्वासके बचाए रहो हौ| ⁸ 8 अब उप्रान्त मिर ताहिँ धार्मिकताको मुकुट धरोहए, जो धार्मिकताको न्यायधीश प्रभु बा दिन मोके देबैगो, और मोके इकल्लो नाए, पर बाको पुनरागमन प्रिय मानन् बारे सबके देबैगो| ⁹ 9 मेरे ठिन आनके भरमजगदुर कोसिस करओ| ¹⁰ 10 काहेकी डेमास जा वर्तमान संसारके प्रेम करी मोके त्यागके बा थेस्लोनिकेमे गओ हए| क्रेसेन्स गलातियामे गए हँए, तीतस त दलमातियामे| ¹¹ लुका इकल्लो मिर संग हए| मर्कूसके ढुणके तुमरे संगए लाबओ, काहेकी बा मिर सेवा करनमे खुबए जुगणी हए| ¹² पर तुखिकसके मए एफिससमे पाठओ हौँ| ¹³ त्रोआसमे कार्पस ठिन मए छुडो पिछौडा और किताबनके विशेष करके चर्मपत्रनके तुम आत तुमरे संग लैके आओ ¹⁴ तमौटे अलेक्जेन्डर मोके बहुतए खराबी करी| प्रभु बाके बाको कामअनुसार बदला देबैगो| ¹⁵ बासे तुम फिर होशियार वैठओ, काहेकी बा हमर प्रचारको घोर विरोध करी| ¹⁶ मिर पहिलो प्रतिवादमे कोइ मिर पक्ष लै ना, पर सब मोके त्यागीँ जा बातको दोष बिनके ना लागए ! ¹⁷ पर सब अन्यजाति सुन सकएँ कहिके प्रभु मेरे सँगमे खणा भव, और सबए रुपसे वचनको धोषणा करन मोके शक्ति दै| और मए बघटाको मुहूसे छुटकारा पओ| ¹⁸ प्रभु मोके सब खराबीसे जुगाई हए, और बाको स्वर्गीय राज्यके ताहिँ मोके उध्दार करैगो| बाके सदासर्वदा महिमा होबए| आमेन| ¹⁹ प्रिस्कीला और अकिलासके और ओनेसिफरसके घरानाके अभिवादन कहिदिओ| ²⁰ इरास्तस कोरिन्थमे रहए, त्रोफिमसके त मए मिलेटसमे बिमारी अवस्थामे छोणो| ²¹ हिउँत अग्गु आनके भरसक्त कोसिस करओ| युबुलस तुमके अभिबादन पठाइ हए, और पुडेस, लिनस, क्लौडिया और सब भैया फिर| ²² प्रभु तुमर आत्मा संग रहबए| तुमरसंग अनुग्रह रहबए|