¹ Namuntu wabisya nkambo kakuti takwepe naapa bukamboni bwazeezyo nzyakabona nzyakelede kupa bukamboni, kazitakwe kuti wakazibona na wakazimvwa biyo atala nzizyo, uyoba simulandu. ² Na kuti umwi waguma nichiba chilibuti echo Leza nchakaamba kuti chilisofwede, kazitakwe kuti mafuwa achinyama chisofwede nakuti mafuwa achinyama chivuubwa nakuti munyama uyavula aansi, nikuba kuti takwe nakezi kuti ninzi nzyakachita, unoli wasofwaala alubo waba simulandu. ³ Nikuba kuti waguma busofwazi bwaumwi, kufumbwa busofwazi, alubo kuti wazichita mukutaziba, alimwi uyoba simulandu awo kupela nayoziba atala anchicho. ⁴ Na kuti umwi wakonka chakufwambana amulomo wakwe kachita zitaluleme, na kuchita ziluleme, kufumbwa kuti chilibiyeni echo muntu nchakonka chakufwambana muchikonke, nikuba kuti takwepe nchezi atala nchiicho, awo nayoziba atala nchicho, mpawo uyoba simulandu, kufumbwa kulichimwi chazeezi. ⁵ Kuti muntu waba simulandu mulichimwi chazeezi zintu, uyelede kulila kufumbwa chibi nchakabisya. ⁶ Mpawo uyelede kweeta chituuzyo chezibi kuli Yahuwe kachili chezibi nzyakachita, kanyama kazyaazi kezivuubwa nikaba kabelele nakuti kapongo, nchituuzyo chezibi, alimwi mupayizi uyochita chipayizyo chakulekelelwa kwazibi zyakwe. ⁷ Kuti katakonzyi kuula kabelele, elyo ulelede kweta chituuzyo chezibi kazili inziba zyobile nakuti bana benkwilimba kuli Yahuwe, omwe ngwechituuzyo chezibi oyumwi ngwechituuzyo chitentwa. ⁸ Ulelede kuzyeta kumupayizi, nguwe uyopa chimwi chitaanzi kacxhili chituuzyo chezibi - uyonengetezya mutwe kuzwa kunsingo pesi takoyodyunkula chakumaninizya pe kuzwa kuchitimbitimbi. ⁹ Elyo uyosansiila bumwi bulowa bwechituzyo chezibi kubbazu limwi lyechipayililo, mpawo uyominununa bumwi boonse bulowa kuzwa etako lyechipayililo. Echi nchituuzyo chimaninsya milandu. ¹⁰ Mpawo uyelede kuyopeda kayuni kabili mbuli chituuzyo chitentwa, mbuli mbokwambidwe mumalayilile, alimwi mupayizi uyopanga chipayililo chakwe chezibi ezyo nzyakachita, alimwi oyo muntu uyolekelelwa. ¹¹ Ikuti katakonzyi kuyowula inziba zibili nikuba bana benkwilimba bobile, elyo ulelede kweeta chekkumi chabusu bunante mbuli chipayizyo chezibi zyakwe, tayelede kubika mafuta nikuba tununkilizyo alinchicho, nkambo nchituuzyo chezibi. ¹² Uyelede kucheeta kumupayizi, alimwi mupayizi uyofonkola ijanza lizwide lyabusu kabwiminina chituuzyo alimwi akabutente achipayililo, ejulu azituuzyo zipangwa amulilo wa Yahuwe. Echi nchituuzyo chezibi. ¹³ Mupayizi uyochita chipayizyo chezibi kufumbwa oyomuntu nzyakachita, alimwi muntu oyo uyolekelelwa. Ezyo zitakasyale kuchituuzyo ziyoba zyamupayizi, mbubonya mbuli chituuzyo chamayiila.'' ¹⁴ Mpawo Yahuwe wakambula a Mozesi, wakati, ¹⁵ ''Na muntu wabisya alimwi wachita mukutasyomekana mubwendelene azintu ezyo zyakwa Yahuwe, pesi wazichita katayandide obo, elyo ulelede kweeta chituuzyo chakwe chezibi kuli Yahuwe. Echi chituuzyo chelede kuba mugutu utakwe kampenda kuzwa kubutanga; bulemu bwacho bwelede kuba nsiliva amashekeli --akuchisalazizyo --mbuli chituuzyo chezibi. ¹⁶ Ulelede kukkutikania Yahuwe kulezyo nzyakabisya mukuswanana azezyo zisalala, alimwi welede kuyungizya kamwi kampanzi kuli nchicho akuyopa mupayizi. Alimwi mupayizi uyochita chipayizyo chakwe amugutu oyo wechituuzyo chakwe amugutu oyo wechituuzyo chezibi, alimwi oyo muntu uyolekelelwa. ¹⁷ Ikuti umwi wabisya mukuchita kufumbwa ezyo Yahuwe nzyakalayilila kuti zitanochitwi, nikuba kuti wazichita mukutaziba, unoli waba sizibi alimwi ulelede kulinyampwida mulandu wakwe. ¹⁸ Uyelede kweeta mugutu utakwe kampenda kechibi kuzwa mubutanga, kazyendelana amuulo wamazubaayo, mbuli chituuzyo chezibi kumupayizi. Alimwi mupayizi uyochita chipayizyo chakwe kazyendelana ezibi nzyakabisya, azeziya nzyakabisya mukutaziba, alimwi uyolekelelwa. ¹⁹ Eechi nchituuzyo chamilandu, alimwi unoli ngusizibi kunembo lya Yahuwe.''