الأصْحَاحْ 1
1
مِنْ يُوحَنَّا الْشِّيخْ إلَى غَايُوسْ الْحَبِيبْ إللِّي آنِي أحِبَّهْ حَجِيجِي.
2
يَا مَحْبُوبْ، عَاوْزَكْ إتْكونْ مُوَفَّجْ في كِلْ شَيْ، وِإتْكُونْ صَحِّتَكْ الْبَدَنِيَّةْ جَوِيَّةْ وِإتْكُونْ مُعَافَةْ زيْ صَحِّتَكْ الْرُّوحِيَّةْ.
3
كَدِّيْشْ كَانْ فَرَحِي شَدِيدْ جَوِي لَمَّا عَدَّى عَلِيَّ بَعْضْ الإخْوَةْ الْمِسَافْرِينْ وِجَالُولِي أنَّكْ تَمْشِي بِحَسَبْ الْحَجْ، وِشِهْدُو لِلْحَجْ الْجَوِيْ إللِّي فيِكْ!
4
وِأفْرَاحْ كَتِيرَةْ جَوِيْ تِمْلا جَلْبِي، لَمَّا أسْمَعْ الأخْبَارْ الْكُوَيِّسَة إللِّي تُوَكِّدْ أنَّ وِلادِي مَاشْيِينْ حَسَبْ الْحَجْ!
5
يَا حَبِيبْنَا، مِعَامَلْتَكْ الْكُوَيْسَةْ لِلإخْوَةْ وِالْغُرْبْ تِجُولْ أنَّكْ تِتْصَرَّفْ بِأمَانَةْ تِجَاهْ اللهْ.
6
وِالإخْوَةْ دُولْ شِهْدُو جِدَّامْ الْكَنِيسَةْ، شِهَادَةْ كُوَيِّسَةْ عنْ مَحَبِّتَكْ. وِانْتَ إبْتَعْمِلْ مَلِيحْ جَوِيْ عَلَشَانْ أعْطِيتْهُمْ إللِّي بِيحْتَاجُوهْ فِي الْسَّفَرْ. وِانْتَ عَارِفْ أنَّ دَايْتِي يِرْضِي اللهْ،
7
عَلَشَانْ الأخْوَةْ دُولْ طِلْعُو عَلَشَانْ خِدْمِةْ الْمَسِيحْ، وَهُمَّ مَا بِيَاخْدُو أيْ مسَاعَدَةْ مِنْ غَيْرْ الْمُؤمِنِينْ.
8
مَفْرُوضْ عَلِيْنَا إحْنَا نِرَحِّبْ بِاللِّي زَيْ دُولْ عَلَشَانْ نَكُونْ بِالْحَجِيجَةْ شُرَكَاتْهُمْ فِي خِدْمِةْ الْحَجْ.
9
وِآنِي كَتَبْتْ جَوابْ لِلْكَنِيسَةْ مِنْشَانْ الأمْرْ دَايْتِي. لَكِنْ دِيُوتْرِيفُوسْ، إللِّي عَاوِزْ يِفْرِضْ نَفْسُهْ عَلِيْهُمْ رَيِّس مَا بِيِجْبَلْنَا.
10
عَلَشَانْ إكْدِهْ، عَاوْزَكْ تَاخُدْ بَالَكْ مِنْ أعْمَالَهْ إللِّي بِيَعْمِلْهَا، لَمَّا أجِيكْ. وَهَوَّ بِيِتِّهِمْنَا بِتُهَمْ كِدْبْ، وِيِتْكَلَّمْ بإسْلوبْ خَبِيثْ. وَمُشْ بَسْ إكْدِهْ، لَكِنْ مَا بِيستَجْبَلْ الإخْوَةْ إللِّي مِسَافْرِينْ ، وِكَمَانْ يِمْنَعْ إللِّي عَاوْزِينْ يِسْتَجْبَالْوهُمْ، ويِطْرُدْهُمْ مِنْ الْكَنِيسَةْ كَمَانْ.
11
يَا حَبِيبْنَا، مَا إتْخَلِّي الْشَّرْ هُوَّ يِجُودَكْ، لَكِنْ الْخِيْرْ هُوَّ إللِّي يِجُودَكْ وَيِمَشِّيكْ عَلَشَانْ إللِّي بِيَعْمِلْ الِخِيْرْ يِكُونْ مِنْ عِنْدْ اللهْ. وَمِينْ يَعْمِلْ الْشّرْ، يِظْهِرْ انَّهْ مَا بِيَعْرِفْ اللهْ بَتَاتَاً.
12
لَكِنْ دِيمِتْرِيُوسْ، الْنَّاسْ كِلَّاتْهَا يِشْهَدُولَهْ شِهَادَةْ كُويِّسَةْ. حَتَّى الْحَجْ نَفْسَهْ يِشْهَدْلَهْ. وِإحْنَا كَمَانْ نِشْهَدْلَهْ. وِانْتُمْ وَاثْجِينْ حَجِيجِي إللِّي نِشْهَدْ بِيهْ.
13
كَانْ عَنْدِي جَاجَاتْ كَتِيرَةْ كُنْتْ عَايِْز إكْتِبْهَالَكْ. آنِي مُشْ عَايِْز إكْتِبْهَا إهْنِهْ بِالْحِبْرْ وِالْجَلَمْ.
14
وِآنِي أتْمَنَّا نِتْجَابَلْ جِرَيِّبْ، وِنِتْكَلَّمْ وَجْهَاً لِوَجْهْ!
15
سَلامِي لِيكْ! حَبَايِبْنَا إهْنِهْ بِسَلِّمُو عَلِيْكْ. سّلِّمْ عَلَى كُلْ وَاحِدْ مِنْ حَبَايِبْنَا بإسْمَهْ