¹ Jiudi,nabulu ta Jisu Karaisiti no likae James sa peqani la leta iati ta kui zira ka kuluni Bangara tamae sa nuni varuka, no ka suti mikini Jisu Karaisiti. ² Nae varavamangana, bule no nuni ma suani ta kui ramu. ³ Ramu likaqu ra ko nuni varuka, volanguni ra ko vasivapada jaju vakaraputa ko koro latu ta kui ramu zozoe dia varavakavele, ra ko karo latu takui ramu ko pini varuka ramu mamu vakaraputa mina ruqi ka vasipani mana ramu taba bose tabuna ta Bangara. ⁴ Bati kavia bose ka zo kopekani latu ta kui ramu. Zira bose iati ka kudoni zira dango. Zira kama bose dira ta Bangara, ka bitingi nae varavamangana Bangara no ka nuni to peta ma vakulani to tanadira, no ka toqapeke kuke to dia bovoe Jisu Karaisiti. ⁵ Ra ko soko ma vanunituruni ramu peta volomo sadane kamu vutini vanoe gui, Bovoe sa va kavili mana zira ka jolo kisini vuduni Egypt ba ta rukusui, goi sa va takani zira bose kama ruqi dira. ⁶ Sa siva vile to se, zira matizana kama ritoki dira dira tutungununa Bovoe ba ka zo kisini dira nuni tutuna. Bangara sa sutini zira nokoso ma kou tia, ta loboro rupa qitana, ta tava varatanae puu tia. ⁷ Si sa siva naputo Sodomu no Gomora no zira komala lata ka kou kulikuli zira ka kia nupu tanadira ta tu varavagabu no zira gadoe varavagabu kama totongovo. Zira ka va takabola gadogadoe lipulipu ta nako ma kou tia. ⁸ No sa siva napu to, zira bose dodoro kenaka kava zaqili nupu tinini dira. Zira ka pejani vanata karaputa ta Bangara, no ka ri vajolo nae varavameke Bovoe. ⁹ Sa siva to Maekolo nae matizana kenaka Bangara sada goi sa vikitoqa kupe pota roka kuru varavamumani zozoea tinini Mosese. Gui kama maligasaranivo ma va paleni gui varatanae ma va rakabulini gui. Ba gui sase Bovoe Bangara ma poeni namu re. ¹⁰ Ba zira bose iati ka pijo vale peta zira kama nuni vutini dira, no peta ka nuni vutini, sa siva zira peta popora piru, iati zira peta sa va rakabulini zira. ¹¹ Varavamuu puu ma kou ta kui zira. Bati zira ka zuli zuka sa tae Keni no ka somoto ta zira zaqala ma tia tae me kui Balamu. Zira ka tupiri taka sa siva Kora. ¹² Zira bose iati ka siva zira pedaka varava zisi ta sada ramu kamu gaki varaququni kope zira, kizao dira mamaqatae ta sada ka gaki kope ram, siva zira bose ka rituki zira sipi ka gaki veke tanadira. Zira ka siva zira toba sa qisu zira vuvusele kama kui vo miqa, gazu sa veverakata kama zareo bulia, kere sada sa le, ka dupili patini. ¹³ Zira ka siva zira buili lata ta sokoro ta kolo, mamaqatuni nupu tanadira, siva sisiriputa zolezole, tutunginia rupa qitana sa kou tia sa pirini zira. ¹⁴ Enoke sa va vitui bose ka tae me takui Adama, sa bili kiniki mana me zira sase, doro! Bovoe sa kope me taba mau zira nae bose tatabuna. ¹⁵ Goi sa me mame varatanae ni zira bose taba. Gui same ma vataka zira taba bose ka zito zira jaju roka kama votovo ta zuka ta Bangara, no taba zira lilio roka karaputa ka vajaju zira bose roka ka varatara kupe ni gui. ¹⁶ Iati zira bose poro nureke no nanana roka, sa zo kope zira dira varavasosoko sa zaqala. Jope dira sa vavangani vazakanapu se mara vakulani nupu tanadira kase, zira kava kikisili zira bose vile se. ¹⁷ Ba ramu, ra ko nuni varuka, mamu nunituru zira lilio ka pijoni mana ramu sadane zira nae aposolo Jisu Karaisiti. ¹⁸ Zira ka pijoni mana ramu, ta bebetoe sada bose varavavilo mara kope zira dira varava sosoko napu tanadira kama tae me vo ta kui Bangara. ¹⁹ Iati goi zira ka jujini varava tavotae, zira ka boseni ta vudu ni ta lua no kama kui vo Potae Tabuna ta pungui dira. ²⁰ Ba ramu ra ko nuni varuka, vadere nupu tana mina ruqi tatabuna, no vivisi ta loboroe Potae Tabuna. ²¹ Mamu suti nupu tanamina ta loboro nuni ta Bangara no mamu pirini nae nuni varavamangana ta dia Bovoe Jisu Karaisiti ma make ramu sa kou tia. ²² Mo nuni zira sa bitoba dira nanana. ²³ Mamu radiki vakivili zira ka vatanga suru la ta qalae nako, vatakabola nam nuni ta kui zira bose vile.Mo kanuquruni zira bobote lata sa pito ka talani tinini dira. ²⁴ Sinani ta kui goi koke sa majala gatetae namu se kasimu taqatupara ma tavisi nam mo dere ta tarakenaka nae varavameke kama kui vo dango ba kula puu tia, ²⁵ Ta kui gui koke to dia Bangara ta loboro dia Bovoe Jisu Karaisiti ma kui varavameke no Bovoe karaputa, pasi mana me tovarine, sinanite no taba sadasada. Mase to tuni.