¹ Ooyu mulawu wachipayizyo chakubisya. Ulasalalisya loko. ² Baleelede kujaya chipayizyo chakubisya chijayidwe nkukooko kubusena bwakujiila, alimwi baleelede kiusansiila gazi lyacho akuzyunguluka koonse achipayililo. ³ Woonse mafuta aacho alimukati kacho apayizigwe: amafuta amuchila, amafuta aali aatala azyamukati, ⁴ ansa zyobile alimwi amafuta ali aatala lyazyo, eezyo zibambene kuchikungu, azivumbide chini, aantomwe ansa - zyoonse eezi zillelede kugwisigwa. ⁵ Mupayizi uleelede kuzitenta zipanzi eezi achipayililo mbuli chipayizyo chachitwa aamulilo kuli Jehova. Eechi nchechipayizyo chakubisya. ⁶ Woonse mwaalumi aakati kabapayizi balakonzya kukya chipanzi chachipayizyo eechi. Cheelede kulyidwa mubusena busalala nkaambo chilasalalisya. ⁷ Chipayizyo chachibi chilakozyania achipayizyo chakubisya. Mulawu omwe ngubeleka kuli zyobile. Nzyabapayizi aabo bachita kubwedezyania ambabo. ⁸ Mupayizi upayila chipayizyo chamuntu chakutenta ngawajana chitobo chakwe kuchipayizyo eecho. ⁹ Choonse chipayizyo chabusu eecho chikangwa achikangilo, alimwi choonse chipayizyo chiliboobo chijikwa muchikangilo na muchiyokelo chiyooba chamupayizi ooyo uchipayila. ¹⁰ Choonse chipayilo chazilyo, chibe chiyumu na chiswanizigilwe amafuta, mubweelene chilaba chalunyungu loonse lwa Aloni. ¹¹ Ooyu ngomulawu wachituzyo chazipayilo zyalumuno eezyo bantu nzibayoopa kuli Jehova. ¹² Na umwi wapa kuti ape kulumba, mpawo uleelede kuchipa kachili achituzyo chazibunge zipangidwe kazitakwe busweezyo, pesi nkachivweelene amafuta, azibunge zipangidwe kazitakwe busweezyo, pesi zinanikidwe amafuta, alimwi azibunge zipangidwe abusu bunante oobo buvweelene amafuta. ¹³ Alubo akaambo kakupa kulumba, uleelede kuchipa aantomwe achipayizyo chalumuno chazibunge zyazinkwa zipangidwe a busweezyo. ¹⁴ Uleelede kupa umwi awumwi wamisyobo yazipayizyo eezi mbuli chipayizyo chapedekezegwa kuli Jehova. Chinoli chabapayizi aabo basansiila gazi lyazipayizyo zyalumuno achipayililo. ¹⁵ Muntu uutula chipayizyo chalumuno nkaambo kakupa kulumba uleelede kulya nyama yachipayizyo chakwe muzuba lyakupayila. Tayelede kusiya chintu kulinchicho kusikila mubuzuba butobela chifumo. ¹⁶ Pesi na chituzyo chachipayizyo chakwe nchakaambo kachikonke, na kaambo kakupa chakulimvwida mumoyo, nyama ileelede kulyigwa muzuba eelyo ndyaapa chituzyo chakwe, pesi kufumbwa zichaala kulinchicho zilakonzya kulyigwa muzuba litobela. ¹⁷ Nikubaboobo, kufumbwa nyama yachituzyo iisyala muzuba lyatatu ileelede kutentwa. ¹⁸ Na imwi nyama yachituzyo chawumwi chachipayizyo chalumuno yalyigwa muzuba lyatatu, tikoyootambulika pe, nikuba tikoyoopedekezegwa kuli yoyo wiipayilila. Chilaba chintu chisesemya , alimwi muntu ooyo uchilya uyobweza mulandu wachibi chakwe. ¹⁹ Kufumbwa inyama iguma chintu chisofweede tiyeelede kulyigwa pe. Yeelede kutentwa. Kuli yoonse nyama, muntu uuleleme ulakonzya kwiilya. ²⁰ Akubaboobo, usofweede uulya nyama izwa kuchituzyo chachipayizyo chalumuno echo cha Jehova - ooyo muntu uleelede kutandwa kuzwa kubantu ba kulimbabo. ²¹ Na umwi wajata kufumbwa chintu chisofweede - nibuba busofwazi bwamuntu nibuba bwamunyama uusofwede na busofwazi, chintu chisesemya - alimwi na walya nyama yachipayililo chachituzyo chalumuno eecho cha Jehova, ooyo muntu uleelede kutandwa kuzwa kubantu bakulimbabo.''' ²² Mpawo Jehova wakaambula kuli Mozesi, kati, ²³ ''Ambila bana ba Izilayeli alimwi utedi, 'Tamweelede kulya mafuta a n'ombe, mbelele, na mpongo. ²⁴ Mafuta amunyama uufwa nkatali chipayizyo, na mafuta amunyama waumwa abanyama bamulusaka alakonzya kubelesegwa kulizimwi, pesi tamweelede kumulya pe chanchoonzyo. ²⁵ Kufumbwa uulya mafuta amunyama ayo muntu ngapayizya mbuli chituzyo chakutentwa kuli Jehova, ooyo muntu weelede kutandwa kuzwa kubantu bakulimbabo. ²⁶ Tamweelede kulya gazi abuniini mumakkalilo anu, nikuba lizwa kukayuni na munyama. ²⁷ Kufumbwa ooyo uulya gazi, ooyo muntu weelede kutandwa kuzwa kubantu bakulimbabo.''' ²⁸ Akaako Jehova wakaambula kuli Mozesi alimwi wati. ²⁹ ''Ko bambila bantu ba Izilayeli akuti, 'Ooyo uupa chipayizyo chalimuno kuli Jehova weelede kweeta chipanzi cha chipayizyo chakwe kuli Jehova. ³⁰ Chipayizyo cha Jehova chichitwe amulilo, maboko aakwe mwini akacheete. Weelede kweeta mafuta aantomwe alukkolo, kuchitila kuti lukkolo lukavukuuzigwe mbuli chipayizyo chachivukuuzyo kunembo lya Jehova. ³¹ Mupayizi uleelede kutenta mafuta achipayililo, pesi lukkolo luyooba lwa Aloni alunyungu lwakwe. ³² Mweelede kupa chibelo chamweendo wachikungu wakuchilisyo ku mupayizi mbuli chipayizyo kuzwa kuchituzyo chazipayizyo zyalumuno. ³³ Mupayizi, umwi walunyungu lwa Aloni, ooyo uupa igazi lya zipayizyo zyalumuno alimwi amafuta - ulajana chibelo chakuchilisyo mbuli chibeela chakwe chachipayizyo. ³⁴ Nkaambo ndabweza kuzwa kubantu ba Izilayeli, ilukkolo lwachipayizyo chachivukuuzyo, alimwi chibelo nzenzizyo zyakasangwa, alimwi zyakapegwa kuli Aloni mupayizi abana bakwe mbuli chaabilo chabo chamazuba woonse. ³⁵ Eechi nchinchicho chaabilo cha Aloni abalunyungu lwakwe kuzwa kuzipayizyo zya Jehova zichitwa amulilo, muzuba eelyo Mozesi nakazipedekezya kuli Jehova mumulimu wamupayizi. ³⁶ Eechi nchenchicho chaabilo eecho Jehova nchakalayilila kuti bachipegwe kuzwa kubantu ba Izilayeli, mubuzuba oobo mbwakananika bapayizi. Chinookede kachili chabilo chabo lyoonse kwiinda kumazyalane woonse. ³⁷ Ooyu ngomulawu wachipayizyo chakutenta, chachipayizyo chazilyo, chachipayizyo chachibi, chipayizyo chakubisya, chipayizyo chakusalizya, alimwi achituzyo chazipayizyo chalumuno, ³⁸ abo Jehova mbakapa milawu kuli Mozesi aatala achilundu cha Sinayi mubuzuba oobo mbwakalayilila bantu ba Izilayeli kuti batule zipayizyo zyabo kuli Jehova munkanda ya Sinayi.'''