¹ پاشان، ئەی برایان، نزامان بۆ بکەن، تا وشەی پەروەردگار بە خێرایی بڵاوبێتەوە و شکۆمەند بێت وەک چۆن لە ئێوەدا هەیە، ² و خودا لە مرۆڤی خراپەکارڕزگارمان بکات، چونکە باوەڕ بەشی هەموو کەسێک نییە. ³ بەڵام پەروەردگار دڵسۆزە؛ چەسپاوتان دەکات و لە خراپە دەتانپارێزێت. ⁴ ئێمە پڕین لە متمانەی پەروەردگار بە ئێوەو سەبارەت بە ئەنجامدانی ئەوەی ئيمە پێمان راسپاردوون و ئێوەش کاری پیدەکەن. ⁵ خودا دڵەکانتان رێنوێنی بکات بۆ ئاراستەی خۆشەویستی خۆی و خۆڕاگری مەسیح. ⁶ ئەی برایان، بەناوی پەروەردگارمان یەشوای مەسیح، راتاندەنسپێرین، خۆتان جیا بکەنەوە لە هەر برایەک کە ڕەفتاری ئاژاوەگێڕانەی هەیە، لەگەڵ ئەو فێرکردنەدا یەک ناگرێتەوە کە لە ئێمەوە وەرتانگرتووە. ⁷ ئێوە خۆتان دەزانن چۆن دەبێت وەک ئێمە بن، چونکە ڕەفتارەکانمان لەناو ئێوەدا ئاژاوەگيڕانە نەبوو، ⁸ نانمان لەلای کەس بە خۆڕایی نەخواردووە، بەڵکو شەو و ڕۆژ بە رەنج و ماندوو بوونەوە کارمان دەکرد، بۆ ئەوەی نەبینە بارگرانی بەسەرهیچ کامتان. ⁹ ئەمە بەو مانایە نییە کە ئێمە مافمان نییە، بەڵکو زیاتر بۆ ئەوە بوو خۆمان بکەینە نموونە بۆ ئەوەی ئێوەش وەک ئێمە بکەن. ¹⁰ کاتێک لەگەڵتان بووین بەم بنەمایەمان رامانسپاردن: هەر یەکێک نەیویست کار بکات، با نەخوات! ¹¹ بیستوومانە لە نێو ئێوەدا هەندێک کەس ئاژاوەگێڕانە هەڵسوکەوت دەکەن و خۆیان بە هیچ شتێکەوە سەرقاڵ ناکەن بە کاروباری ئەوانی تر نەبێ. ¹² بۆ هاوشێوەیە ئەمانە رامانسپاردووە، لە پەروەردگار یەشوای مەسیحدا، بژێوی ژیانی خۆیان پەیدا بکەن، بە هێمنی کار بکەن. ¹³ بەڵام، ئێوە ئەی برایان، لە کاری چاکە سست مەبن. ¹⁴ وە ئەگەر کەسێک لەم نامەیەدا گوێڕایەڵی قسەی ئێمە نەبوو، گرنگی پێ بدەن وا هەڵس و کەوتی لەگەڵ مەکەن، هەست بە شەرمەزاری بکات. ¹⁵ بە دوژمنی خۆتانی مەزانن، بەڵکو وەک برایەک رێنوێنی بکەن. ¹⁶ پەروەردگاری ئاشتی خۆی هەمیشە و لە هەموو بارودۆخێکدا ئاشتیتان پێ ببەخشێت! پەروەردگار لەگەڵ هەمووتان بێت! ¹⁷ ئەمە سڵاوی منە، من پۆڵس، بە دەستنووسی خۆم. ئەمە نیشانەی جیاکەرەوەیە لە هەر نامەیەک کە لە منەوەیە. من بەم شێوەیە دەنووسم. ¹⁸ بەخششی پەروەردگارمان یەشوای مەسیح لەگەڵ هەمووتان بێت!