¹ Ari yaqmo Pol. Krais Yesus abin ya iholib usaqta na ago ya bit giqirquran osayta kab osaiq. Filimon, ni i giyow dumun diqta. Teq i ninaq araqibmo Iyahta ago kabiy emauqta. Ya teq i gimaqbab Timoti inaq i giger sansandek ka mar tonim ningo hib eman lehaq. ² Saq i gihiy Apiya teq Arkipus, mat i inaq araqib Iyahta ago bab nenaq an wolauqta amatin na, teq Yesus ago on mataw ningo bitab humab wolayta na nenaq bunmo gimen sansandek ka i mar tonim eman leh negaqmo. ³ I Gimam God teq i gigo Iyahta Yesus Krais inaq in gigem dumunta negad ne gigem emid midemeqmo usan. ⁴ Ya sirisirimo ni ninadin emad yaqgo God bulonad esey diq ugaiqta. ⁵ Na izaqgo kab bunmo mataw ni ninan kazaq ibilenay, Filimon in Iyahta Yesus anan helmo diq haqad in God ago on mataw tawonta na bunmo ginan anad bilaqaqta haqay. ⁶ Haqsaq ya huritim ya ninmen God bulonim bilaqaiq, God haqaiq, Filimon in Krais ayon daq dumunta kabemmo emdaqta na ni isihunid in anad em hasad in amaqbaban Yesus anan helmo haqayta na gilumsih naqmo hiqiyan haqaiq. ⁷ Helmo kadoy, ni God ago on mataw tawonta bunmo ginan ginad bilaqad gilumsihsaq in gigem hastitaysaq zaway muturta waqayta. Ya ningo daq nazaqta na awagamun huritim inad dimniysaq igem zaway diq tiqiyaqmo. ⁸ Nazaq iyan ni yaqmen daq araq emdaqta na ago ya tinibilennan. Helmo ya Krais abinib gamuk aturanmo nibilenid ni yaqmen daq na emgo azawayin ya iholib usaqta. ⁹ Teq ya gamuk awaz miqinta a hi nibilendaiq. Ya Pol ya mat adinowan tiqiyta. Ad Krais Yesus abin ya iholib usaqta na ago muran ya iqirquran kawa osaiqta. Ya ninaq an anan ginad bilaqsaq ya inad awaz miqin amalib gamuk ka nibilenaiq. ¹⁰ Ni yaqgo amun Onesimus waqeq aluwan ton haqaiq. Ya uliq kab iqirquran ossaq Onesimuns bo ya ibiysaq ya Krais awagamun bulonan in huritim anan helmo tiham. Haqan nab ya in amam nog tiqiy. ¹¹ Kaziqmo in ni ninaq osad in kabiy araq dumunta amalib a hi nilumsihyaqta. Ari muran in anad biliyim in ya teq ni inaq garibmo ayahmo i tigilumsihdaq. ¹² Muran ya Onesimus eman in ningo hib mileqim ta lehaq. In ya iqutilmo diqta. ¹³ Nazaq iyan ya wasihid in ningo ban waqeq ilumsihad kab osdaq haqad ya inad emta. Ya Yesus awagamun dumunta bilaqsaq mataw ya iwazim iqirquran ya bit kab osaiq. Saq ninmo kab osta iyeq ni tuteqmo ya ilumsih nagta. Nazaq iyan ni ya ilumsih nagta na amenin ya ningo kabibiy mat Onesimus ka wasihgo inad emta. ¹⁴ Teq ni ninad a hibilaqdaq haqad ya nazaq a hiqem. Ni ninad bilaqsaq teq ni daq dumunta kawa ya anan bilaqaiqta ka ni ninadibmo em yagdaqta na in dumun. Ari ya nibeq yahid ni ninad a hibilaqsaq iqez muzdaqta na ya loyinsaq in dumun a haiq. ¹⁵ Helmo, Onesimus in ni nihulosim in tukim bolim kab kam asitmo toqosta. Teq ya inad emaiq, In saman yaqgo hib a hibol haqaiq. Ni mat na waqeq inaq tuteqmo anononmo os daqayta naqmo ago in ni nihulosim kab bol haqaiq. ¹⁶ Ta teq muran in ningo hib lehid ni kabibiy mat nog a hi waqdaq. Helmo in ningo kabiy emdaqta. Teq in ningo hib lehid ni nimaqbab araq anan ninad bilaqaqta nazaq nog ni tuwaqdaq. Ya mat na loyinsaq in ya imaqbab dumun diqta nog iyaq. Saq in ningo hib ta lehid ni nazaq tiloyindaqmo. Ad ne giger araqibmo Iyahta aholib soqoteq inaq osad ni mat na anan ninad bilaq gigayindaq. ¹⁷ Nazaq iyan ni ya ibiysaq ya ninaq i giger an ulumsihad Iyahta ago kabiy araqib emauqta nazaq iyid teq ni Onesimus waqeq nigem dumunta ugad inaq os. Ni nigem dumunta ya yagad inaq os nagta nazaq. ¹⁸ Teq in ningo nagah araq miqin tonta o ningo amenin araq in ago hib ussun ari ni in ananta ningo hib usaqta na suholeq abanab ni ya inanta mar ton. ¹⁹ Yaqmo Pol ya kawa ibenabmo nan ka mar tonaiq. Ya teq nagah na tuwastitaydaiq. Teq ya ayahmo nilumsihta na amenin ningo hib usaqmo. Helmo ni amenin na yagnan haqad ni nihol bunmo yagdaqta. Teq ya na ago a hinibilendaiq. ²⁰ Ya imaqbab dumunta, ni yaqgo gamuk ka hurit. Ya ninaq araqibmo Iyahta aholib soqotim osauqta. Nazaq iyan ni ya ilumsihad daq dumunta kawa ya anan tinibilenta ka ni em yag. I giger Krais-mo ago dauhibta iyim iyan ni ya igem emid hastitaysaq ya inad dimniyan. ²¹ NI yaqgo gamuk ka tumuzindaq haqad ya ninmen sansandek ka mar ton nigta. Ad ya inad emaiq, Ni yaqgo gamuk ka muzinad ni ninadibmo nagah asor ya anan a hibilayta inaqmo ni tiqem yagdaq haqaiq. ²² Teq yaqgo gamuk araq ussaqmo. Ni niyogniz ginaq yaqmen God bulonsaq in ya ilumsihid ya bit ka huloseq gatiqdaiq haqad ya ne gibilenaiq. Ya inad emaiq. Ne nazaq God bulonsaq in ne giqez tuhuritdaq haqaiq. Huriteq teq in yaqgo dan wastitayid a ya ne gigo hib ta lehdaiq haqaiq. Nazaq iyan ningo bit adugan araq ya le usdaiqta na ni wastitay yag. ²³ Epafras in Krais Yesus ago afaqan sorad in kawa ya inaq giqirquran osauq. In ago zeq dumun eman ningo hib lehaq. ²⁴ Saq ya iyogniz Mak teq Aristarkus teq Demas Teq Luk in nazaqmo in gigo zeq dumun eman ningo hib lehaqmo. In ya inaq araqibmo Yesus ago kabiy emauqta. ²⁵ Ari Iyahta Yesus Krais agem dumunta negsaq ne osiy. Nawaqmo.